ಮಂಗಳೂರು ಅ 6: ಒಂದೂವರೆ ವರ್ಷದ ಹಿಂದಿನ ಪ್ರಕರಣವೊಂದರಲ್ಲಿ ಜುಬೈರ್ ಸಾಕ್ಷಿಯಾಗಿದ್ದಾರೆನ್ನುವ ವಿಚಾರದಲ್ಲಿ ವೈಷಮ್ಯ ಹೊಂದಿದ್ದ ಗೂಂಡಾ ಪಡೆ ಅವರನ್ನು ಸಂಚುರೂಪಿಸಿ ಹತ್ಯೆ ನಡೆಸಿರುವುದಾಗಿ ಪೊಲೀಸರ ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ. ಜುಬೈರ್ ಹತ್ಯೆ ನಡೆಸುವ ವೀಡಿಯೋ ಮಸೀದಿಯಲ್ಲಿ ಅಳವಡಿಸಲಾದ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಐವರು ಆರೋಪಿಗಳು ಸೇರಿಕೊಂಡು ಕೃತ್ಯ ನಡೆಸಿರುವುದು ಸಾಬೀತಾಗಿದೆ. ಹತ್ಯೆಯಲ್ಲಿ ಸುಹೈಲ್ ಪ್ರಮುಖ ಪಾತ್ರವಹಿಸಿರುವುದು ಪೊಲೀಸರ ತನಿಖೆ ವೇಳೆ ತಿಳಿದುಬಂದಿದೆ.
ಹಿಂದೆ ಉಳ್ಳಾಲ ಭಾಗದಲ್ಲಿ ವಿವಿಧ ಅಪರಾಧ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದ ‘ಟಾರ್ಗೆಟ್’ ತಂಡದ ಆರೋಪಿಗಳನ್ನು ಗಡೀಪಾರು ನಡೆಸುವಲ್ಲಿ ಸಾರ್ವಜನಿಕರಿಂದ ಸಹಿ ಸಂಗ್ರಹಿಸುವಲ್ಲಿ ಜುಬೈರ್ ಮುಂದೆ ನಿಂತಿದ್ದರು. ಸಮಾಜಸೇವೆಗೆ ಮುಂದಾಗಿದ್ದ ಜುಬೈರ್ ಟಾರ್ಗೆಟ್ ತಂಡದ ಕೆಂಗಣ್ಣಿಗೂ ಗುರಿಯಾಗಿದ್ದರು. ಈ ಎಲ್ಲ ಪ್ರಮುಖ ವಿಷಯವನ್ನಿಟ್ಟುಕೊಂಡು ಹತ್ಯೆ ನಡೆಸಲಾಗಿದೆ ಎಂದು ತಿಳಿದುಬಂದಿದೆ.. ಇನ್ನು ಐವರು ಆರೋಪಿಗಳು ಕೃತ್ಯವೆಸಗಿದ ನಂತರ ಬಿಳಿ ಬಣ್ಣದ ಸ್ವಿಫ್ಟ್ ಡಿಸೈರ್ ಟೂರಿಸ್ಟ್ ವಾಹನದಲ್ಲಿ ಪರಾರಿಯಾಗಿರುವುದಾಗಿ ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಎಲ್ಲರೂ ಬೆಂಗಳೂರಿಗೆ ಪರಾರಿಯಾಗಿರುವ ಸಾಧ್ಯತೆಗಳಿವೆ ಎಂಬುದು ಪೊಲೀಸ್ ಮೂಲಗಳಿಂದ ತಿಳಿದುಬಂದಿದೆ.
ಚಾನಲ್ ಫಾಲೋ ಮಾಡಿ
