ಬೆಳ್ತಂಗಡಿ: ಸಾಮಾಜಿಕ ಅಂತರ ಕಾಯ್ದುಕೊಂಡು ಮನೆಯಲ್ಲೇ ನೆರವೇರಿದ ಸರಳ‌ ವಿವಾಹ

•   Mon, Apr 06 2020 10:36:01 AM



• ಬೆಳ್ತಂಗಡಿ, ಎ.06 (DaijiworldNews/MSP): ಮಹಾ ಮಾರಿ ಕೊರೊನಾ ವೈರಸ್ ನಿಂದಾಗಿ ಅದೆಷ್ಟೋ ಶುಭ ಕಾರ್ಯಗಳು ಮುಂದೂಡಿದೆ. ಸಾವಿರ ಕನಸುಗಳನ್ನು ಕಟ್ಟಿಕೊಂಡು ಶುಭ ಘಳಿಗೆಗೆ ಕಾಯುತ್ತಿದ್ದ ಮದುಮಕ್ಕಳು ವಿವಾಹ ಕಾರ್ಯಕ್ರಮವನ್ನು ಪೋಸ್ಟ್ ಪೋನ್ ಮಾಡಿದ್ದಾರೆ.

  

  ಆದ್ರೆ ಇದೆಲ್ಲದರ ನಡುವೆ ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಮಲವಂತಿಗೆ ಗ್ರಾಮದಲ್ಲಿ ಮನೆಯಲ್ಲಿಯೆ ಸರಳ ವಿವಾಹವೊಂದು ನಡೆದಿದೆ. ನಿಗದಿಪಡಿಸಿದ ದಿನದಂತೆ ಜೋಡಿಯೊಂದು ದಾಪಂತ್ಯ ಜೀವನಕ್ಕೆ ಕಾಲಿಟ್ಟಿದೆ.

  ಖಾಸಗಿ ಬ್ಯಾಂಕ್ ಒಂದರಲ್ಲಿ ಉದ್ಯೋಗದಲ್ಲಿರುವ ಮಲವಂತಿಗೆ ಗ್ರಾಮದ ಪವನ್ ಕುಮಾರ್ ಹಾಗೂ ನೆರಿಯ ಗ್ರಾಮದ ಅಂಗನವಾಡಿ ಕಾರ್ಯಕರ್ತೆಯಾಗಿರುವ ವಿದ್ಯಾ ಅವರ ವಿವಾಹ ತಾಲೂಕಿನ ಕೊಲ್ಲಿ ಶ್ರೀ ದುರ್ಗಾದೇವಿ ದೇವಸ್ಥಾನದಲ್ಲಿ ಇಂದು ನಡೆಯಬೇಕಾಗಿತ್ತು. ಆದ್ರೆ ಕೊರೊನಾ ವೈರಸ್ ನಿಂದ ಇಡೀ ದೇಶವೇ ಲಾಕ್ ಡೌನ್ ಮಾಡಬೇಕಾದ ಆದೇಶ ಬಂದಿದ್ದದರಿಂದ ಮದುವೆ ಮುಂದೂಡಬೇಕಾದ ಆತಂಕ ಎದುರಾಗಿತ್ತು.

  ಈ ಸಂದರ್ಭ ಎರಡು ಮನೆಯವರು ಚರ್ಚೆ ನಡೆಸಿ ವರನ ಮನೆಯಲ್ಲಿಯೇ ಸರಳವಾಗಿ ವಿವಾಹ ಕಾರ್ಯಕ್ರಮ ನಡೆಸುವ ತೀರ್ಮಾನ ಮಾಡಿದರು.‌ ಅದರಂತೆ ಇಂದು ವರನ ಮನೆಯಲ್ಲಿಯೇ ವಿವಾಹ ಕಾರ್ಯಕ್ರಮ ನಡೆಯಿತು. ವರನ ಮತ್ತು ವಧುವಿನ ಕುಟುಂಬದ ಪ್ರಮುಖರಷ್ಟೇ ಪಾಲ್ಗೊಂಡರು. ಅರ್ಚಕರು ಧಾರ್ಮಿಕ ವಿಧಿವಿಧಾನ ನೆರವೇರಿಸಿದರು. ನಿಗದಿಪಡಿಸಿದ ದಿನದಂತೆ ದಾಪಂತ್ಯ ಜೀವನಕ್ಕೆ ಕಾಲಿರಿಸಿದರಿಂದ ಜೋಡಿಗಳು ಸಹ ಫುಲ್ ಖುಷ್ ಆಗಿದ್ದರು. ಸಾಮಾಜಿಕ ಅಂತರವನ್ನು ಕಾಯ್ದುಕೊಂಡೇ ಕಾರ್ಯಕ್ರಮ ನಡೆಸಲಾಯಿತು.