ಮಂಗಳೂರು: ನಂತೂರು ವೃತ್ತದಲ್ಲಿ ಭೀಕರ ಅಪಘಾತ – ದಂಪತಿ ಸಾವು

•   Wed, Jun 13 2018 08:47:11 AM



• ಮಂಗಳೂರು, ಜೂ13; ನಗರದ ನಂತೂರು ವೃತ್ತದಲ್ಲಿ ನಡೆದ ಭೀಕರ ಅಪಘಾತದಲ್ಲಿ ದಂಪತಿಗಳಿಬ್ಬರು ಮೃತಪಟ್ಟ ದಾರುಣ ಘಟನೆ ನಡೆದಿದೆ.

  
  

  

  

  ಮೃತ ಪಟ್ಟವರನ್ನು ಕಾಪು ಫಕೀರನಕಟ್ಟೆ ನಿವಾಸಿಗಳಾದ ಮೊಹಮ್ಮದ್ ಸಮೀರ್ (32) ಮತ್ತು ಪತ್ನಿ ಅಮ್ರೀನಾ (20) ಎಂದು ಗುರುತಿಸಲಾಗಿದೆ.

  ನವ ದಂಪತಿಗಳು ನಗರದ ಕೆಪಿಟಿ ಕಡೆಯಿಂದ ನಂತೂರು ವೃತ್ತ ಮೂಲಕ ಬೆಳ್ತಂಗಡಿ ಕಡೆಗೆ ಸ್ಕೂಟರ್‌ನಲ್ಲಿ ಸಾಗುತ್ತಿದ್ದರು. ಈ ವೇಳೆ ಸಿಮೆಂಟ್ ತುಂಬಿಸಿಕೊಂಡು ಹೋಗುತ್ತಿದ್ದ ಲಾರಿ ಹಿಂದಿನಿಂದ ಸ್ಕೂಟರ್‌ಗೆ ಢಿಕ್ಕಿ ಹೊಡೆದಿದೆ. ಸಮೀರ್ ಸ್ಕೂಟರ್ ಮೂಲಕ ಬಿಕರ್ಣಕಟ್ಟೆಯತ್ತ ಸಂಚರಿಸುತ್ತಿದ್ದಾಗ ಪಂಪ್‌ವೆಲ್‌ನತ್ತ ಚಲಿಸಬೇಕಾಗಿದ್ದ ಲಾರಿ ಏಕಾಏಕಿ ಎಡಕ್ಕೆ ಚಲಿಸಿದ್ದು, ಈ ಘಟನೆಗೆ ಕಾರಣವಾಗಿದೆ.

  ಲಾರಿ ಸ್ಕೂಟರ್‌ಗೆ ಢಿಕ್ಕಿ ಹೊಡೆದ ವೇಳೆ ಅಮ್ರೀನಾ ಅವರು ಲಾರಿಯಡಿ ಸಿಲುಕಿದ್ದು, ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ. ಮಾತ್ರವಲ್ಲ, ಸ್ಕೂಟರ್ ಸುಮಾರು 30 ಮೀ.ನಷ್ಟು ದೂರ ಎಸೆಯಲ್ಪಟ್ಟಿದೆ. ಈ ವೇಳೆ ಸಮೀರ್ ಗಂಭೀರ ಗಾಯಗೊಂಡಿದ್ದು, ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ.

  ಸಮೀರ್ ವಿದೇಶದಲ್ಲಿದ್ದು ಒಂದು ತಿಂಗಳ ಹಿಂದೆಯಷ್ಟೇ ಕೆಲಸದ ನಿಮಿತ್ತ ಊರಿಗೆ ಬಂದಿದ್ದರು. ಈ ಘಟನೆ ಕುರಿತು ಕದ್ರಿ ಸಂಚಾರಿ ಪೊಲೀಸರು ದೂರು ದಾಖಲಿಸಿದ್ದು, ಲಾರಿ ಸಹಿತ ಚಾಲಕನನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.