ವಿಶ್ವದ ಗಮನ ಸೆಳೆಯಿತು ಕಾರ್ಕಳದ ಯುವತಿ ಮನೆಯಂಗಳದಲ್ಲಿ ಹೊಡೆದ 'ಕವರ್‌ ಡ್ರೈವ್‌'

•   Sat, Jun 13 2020 12:58:42 PM



• ಕಾರ್ಕಳ, ಜೂ.13 (DaijiworldNews/MB) : ಮನೆಯಂಗಳದಲ್ಲಿ ಕ್ರಿಕೆಟ್‌ ಆಡುವ ಸಂದರ್ಭದಲ್ಲಿ ಯುವತಿ ಹೊಡೆದ ಕವರ್‌ ಡ್ರೈವ್‌ ವಿಡಿಯೋ ಈಗ ಸಖತ್‌ ವೈರಲ್‌ ಆಗಿ ವಿಶ್ವದ ಗಮನವನ್ನು ಸೆಳೆದಿದ್ದು ಇಎಸ್‌ಪಿಎನ್‌ ಕ್ರಿಕ್‌ಇನ್ಫೋ ತನ್ನ ಫೇಸ್‌ಬುಕ್‌ ಪೇಜ್‌ನಲ್ಲಿ ಈ ವಿಡಿಯೋವನ್ನು ಅಪ್‌ಲೋಡ್‌ ಮಾಡಿದೆ. 

  

  ಉಡುಪಿ ಜಿಲ್ಲೆಯ ಕಾರ್ಕಳ ತಾಲೂಕಿನ ಕೆರ್ವಾಶೆಯ ಜ್ಯೋತಿ ಪೂಜಾರಿ ಮುಂಬೈನಲ್ಲಿ ವಾಸವಿದ್ದು ಊರಿಗೆ ಬಂದಿದ್ದರು. ಅವರು ಮನೆಯಂಗಳದಲ್ಲಿ ಆಡುವಾಗ ಹೊಡೆದಿರುವ ಈ ಕವರ್‌ ಡ್ರೈವ್‌ ವಿಡಿಯೋವನ್ನು ರಂಜಿತ್‌ ಪೂಜಾರಿ ಎಂಬವರು ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ ಮಾಡಿದ್ದರು. 

  ಈ ವಿಡಿಯೋವನ್ನು ಇಎಸ್‌ಪಿಎನ್‌ ಕ್ರಿಕ್‌ಇನ್ಫೋ ಕೂಡಾ ತನ್ನ ಫೇಸ್‌ಬುಕ್‌ ಪೇಜ್‌ನಲ್ಲಿ ಪೋಸ್ಟ್‌ ಮಾಡಿದ್ದು "ಸ್ಟೆಪ್ಪಿಂಗ್‌ ಔಟ್‌ ಟು ದ ಲೆಗ್‌ಸೈಡ್‌ ಆಂಡ್‌ ಸ್ಮಾಶಿಂಗ್‌ ಇಟ್‌ ಥ್ರೂ ದ ಕವರ್ಸ್ ಎಂದು ಬರೆದಿದ್ದು ಹಾಗೆಯೇ ಇಂತಹ ಹೊಡೆತವನ್ನು ಎಲ್ಲದರೂ ನೋಡಿದ್ದೀರಾ? ಎಂದು ಪ್ರಶ್ನಿಸಿದೆ. 

  ಯುವತಿಯ ವೃತ್ತಿಪರರ ಆಟದಂತಿರುವ ಹೊಡೆತವನ್ನು ಮೆಚ್ಚಿರುವ ಕ್ರಿಕೆಟ್‌ ಪ್ರಿಯರು ಭಾರೀ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಲಕ್ಷಕ್ಕೂ ಅಧಿಕ ಮಂದಿ ಈ ವಿಡಿಯೋವನ್ನು ಮೆಚ್ಚಿದ್ದಾರೆ. 

  ಇನ್ನು ಈ ಬಗ್ಗೆ ಮಾತನಾಡಿರುವ ಯುವತಿ ಜ್ಯೋತಿ ಪೂಜಾರಿ, "ಟೈಮ್‌ಪಾಸ್‌ ಮಾಡುವಾಗ ಮನೆಯಂಗಳದಲ್ಲಿ ಕ್ರಿಕೆಟ್‌ ಆಡಿದ್ದು ಇದರ ವಿಡಿಯೋ ತೆಗೆದು ರಂಜಿತ್‌ ಫೇಸ್‌ಬುಕ್‌ನಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ. ಆದರೆ ಇದು ಇಷ್ಟೊಂದು ಫೇಮಸ್‌ ಆಗುತ್ತದೆ ಎಂದು ನಾನು ಅನಿಸಿರಲಿಲ್ಲ. ಕ್ರಿಕೆಟ್‌ ಎಂದರೆ ನನಗೆ ಬಹಳ ಇಷ್ಟ, ಧೋನಿ ನನ್ನ ನೆಚ್ಚಿನ ಆಟಗಾರ. ಮನೆಯಲ್ಲಿ ಬಿಡುವಾದ ಸಂದರ್ಭದಲ್ಲಿ ನಾನು ಕ್ರಿಕೆಟ್‌ ಆಡುತ್ತೇನೆ" ಎಂದು ಹೇಳಿದ್ದಾರೆ.