ಕುಂದಾಪುರ: ಅಪಘಾತದಲ್ಲಿ ಮಹಿಳೆ ದಾರುಣ ಸಾವು, ಮಗು ಪವಾಡ ಸದೃಶ ಪಾರು

•   Tue, Jul 24 2018 08:34:53 PM



• ಕುಂದಾಪುರ, ಜು 24: ರಸ್ತೆ ದಾಟುತ್ತಿದ್ದ ಸ್ಕೂಟರ್ ಗೆ ವೇಗವಾಗಿ ಬಂದ ಸ್ಕಾರ್ಫಿಯೋ ವಾಹನ ಡಿಕ್ಕಿ ಹೊಡೆದ ಪರಿಣಾಮ ಸ್ಕೂಟರ್ ಸವಾರೆ ಸ್ಥಳದಲ್ಲೇ ದಾರುಣವಾಗಿ ಮೃತಪಟ್ಟ ಘಟನೆ ರಾಷ್ಟ್ರೀಯ ಹೆದ್ದಾರಿ 66ರ ತೆಕ್ಕಟ್ಟೆ ಎಂಬಲ್ಲಿ ಮಂಗಳವಾರ ಸಂಜೆ ನಡೆದಿದೆ. ಕೋಟೇಶ್ವರ ಕಾಗೇರಿ ಸಮೀಪದ ಮಾರ್ಕೋಡ್ ನಿವಾಸಿ ಹರೀಶ್ ಎಂಬುವವರ ಪತ್ನಿ ಸುಜಾತ(30) ಎಂಬವರು ಘಟನೆಯಲ್ಲಿ ಮೃತಪಟ್ಟಿದ್ದಾರೆ.

  
  

  

  

  
  ಸ್ಕೂಟರ್ ನಲ್ಲಿ ತಾಯಿಯ ಜೊತೆಗಿದ್ದ ಆಕೆಯ ಮೂರೂವರೆ ವರ್ಷದ ಮಗು ಪವಾಡ ಸದೃಶ ಪಾರಾಗಿದೆ. ಸುಜಾತ ಸ್ಕೂಟರ್ ನಲ್ಲಿ ಉಡುಪಿ ಕಡೆಯಿಂದ ಮನೆಗೆ ತೆರಳುತ್ತಿದ್ದರು. ತೆಕ್ಕಟ್ಟೆ ವೃತ್ತದಲ್ಲಿ ಎಡಕ್ಕೆ ತಿರುಗಿ ಹೆದ್ದಾರಿ ದಾಟುತ್ತಿದ್ದರು. ಇದೇ ಸಂದರ್ಭ ಕುಂದಾಪುರ ಕಡೆಯಿಂದ ಉಡುಪಿ ಕಡೆಗೆ ವೇಗವಾಗಿ ಬರುತ್ತಿದ್ದ ಸ್ಕಾರ್ಫಿಯೋ ಡಿಕ್ಕಿ ಹೊಡೆದಿದೆ. ಅಪಘಾತದ ತೀವ್ರತೆಗೆ ಎಸೆಯಲ್ಪಟ್ಟ ಸುಜಾತ ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದಾರೆ. ಸ್ಕೂಟರ್ ಎದುರು ಭಾಗದಲ್ಲಿ ನಿಂತಿದ್ದ ಪುಟ್ಟ ಮಗು ಪವಾಡ ಸದೃಶ ಪಾರಾಗಿದೆ. ಸುಜಾತ ಕೂಲಿ ಕೆಲಸ ಮಾಡಿಕೊಂಡಿದ್ದರು ಎನ್ನಲಾಗಿದ್ದು, ಘಟನೆಯಿಂದ ಪುಟ್ಟ ಮಗು ಅನಾಥವಾಗಿದೆ. ಕುಂದಾಪುರ ಸಂಚಾರಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.