ಮಂಗಳೂರು: ರಿಕ್ಷಾ - ಬಸ್ ನಡುವೆ ಭೀಕರ ಅಪಘಾತ – 7 ವಿದ್ಯಾರ್ಥಿಗಳಿಗೆ ಗಾಯ

•   Sat, Jul 21 2018 11:26:41 AM



• ಮಂಗಳೂರು, ಜು21: ರಿಕ್ಷಾ ಮತ್ತು ಬಸ್ಸಿನ ನಡುವೆ ಸಂಭವಿಸಿದ ಅಪಘಾತದಲ್ಲಿ 7ಮಂದಿ ವಿದ್ಯಾರ್ಥಿಗಳ ಸಹಿತ ರಿಕ್ಷಾ ಚಾಲಕ ಸೇರಿ 8 ಮಂದಿ ಗಾಯಗೊಂಡಿರುವ ಘಟನೆ ಮುಡಿಪು ಮೂಳೂರು ರಸ್ತೆ ನಡುವೆ ಶನಿವಾರ ಬೆಳಿಗ್ಗೆ ಸಂಭವಿಸಿದೆ.

  

  

  ಈ ಘಟನೆಯಿಂದ ಮುಡಿಪು ಭಾರತಿ ಶಾಲಾ ವಿದ್ಯಾರ್ಥಿಗಳು ಗಂಭೀರ ಗಾಯಗೊಂಡಿದ್ದಾರೆ. ಮೂಳೂರು ಹಾಗೂ ಇರಾ ನಿವಾಸಿಗಳಾದ ಹಝರತ್ (9), ಅಫ್ವಾನಾ (7), ತಪ್ಸೀರಾ (19), ಸಫ್ವಾನ್ (15), ಅಸ್ನಾ, ದಿವ್ಯಾ (9), ಧನ್ಯಾ (12) ಹಾಗೂ ಸಮೀರ್ (24) ಗಾಯಗೊಂಡವರು.

  ಕಿರಿದಾದ ರಸ್ತೆಯಲ್ಲಿ ಬೈಕೊಂದನ್ನು ಓವರ್ ಟೇಕ್ ಮಾಡುವ ಭರದಲ್ಲಿ ಮೂಳೂರಿನಿಂದ ಮುಡಿಪು ಕಡೆಗೆ ವಿದ್ಯಾರ್ಥಿಗಳನ್ನು ಹೇರಿಕೊಂಡು ಬರುತ್ತಿದ್ದ ರಿಕ್ಷಾ ಮುಡಿಪುವಿನಿಂದ ಬಿ.ಸಿ.ರೋಡು ಕಡೆಗೆ ತೆರಳುತ್ತಿದ್ದ ಬಸ್ಸಿನ ಮುಂಭಾಗಕ್ಕೆ ಢಿಕ್ಕಿ ಹೊಡೆದಿದೆ. ಪರಿಣಾಮ ಈ ಅವಘಡ ಸಂಭವಿಸಿದೆ. ಸದ್ಯ ಗಾಯಗೊಂಡ 7 ವಿದ್ಯಾರ್ಥಿಗಳು ಸೇರಿದಂತೆ ರಿಕ್ಷಾ ಚಾಲಕ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

  ಮಂಗಳೂರು ದಕ್ಷಿಣ ಸಂಚಾರಿ ಠಾಣಾ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.