ಮಂಗಳೂರು: ಅಪಾರ್ಟ್ ಮೆಂಟ್ ಲಿಫ್ಟ್ ನಲ್ಲಿ ಸಿಲುಕಿ 7 ವರ್ಷದ ಮಗು ದಾರುಣ ಸಾವು

•   Thu, Aug 23 2018 11:30:35 PM



• ಮಂಗಳೂರು, ಆ 23 (MSP): ನಗರದ ವಾಸ್ ಲೇನ್ ರಸ್ತೆಯ ಅಪಾರ್ಟ್ ಮೆಂಟ್ ನ ಲಿಫ್ಟ್ ನಲ್ಲಿ ಸಿಲುಕಿ 7 ವರ್ಷದ ಬಾಲಕ ದಾರುಣವಾಗಿ ಮೃತಪಟ್ಟ ಘಟನೆ ಆಗಸ್ಟ್ 23 ರ ಗುರುವಾರ ರಾತ್ರಿ ನಡೆದಿದೆ. ಮೃತ ಬಾಲಕನನ್ನು ಪೊಳಲಿ ಅಡ್ಡೂರು ನಿವಾಸಿ ಮೊಹಮ್ಮದ್ ಬಶೀರ್ ಎಂಬವರ ಪುತ್ರ ಮೊಹಮ್ಮದ್ ಸಿನಾನ್ (7) ಎಂದು ಗುರುತಿಸಲಾಗಿದೆ.

  

   

  ಗುರುವಾರ ಸಂಜೆ ಸುಮಾರು 7 ಗಂಟೆ ವೇಳೆಗೆ ತಾಯಿ ಹಾಗೂ ಮೂವರು ಮಕ್ಕಳು ಯಾವುದೋ ಕೆಲಸದ ನಿಮಿತ್ತ ಮನೆಯಿಂದ ಆಚೆ ಹೋಗಲು ಸಿದ್ಧರಾಗಿದ್ದರು. ತಾಯಿಯು ಫ್ಲ್ಯಾಟ್ ಗೆ ಬೀಗ ಹಾಕುತ್ತಿದ್ದ ಸಂದರ್ಭ ಬಾಲಕ ಸಿನಾನ್ ಮೊದಲ ಮಹಡಿಯಲ್ಲಿರುವ ತಮ್ಮ ಫ್ಲ್ಯಾಟ್ ನಿಂದ ಹೊರಗೆ ಬಂದು ಲಿಫ್ಟ್ ಒಬ್ಬನೇ ಒಳಗೆ ಹೋಗಿದ್ದಾನೆ. ಹಳೆ ಮಾದರಿಯ ಲಿಫ್ಟ್ ಇದಾಗಿದ್ದು ದುರಾದೃಷ್ಟವಶಾತ್ ಲಿಪ್ಟ್ ಈ ವೇಳೆಗೆ ಜಾಮ್ ಆಗಿದೆ. ಕೂಡಲೇ ಬಾಲಕ ಕೂಗಾಡಿದ್ದು, ಇದನ್ನು ಕೇಳಿದ ತಾಯಿ ಕಿರುಚಾಡಿದ್ದಾರೆ. ಫ್ಲ್ಯಾಟ್ ನಲ್ಲಿದ್ದ ಉಳಿದವರು ಕೂಡಾ ಓಡಿ ಬಂದು ಲಿಫ್ಟ್ ಬಾಗಿಲು ತೆರೆಯಲು ಪ್ರಯತ್ನಿಸಿದ್ದಾರೆ. ಕೂಡಲೇ ಪೊಲೀಸರು, ಅಗ್ನಿಶಾಮಕ ದಳಕ್ಕೆ ಸೂಚನೆ ನೀಡಲಾಯಿತು. ಆದರೆ ಬಾಲಕನಿದ್ದ ಲಿಫ್ಟ್ ಒಳಗಡೆ ಪ್ರಕ್ರಿಯೆ ಬಾರದಿದ್ದಾಗ ಆತಂಕ್ಕೀಡಾದ ಸ್ಥಳೀಯರು ಬಾಗಿಲು ಮುರಿದು ಲಿಫ್ಟ್ ಓಪನ್ ಮಾಡಿದ್ದಾರೆ. ಬಳಿಕ ಕಷ್ಟಪಟ್ಟು ಬಾಲಕನನ್ನು ಹೊರಗೆ ಸಾಗಿಸಿದ್ದಾರೆ. ಆದರೆ ಬಾಲಕ ಆದಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.
  ಕದ್ರಿ ಪೊಲೀಸ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.