ಸುಳ್ಯ: ಕಾಡಾನೆ ದಾಳಿ - ಕೃಷಿಕ ಮೃತ್ಯು

•   Thu, Apr 08 2021 09:38:30 AM



• ಸುಳ್ಯ, ಎ.08 (DaijiworldNews/PY): ತಾಲೂಕಿನ ಕಲ್ಮಕಾರು ಎಂಬಲ್ಲಿ ನೀರಿನ ದುರಸ್ತಿ ನಡೆಸುತ್ತಿದ್ದ ವ್ಯಕ್ತಿಯೋರ್ವ ಕಾಡಾನೆ ದಾಳಿಗೆ ಸಿಲುಕಿ ಮೃತಪಟ್ಟ ಘಟನೆ ಎಪ್ರಿಲ್‌ 7ರ ಬುಧವಾರದಂದು ನಡೆದಿದೆ.

  

  ಮೃತರನ್ನು ಕಲ್ಮಕಾರು ಗ್ರಾಮದ ಮೆಂಟಕಜೆ ನಿವಾಸಿ ಕೃಷಿಕ ಶಿವರಾಮ ಗೌಡ (85) ಎಂದು ಗುರುತಿಸಲಾಗಿದೆ.

  ಶಿವರಾಮ ಗೌಡ ಅವರು ಎಪ್ರಿಲ್‌‌ 7ರ ಬುಧವಾರದಂದು ಮನೆಯ ಸಮೀಪದ ಕಾಡಿನಿಂದ ತೋಟಕ್ಕೆ ಬರುವ ನೀರಿನ ಪೈಪ್‌ ಅನ್ನು ಸರಿಪಡಿಸಲು ತೆರಳಿದ್ದ ಸಂದರ್ಭ ಇವರ ಮೇಲೆ ಕಾಡಾನೆ ದಾಳಿ ಮಾಡಿದೆ. ಪರಿಣಾಮ ಶಿವರಾಮ ಗೌಡರು ಗಂಭೀರ ಗಾಯಗೊಂಡಿದ್ದರು ಎನ್ನಲಾಗಿದೆ. ಅವರು ಮನೆಗೆ ವಾಪಾಸ್ಸಾಗದ ಕಾರಣ ಮನೆಮಂದಿ ಸ್ಥಳಕ್ಕೆ ತೆರಳಿದ್ದ ಸಂದರ್ಭ ಘಟನೆ ತಿಳಿದುಬಂದಿದೆ. ಕೂಡಲೇ ಅವರನ್ನು ಆಂಬುಲೆನ್ಸ್‌ನಲ್ಲಿ ಸುಳ್ಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ, ಅವರು ಚಿಕಿತ್ಸೆ ಫಲಕಾರಿಯಾಗದೇ ಕೊನೆಯುಸಿರೆಳೆದಿದ್ದಾರೆ.

  ಮೃತರು ಪತ್ನಿ, ಮೂವರು ಪುತ್ರರು ಹಾಗೂ ಮುತ್ರಿಯರನ್ನು ಅಗಲಿದ್ದಾರೆ.

  ಅರಣ್ಯಾಧಿಕಾರಿಗಳು ಘಟನೆಯ ಬಗ್ಗೆ ತಿಳಿದು ಬಳಿಕ ಆಸ್ಪತ್ರೆಗೆ ತೆರಳಿ ಮಾಹಿತಿ ಕಲೆ ಹಾಕಿದ್ದಾರೆ. ಘಟನಾ ಸ್ಥಳಕ್ಕೆ ಭೇಟಿ ನೀಡಿದ ಸುಬ್ರಹ್ಮಣ್ಯ ಪೊಲೀಸರು ಪರಿಶೀಲನೆ ನಡೆಸಿದ್ದಾರೆ.

  ಏತನ್ಮಧ್ಯೆ, ಬುಧವಾರದಂದು ಸಂಜೆ ಎಂಟು ಆನೆಗಳಿರುವ ಹಿಂಡು ಸುಬ್ರಹ್ಮಣ್ಯದಿಂದ ಐನೆಕಿದು, ಕಲ್ಮಕಾರು, ಕೊಲ್ಲಮೊಗ್ರು, ಹರಿಹರ ಮುಂತಾದ ಭಾಗಕ್ಕೆ ಸಂಪರ್ಕಿಸುವ ಐನೆಕಿದು ರಸ್ತೆಯ ಕೆದಿಲ ಬಳಿ ಕಾಣಿಸಿಕೊಂಡಿವೆ.