’ಅನುಕ್ತ’ ಚಿತ್ರದ ಮೂಲಕ ದುಬೈ ಉದ್ಯಮಿ ಹರೀಶ್ ಬಂಗೇರಾ ಸ್ಯಾಂಡಲ್ ವುಡ್ ಗೆ ಪ್ರವೇಶ

•   Thu, Oct 05 2017 05:02:39 PM



• 
  ಅ 5: ಸ್ಯಾಂಡಲ್ ವುಡ್ ನಲ್ಲಿ ಹೊಸಬರ ಸಿನಿಮಾಗಳ ಕಾರುಬಾರು ಜೋರಾಗಿದೆ. ಇದಕ್ಕೆ ಹೊಸ ಎಂಟ್ರಿ ದುಬೈನ ಯುವ ಉದ್ಯಮಿ ಹರೀಶ್ ಬಂಗೇರಾ. ಇವರು ಸ್ಯಾಂಡಲ್ ವುಡ್ ನಲ್ಲಿ "ಅನುಕ್ತ" ಎನ್ನುವ ಸಿನಿಮಾದ ಮೂಲಕ ನಿರ್ಮಾಪಕರಾಗಿ ಪಾದಾರ್ಪಣೆ ಮಾಡಲಿದ್ದು, ಚಿತ್ರದ ಮಹೂರ್ತ ಅಕ್ಟೋಬರ್ ೧೧ ರಂದು , ಕಟಪಾಡಿಯ ಮಾಡಬೆಟ್ಟುವಿನ ಮಹಾಲಿಂಗೇಶ್ವರ ದೇವಸ್ಥಾನದಲ್ಲಿ ನಡೆಯಲಿದೆ. ಚಿತ್ರ ಸಸ್ಪೆನ್ಸ್, ಥ್ರಿಲ್ಲರ್, ಹಾಗೂ ಹಾರರ್ ಕಥೆಯನ್ನು ಒಳಗೊಂಡಿದ್ದು, ಯುವ ನಿರ್ದೇಶಕರಾಗಿ ಅಶ್ವಥ್ ಸ್ಯಾಮುಯೆಲ್ ಸಿನಿಮಾಕ್ಕೆ ಆಕ್ಷನ್- ಕಟ್ ಹೇಳಲಿದ್ದಾರೆ. ಇವರು ಈ ಹಿಂದೆ ದುಬೈನಲ್ಲಿ ಕಿರುಚಿತ್ರ ಮತ್ತು ವಿಡಿಯೋ ಎಡಿಂಟಿಂಗ್ ಮಾಡಿ ಅನುಭವವುಳ್ಳವರು.

  

  

   

  ಚಿತ್ರದ ಕಥೆಗೆ ತಕ್ಕಂತೆ ಮಡಿಕೇರಿ, ಹೆಬ್ರಿ, ಮೂಡುಗೆರೆ ಮತ್ತು ಮಂಗಳೂರಿನ ಸುತ್ತಮುತ್ತ ಮತ್ತು ಕಾಡಿನಲ್ಲೂ ಚಿತ್ರೀಕರಿಸುವ ಐಡಿಯಾ ಇದ್ದು, ಸಂಪೂರ್ಣವಾಗಿ ಹೊಸತನದ ಕಥೆಯನ್ನು ಒಳಗೊಂಡಿದೆ ಎನ್ನುತ್ತಾರೆ ನಿರ್ಮಾಪಕ ಹರೀಶ್.
  ಚಿತ್ರದ ಮುಖ್ಯ ಭೂಮಿಕೆಯಲ್ಲಿ, ಕಾರ್ತಿಕ್ ಭಟ್, ಸಂಗೀತಾ ಭಟ್,ತೆಲುಗು ತಮಿಳು ಸಿನಿಮಾದಲ್ಲಿ ಅಭಿನಯಿಸಿರುವ ಸಂಪತ್ ರಾಜ್, ಹಾಗೂ ಲಕ್ಷ್ಮಿ ಬಾರಮ್ಮ ಧಾರವಾಹಿಯ ಲಕ್ಷ್ಮಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಉಳಿದಂತೆ ಉಷಾ ಭಂಡಾರಿ, ಅನಿಲ್ ನೀನಾಸಂ, ಶ್ರೀಧರ್ ಕೊರ್ಸೆ ಮುಂತಾದವರು ಅಭಿನಯಿಸಲಿದ್ದಾರೆ. ಚಿತ್ರದ ಕಥೆಯನ್ನು ಕಾರ್ತಿಕ್ ಅತ್ತಾವರ್ ಮತ್ತು ಸಂತೋಷ್ ಕುಮಾರ್ ಚಿತ್ರಕಥೆಯನ್ನು ತಯಾರಿಸಿದ್ದು ಸಿನಿಮಾ ’ದೇಯಿ ಪ್ರೋಡಕ್ಷನ್” ಬ್ಯಾನರ್ ನಡಿ ಮೂಡಿ ಬರಲಿದೆ. ಚಿತ್ರಕ್ಕೆ ಸಂಭಾಷಣೆ ಕಿರಣ್ ಶೆಟ್ಟಿ ಮತ್ತು ನವೀನ್ ಶರ್ಮ ಒದಗಿಸಿದ್ದು,  ಮನೋಹರ್ ಜೋಷಿ ಕ್ಯಾಮರಾಮೆನ್ ಆಗಿ ದುಡಿಯಲಿದ್ದಾರೆ.