ನೀರವ್ ಮೋದಿ ಬಳಿ ಅರ್ಧ ಡಜನ್ ಪಾಸ್ ಪೋರ್ಟ್ ..!

•   Mon, Jun 18 2018 11:56:27 AM



• ಜೂ 18 : ಪಿ ಎನ್ ಬಿ ಹಗರಣದ ಪ್ರಕರಣದ ಪ್ರಮುಖ ಆರೋಪಿ ನೀರವ್ ಮೋದಿ ಒಂದಲ್ಲ, ಎರಡಲ್ಲ, ಬರೋಬ್ಬರಿ ಅರ್ಧ ಡಜನ್ ಗೂ ಹೆಚ್ಚು ಪಾಸ್ ಪೋರ್ಟ್ ಗಳನ್ನು ಬಳಸುತ್ತಿದ್ದಾರೆ ಎನ್ನುವ ಶಾಕಿಂಗ್ ಮಾಹಿತಿ ಲಭ್ಯವಾಗಿದೆ. ಈ ಆರೋಪದ ಮೇಲೆ ನೀರವ್ ಮೋದಿ ವಿರುದ್ದ ಹೊಸ ಎಫ್ ಐ ಆರ್ ದಾಖಲಿಸುವುದಾಗಿ ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ. ಒಂದಕ್ಕಿಂತ ಹೆಚ್ಚು ಪಾಸ್ ಪೋರ್ಟ್ ಹೊಂದುವುದು ಅಥವಾ ಬಳಸುವುದು ಕಾನೂನಿನ ಪ್ರಕಾರ ಅಪರಾಧ. ಈ ಹಿನ್ನಲೆಯಲ್ಲಿ ಹೊಸ ಎಫ್ ಐ ಆರ್ ದಾಖಲಿಸಲು ಸಿದ್ದತೆಗಳು ನಡೆಯುತ್ತಿದೆ. 

  

  ನೀರವ್​ ಮೋದಿಯ ವಿರುದ್ದ ದ ತನಿಖೆ ಚುರುಕುಗೊಂಡ ಬಳಿಕ ನೀರವ್ ಪದೇ ಪದೇ ಬೆಲ್ಜಿಯಂಗೆ ಭೇಟಿ ನೀಡುತ್ತಿರುವುದನ್ನು ಭಾರತೀಯ ಗುಪ್ತಚರ ಸಂಸ್ಥೆಗಳು ಪತ್ತೆ ಮಾಡಿವೆ. ಪಾಸ್​ಪೋರ್ಟ್​ ರದ್ದುಗೊಳಿಸಿದ ಬಳಿಕವೂ ಅವರು ಸತತವಾಗಿ ಪ್ರಯಾಣಿಸುತ್ತಿದ್ದರು. ಈ ಹಿನ್ನಲೆಯಲ್ಲಿ ಅವರ ಬಳಿ ಆರಕ್ಕೂ ಹೆಚ್ಚು ಪಾಸ್​ಪೋರ್ಟ್​ಗಳಿರುವ ವಿಚಾರ ಬಯಲಾಗಿದೆ. ಇವುಗಳಲ್ಲಿ ಎರಡು ಪಾಸ್​ಪೋರ್ಟ್ ಗಳು ಕಳೆದ ಕೆಲ ಸಮಯದಿಂದ ಸಕ್ರಿಯವಾಗಿವೆ ಎಂದು ಹೇಳಲಾಗಿದೆ. ಲಭ್ಯವಾದ ಮಾಹಿತಿ ಅನ್ವಯ ಉಳಿದ ನಾಲ್ಕು ಪಾಸ್​ಪೋರ್ಟ್​ಗಳು ಸಕ್ರಿಯವಾಗಿಲ್ಲ ಎಂದು ತಿಳಿದು ಬಂದಿದೆ. ಇನ್ನು ಸಕ್ರಿಯವಾಗಿರುವ ಪಾಸ್​ಪೋರ್ಟ್​ಗಳಲ್ಲಿ ಒಂದರಲ್ಲಿ ನೀರವ್​ ಮೋದಿಯ ಸಂಪೂರ್ಣ ಹೆಸರನ್ನು ನಮೂದಿಸಲಾಗಿದ್ದು, ಮತ್ತೊಂದರಲ್ಲಿ ಕೇವಲ ಅರ್ಧ ಹೆಸರಷ್ಟೇ ಮುದ್ರಿಸಲಾಗಿದೆ. ಈ ಪಾಸ್​ಪೋರ್ಟ್​ನಲ್ಲಿ ಅವರಿಗೆ ಬ್ರಿಟನ್​ನ 40 ತಿಂಗಳ ವೀಜಾ ಕೂಡಾ ನೀಡಲಾಗಿತ್ತು. ಕಳೆದ ಮಾರ್ಚ್ 31 ರ ವರೆಗೂ ನೀರವ್ ಬ್ರಿಟನ್ ನಲ್ಲೇ ಇದ್ದು ಆ ನಂತರ ಇತರೆ ಪಾಸ್ ಪೋರ್ಟ್ ಗಳ ಬಳಸಿ ಮತ್ತೊಂದು ರಾಷ್ಟ್ರಕ್ಕೆ ಪರಾರಿಯಾಗಿರಬಹುದು ಎಂದು ಅಧಿಕಾರಿಗಳು ಶಂಕಿಸಿದ್ದಾರೆ. ಈ ನಡುವೆ ನೀರವ್ ವಿರುದ್ದ ರೆಡ್ ಕಾರ್ನರ್ ನೋಟಿಸ್ ಹೊರಡಿಸಲು ಭಾರತ ಯತ್ನಿಸುತ್ತಿದೆ.