ಮನಗೂಳಿ 8 ವಿವಿಪ್ಯಾಟ್ ಬಾಕ್ಸ್​ಗಳು ಪತ್ತೆ ಪ್ರಕರಣ - ಅಕ್ರಮ ನಡೆದಿಲ್ಲವೆಂದು ಜಿಲ್ಲಾಡಳಿತ ಸ್ಪಷ್ಟನೆ

•   Mon, May 21 2018 03:34:17 PM



• ವಿಜಯಪುರ, ಮೇ 21: ವಿಜಯಪುರಜಿಲ್ಲೆಯ ಬಸವನ ಬಾಗೇವಾಡಿ ತಾಲೂಕಿನ ಮನಗೂಳಿ ಗ್ರಾಮದ ಹೊರವಲಯದಲ್ಲಿರುವ ಶೆಡ್​ವೊಂದರಲ್ಲಿ ಭಾನುವಾರ 8 ವಿವಿಪ್ಯಾಟ್ ಬಾಕ್ಸ್​ಗಳು ಪತ್ತೆಯಾಗಿರುವ ಪ್ರಕರಣಕ್ಕೆ ಸಂಬಂಧಪಟ್ಟಂತೆ, ಜಿಲ್ಲಾಡಳಿತ ಸ್ಪಷ್ಟನೆ ನೀಡಿದೆ.

  

  ದೊರೆತಿರುವ ವಿವಿಪ್ಯಾಟ್​ಗಳ ಬಗ್ಗೆ ಸೂಕ್ತ ತನಿಖೆ ನಡೆಸುವಂತೆ, ದೂರು ದಾಖಲಿಸಲು ಸೂಚಿಸಲಾಗಿದೆ. ವಿಜಯಪುರ ಜಿಲ್ಲೆಯ ಎಲ್ಲಾ 2,744 ವಿವಿಪ್ಯಾಟ್​ಗಳು ಸ್ಟ್ರಾಂಗ್ ರೂಂ ನಲ್ಲಿ ಸುರಕ್ಷಿತವಾಗಿದ್ದು, ದೊರೆತಿರುವ ವಿವಿಪ್ಯಾಟ್ ಕೇವಲ ಖಾಲಿ ಬಾಕ್ಸ್​ಗಳಾಗಿದ್ದು, ಅದರಲ್ಲಿ ಯಾವುದೇ ಯಂತ್ರಗಳಿಲ್ಲ, ಯನಿಕ್ ಐಡಿ ನಂಬರ್​ಗಳೂ ಅದರಲ್ಲಿಲ್ಲ. ಅಲ್ಲದೇ, ಅವು ವಿಜಯಪುರ ಜಿಲ್ಲೆಗೆ ಸಂಬಂಧಿಸಿದ ವಿವಿಪ್ಯಾಟ್​ಗಳೂ ಅಲ್ಲ ಎಂದು ವಿಜಯಪುರ ಜಿಲ್ಲಾಧಿಕಾರಿ ಎಸ್​.ಬಿ. ಶೆಟ್ಟಣ್ಣವರ್ ಪತ್ರಿಕಾ ಪ್ರಕಟಣೆ ತಿಳಿಸಿದ್ದಾರೆ.

  ಭಾನುವಾರ ವಿವಿಪ್ಯಾಟ್ ಗಳು ಪತ್ತೆಯಾದ ತಕ್ಷಣ ಚುನಾವಣೆಯಲ್ಲಿ ಅಕ್ರಮ ನಡೆದಿದೆ ಎನ್ನುವ ಸುದ್ದಿ ಹರಡಿ , ವಿಜಯಪುರ ನಗರ ಕ್ಷೇತ್ರದ ಕಾಂಗ್ರೆಸ್ ಪರಾಜಿತ ಅಭ್ಯರ್ಥಿ ಅಬ್ದುಲ್ ಹಮೀದ್ ಮುಶ್ರಿಫ್ ಅವರ ನೇತೃತ್ವದಲ್ಲಿ ಭಾರೀ ಪ್ರತಿಭಟನೆ ನಡೆದಿತ್ತು. ಬಳಿಕ ಜಿಲ್ಲಾಧಿಕಾರಿಗಳು ನಿಷ್ಪಕ್ಷಪಾತ ತನಿಖೆ ನಡೆಸುವ ಭರವಸೆ ಕೊಟ್ಟಪ್ರತಿಭಟನೆ ಹಿಂತೆಗೆದುಕೊಂಡಿತ್ತು.