ಕಾಸರಗೋಡು: ಟಿಪ್ಪರ್ ಲಾರಿ ಡಿಕ್ಕಿ ಹೊಡೆದು ಮಹಿಳೆ ಸಾವು - ಚಾಲಕ ವಶ

•   Thu, Apr 26 2018 05:15:45 PM



• ಕಾಸರಗೋಡು, ಏ 24 : ಬದಿಯಡ್ಕ ನೆಲ್ಲಿಕಟ್ಟೆಯಲ್ಲಿ ರಸ್ತೆ ಬದಿ ನಿಗೂಢ ವಾಗಿ ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾದ ಮಹಿಳೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಟಿಪ್ಪರ್ ಲಾರಿ ಡಿಕ್ಕಿ ಹೊಡೆದು ಮೃತಪಟ್ಟಿದ್ದಾಗಿ ಖಚಿತ ಪಡಿಸಲಾಗಿದ್ದು ಸಂಬಂಧಪಟ್ಟ ಚಾಲಕನನ್ನು ವಶಕ್ಕೆ ತೆಗೆದು ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ.

  

  ನೆಲ್ಲಿಕಟ್ಟೆಯ ಝುಹಾರ ( 48) ಮೃತಪಟ್ಟ ಮಹಿಳೆ. ಸೋಮವಾರ ನೆಲ್ಲಿಕಟ್ಟೆ ಚರ್ಲಡ್ಕದ ರಸ್ತೆ ಬದಿ ಗಂಭೀರ ಗಾಯಗೊಂಡು ಬಿದ್ದಿರುವುದನ್ನು ಗಮನಿಸಿದ ನಾಗರಿಕರು ಆಸ್ಪತ್ರೆಗೆ ಕೊಂಡೊಯ್ಯುವ ದಾರಿ ಮಧ್ಯೆ ಮೃತಪಟ್ಟಿದ್ದರು . ಅಲ್ಲದೆ ಝುಹಾರ ಅವರ ದೇಹದ ಮೇಲೆ ಗಾಯಗಳು ಕಂಡು ಬಂದ ಕಾರಣ ಕೊಲೆ ಎಂಬ ಸಂಶಯ ಆರಂಭದಲ್ಲಿ ಉಂಟಾಗಿತ್ತು . ಬಳಿಕ ಘಟನಾ ಸ್ಥಳಕ್ಕೆ ತಲಪಿ ಬದಿಯಡ್ಕ ಠಾಣಾ ಪೊಲೀಸರು ಪರಿಶೀಲನೆ ನಡೆಸಿದಾಗ ಸ್ಥಳದಲ್ಲಿ ಟಿಪ್ಪರ್ ಲಾರಿಯ ಬಲ್ಬ್ ಹುಡಿಯಾಗಿ ಬಿದ್ದಿರುವುದು ಕಂಡು ಬಂದಿತ್ತು . ಇದರಿಂದ ಲಾರಿ ಯ ಪತ್ತೆ ಗಾಗಿ ಪೊಲೀಸರು ಶೋಧ ನಡೆಸಿದ್ದರು. ಈ ನಡುವೆ ಎಡನೀರಿನಲ್ಲಿ ಬುಧವಾರ ಬಲ್ಬ್ ಹುಡಿಯಾದ ಹಿನ್ನಲೆಯಲ್ಲಿ ಸ್ಟಿಕ್ಕರ್ ಲಗತ್ತಿಸಿರುವುದು ಕಂಡು ಬಂತು . ಚಾಲಕನನ್ನು ಕರೆಸಿ ವಿಚಾರಿಸಿದಾಗ ಘಟನೆ ನಡೆದಿರುವುದು ಬೆಳಕಿಗೆ ಬಂದಿತು . ಏ.23 ರ ಸೋಮವಾರ ಮುಂಜಾನೆ ಚೆರ್ಕಳದಿಂದ ವಿಟ್ಲಕ್ಕೆ ಜಲ್ಲಿ ಕಲ್ಲುಗಳನ್ನು ಕೊಂಡೊಯುತ್ತಿದ್ದಾಗ ರಸ್ತೆ ಬದಿ ನಡೆದುಕೊಂಡು ಹೋಗುತ್ತಿದ್ದ ಝುಹಾರ ಳಿಗೆ ಡಿಕ್ಕಿ ಹೊಡೆದಿತ್ತು .