ಕೇರಳಕ್ಕೆ ಅರಬ್​ ಸಂಯುಕ್ತ ಸಂಸ್ಥಾನದಿಂದ 700 ಕೋಟಿ ರೂ. ನೆರವು

•   Tue, Aug 21 2018 02:44:57 PM



• ಆ 21: ಪ್ರವಾಹ ಪೀಡಿತ ಕೇರಳ ರಾಜ್ಯಕ್ಕೆ ಅರಬ್​ ಸಂಯುಕ್ತ ಸಂಸ್ಥಾನ (ಯುಎಇ) 700 ಕೋಟಿ ರೂ. ನೆರವು ನೀಡುವ ಮೂಲಕ ಮಾನವೀಯತೆ ಮೆರೆದಿದೆ. ಪ್ರವಾಹದಿಂದ ಹಲವಾರು ಜನ ತಮ್ಮ ಮನೆ-ಮಠ ಕಳೆದುಕೊಂಡಿದ್ದು, ಅಲ್ಲಿರುವ ಸಂತ್ರಸ್ತರು ಮತ್ತೆ ತಮ್ಮ ಬದುಕು ಕಟ್ಟಿಕೊಳ್ಳಲು ದೇಶ-ವಿದೇಶದಿಂದ ನೆರವಿನ ಮಹಾಪೂರವೇ ಹರಿದು ಬರುತ್ತಿದೆ. ಅರಬ್​ ಸಂಯುಕ್ತ ಸಂಸ್ಥಾನ ನೀಡಿದ ಆರ್ಥಿಕ ಸಹಾಯಕ್ಕೆ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್​ ಧನ್ಯವಾದ ಸಲ್ಲಿಸಿದ್ದಾರೆ.

  

  ಯುಎಇ ಅಭಿವೃದ್ದಿಯಲ್ಲಿ ಕೇರಳ ಕಾರ್ಮಿಕರ ಕೊಡುಗೆ ಅಪಾರ. ಇದರಿಂದಾಗಿ ಕೇರಳದ ಸಂತ್ರಸ್ತರಿಗೆ ಇಂಥ ಸಮಯದಲ್ಲಿ ಸಹಾಯ ಮಾಡುವ ವಿಶೇಷ ಜವಾಬ್ದಾರಿ ನಮ್ಮ ಮೇಲಿದೆ ಎಂದು ಯುಎಇ ಉಪಾಧ್ಯಕ್ಷ ಶೇಕ್​ ಮೊಹಮ್ಮದ್​ ಬಿನ್​ ಅಲ್​ ರಶೀದ್​ ಅಲ್​ ಮಕ್ತೌಮ್​ ಕೆಲ ದಿನಗಳ ಹಿಂದೆ ಟ್ವೀಟ್​ ಮಾಡಿ ನೆರವು ಯಾಚಿಸಿದ್ದರು.

  ಇನ್ನು ಕೇರಳದಲ್ಲಿ ಮಳೆ ಕಡಿಮೆಯಾದರೂ ಅಲ್ಲಿರುವ ನೆರೆ ತಗ್ಗಿಲ್ಲ. ಅನೇಕ ಸಂತ್ರಸ್ತರು ಮನೆಕಳೆದುಕೊಂಡಿದ್ದಾರೆ. ಸರಿಯಾಗಿದ್ದ ಮನೆಯಲ್ಲಿ ಹೂಳು ಹಾಗೂ ತ್ಯಾಜ್ಯ, ಮಣ್ಣು ತುಂಬಿಕೊಂಡು ವಾಸಕ್ಕೆ ಅಯೋಗ್ಯವಾಗಿದೆ.