ಉಡುಪಿ : ಲಿಫ್ಟ್‌ ಕೊಡುವ ನೆಪದಲ್ಲಿ ಅತ್ಯಾಚಾರಕ್ಕೆ ಯತ್ನ - ದೂರು ದಾಖಲು

•   Sun, May 03 2020 09:09:10 AM



• ಉಡುಪಿ, ಮೇ 03 (Daijiworld News/MB) : ಅಪರಿಚಿತ ಯುವಕನೊಬ್ಬ ಲಿಫ್ಟ್‌ ಕೊಡುವ ನೆಪದಲ್ಲಿ ಮಹಿಳೆಯನ್ನು ಬೈಕ್‌ನಲ್ಲಿ ನಿರ್ಜನ ಪ್ರದೇಶಕ್ಕೆ ಕರೆದೊಯ್ದು ಅತ್ಯಾಚಾರಕ್ಕೆ ಯತ್ನಿಸಿದ ಘಟನೆ ಶುಕ್ರವಾರ ಬ್ರಹ್ಮಾವರದಲ್ಲಿ ನಡೆದಿದೆ.

  

  

  ಬ್ರಹ್ಮಾವರದ ಫ್ಲ್ಯಾಟ್‌ ಒಂದರಲ್ಲಿ ಆಯಾ ಹಾಗೂ ಸೆಕ್ಯೂರಿಟಿ ಗಾರ್ಟ್ ಆಗಿ ಕಾರ್ಯ ನಿರ್ವಹಿಸುತ್ತಿದ್ದ ಸಂತೆಕಟ್ಟೆಯ ಮಹಿಳೆ ಎಂದಿನಂತೆ ಮೇ 1 ರಂದು ಬೆಳಗ್ಗೆ ಮನೆಗೆ ತೆರಳಲು ಸಹೋದರನಿಗಾಗಿ ಕಾಯುತ್ತಿದ್ದು ಆತ ಬರುವವರೆಗೆ ರಾಷ್ಟ್ರೀಯ ಹೆದ್ದಾರಿಯ ಬದಿ ನಡೆದುಕೊಂಡು ಸಾಗಿದ್ದು ಆ ಸಂದರ್ಭದಲ್ಲಿ ಬೈಕ್‌ನಲ್ಲಿ ಬಂದ ವ್ಯಕ್ತಿ ತಾನು ಸಂತೆಕಟ್ಟೆ ಕಡೆ ತೆರಳುತ್ತಿರುವುದಾಗಿ ಹೇಳಿ ಡ್ರಾಪ್‌ ಕೊಡುವುದಾಗಿ ಹೇಳಿದ್ದಾನೆ.

  ಹೀಗೆ ಬೈಕ್‌ನಲ್ಲಿ ತೆರಳುತ್ತಿದ್ದ ಸಂದರ್ಭದಲ್ಲಿ ಯುವಕ ದಾರಿ ಬದಲಾಯಿಸಿ ನಿರ್ಜನ ಪ್ರದೇಶದೆಡೆ ಕೊಂಡೊಯ್ದಿದ್ದು ಅತ್ಯಾಚಾರಕ್ಕೆ ಯತ್ನಿಸಿದ್ದ ಈ ಸಂದರ್ಭದಲ್ಲಿ ಮಹಿಳೆ ಅಲ್ಲಿಂದ ತಪ್ಪಿಸಿಕೊಂಡು ಬಂದು ಬ್ರಹ್ಮಾವರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

  ಸಿಸಿ ಕ್ಯಾಮೆರಾ ದೃಶ್ಯಾವಳಿ ಆಧಾರದಲ್ಲಿ ಆರೋಪಿಯ ಶೋಧ ಕಾರ್ಯ ನಡೆಸಲಾಗುತ್ತಿದೆ.