ಕಾಸರಗೋಡು ಜಿಲ್ಲೆಯಲ್ಲಿ ಇಂದು ನಿಟ್ಟುಸಿರು-ಎಲ್ಲಾ ಪರೀಕ್ಷಾ ಮಾದರಿಗಳು ನೆಗೆಟಿವ್

•   Wed, Mar 25 2020 07:12:02 PM



• ಕಾಸರಗೋಡು, ಮಾ 25 (DaijiworldNews/SM): ಕೊರೋನಾ ವೈರಸ್ ನಿಂದ ನೆಮ್ಮದಿಯ ವರದಿ ಇಂದು ಬಂದಿದ್ದು, ಇಂದು ಬಂದ ವೈದ್ಯಕೀಯ ಪರೀಕ್ಷೆಯಲ್ಲಿ ಕಾಸರಗೋಡಿನಲ್ಲಿ ಯಾವುದೇ ಸೋಂಕು ಕಂಡು ಬಂದಿಲ್ಲ. ಇದರಿಂದ ಕಳೆದ ಕೆಲವು ದಿನಗಳಿಂದ ಏರುತ್ತಲೇ ಇದ್ದ ಸೋಂಕಿತರ ಸಂಖ್ಯೆಗೆ ಸ್ವಲ್ಪ ಮಟ್ಟಿಗೆ ಬ್ರೇಕ್ ಬಿದ್ದಂತಾಗಿದೆ.

  

  ಇಂದು ಕೇರಳದಲ್ಲಿ ಒಂಭತ್ತು ಪ್ರಕರಣಗಳು ದೃಢ ಪಟ್ಟಿದ್ದು, ಪಾಲಕ್ಕಾಡ್ ನಲ್ಲಿ ಎರಡು, ಎರ್ನಾಕುಲಂ ಮೂರು, ಇಡುಕ್ಕಿಯಲ್ಲಿ ಒಂದು, ಪತ್ತನ೦ತ್ತಿಟ್ಟದಲ್ಲಿ ಎರಡು, ಕೋಜಿಕ್ಕೋಡ್ ಒಂದು ಪ್ರಕರಣ ಪತ್ತೆಯಾಗಿವೆ. ಇದರಿಂದ ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ 112ಕ್ಕೆ ತಲಪಿದೆ.

  ನಾಲ್ವರು ದುಬಾಯಿ, ಓರ್ವ ಅಮೆರಿಕಾ, ಓರ್ವ ಫ್ರಾನ್ಸ್ ನಿಂದ ಬಂದವರಾಗಿದ್ದು, ಮೂವರಿಗೆ ಸೋಂಕಿತರ ಸಂಪರ್ಕದಿಂದ ಸೋಂಕು ತಗಲಿದೆ. ಕಾಸರಗೋಡಿನಲ್ಲಿ ಕಳೆದ ನಾಲ್ಕು ದಿನಗಳ ಅವಧಿಯಲ್ಲಿ 42ರಷ್ಟು ಸೋಂಕಿತರು ಪತ್ತೆಯಾಗಿದ್ದರು. ಇದರಿಂದ ಜನತೆಯಲ್ಲಿ ಭಯದ ವಾತಾವರಣ ಉಂಟಾಗಿತ್ತು. ಜಿಲ್ಲೆಯಲ್ಲಿ 3794 ಮಂದಿ ನಿಗಾದಲ್ಲಿದ್ದಾರೆ. 94 ಮಂದಿ ಐಸೋಲೇಷನ್ ನಲ್ಲಿದ್ದಾರೆ. ಇದುವರೆಗೆ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 44 ಆಗಿದೆ.