ಕಾಸರಗೋಡು: ಅಂತರ್ ರಾಜ್ಯ ಗಾಂಜಾ ಸಾಗಾಟಗಾರರ ಬಂಧನ - 40 ಕೆ.ಜಿ ಗಾಂಜಾ ವಶ

•   Wed, Jun 20 2018 04:03:57 PM



• ಕಾಸರಗೋಡು, ಜೂ 20 : ಕೇರಳಕ್ಕೆ ಗಾಂಜಾ ಸಾಗಾಟ ಮಾಡುತ್ತಿದ್ದ ಉಪ್ಪಳ ದ ಇಬ್ಬರನ್ನು ಮಲಪ್ಪುರಂ ಪೊಲೀಸರು ಬಂಧಿಸಿದ್ದು , 40 ಕಿಲೋ ಗಾಂಜಾ ಮತ್ತು ಸಾಗಾಟಕ್ಕೆ ಬಳಸಿದ್ದ ಕಾರನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ.

  
  

  

  

  ಬಂಧಿತರನ್ನು ಉಪ್ಪಳ ಮಂಗಲ್ಪಾಡಿಯ ಮುಸ್ತಾಕ್ ಅಹಮ್ಮದ್ ( 31) ಮತ್ತು ಉಪ್ಪಳ ನಾಟೆಕಲ್ ನ ಇಬ್ರಾಹಿಂ ಸಿದ್ದಿಕ್ ( 26) ಎಂದು ಗುರುತಿಸಲಾಗಿದೆ.
  ಹೊರರಾಜ್ಯದಿಂದ ಕೇರಳಕ್ಕೆ ಗಾಂಜಾ ಸಾಗಾಟ ಮಾಡಲಾಗುತ್ತಿದೆ ಎಂಬ ಖಚಿತ ಮಾಹಿತಿಯಂತೆ ಮಲಪ್ಪುರಂ ನಿಲಂಬೂರು ಪೊಲೀಸರು ಕಾರ್ಯಾಚರಣೆ ನಡೆಸಿದ್ದು, ಇಬ್ಬರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ. ಆಂಧ್ರಪ್ರದೇಶದಿಂದ ಕಡಿಮೆ ಬೆಲೆಗೆ ತರಲಾಗುವ ಗಾಂಜಾವನ್ನು ಮಂಗಳೂರು , ಉಡುಪಿಯ ಲಾಡ್ಜ್ ಗಳಲ್ಲಿ ಹಾಗೂ ಇತರ ಕಡೆಗಳಲ್ಲಿ ದಾಸ್ತಾನಿರಿಸಿ ಅಲ್ಲಿಂದ ಏಜೆ೦ಟರ ಮೂಲಕ ಕೇರಳದ ವಿವಿಧ ಸ್ಥಳಗಳಿಗೆ ಸರಬರಾಜು ಮಾಡಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

  ಮುಸ್ತಾಕ್ ಅಹಮದ್ ವಿರುದ್ಧ ಈ ಹಿಂದೆ 12 ಕಿಲೋ ಗಾಂಜಾ ಸಾಗಾಟ ಮತ್ತು ಕೊಲೆ ಯತ್ನ ಮೊಕದ್ದಮೆ ಇರುವುದಾಗಿ ಪೊಲೀಸರು ತಿಳಿಸಿದ್ದಾರೆ. ಕುಂಬಳೆ ಹಾಗೂ ಇತರ ಪೊಲೀಸ್ ಠಾಣೆ ಗಳಲ್ಲೂ ಇವರ ವಿರುದ್ಧ ಪ್ರಕರಣಗಳಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.