ಮಂಜೇಶ್ವರ: ನಾಮಪತ್ರ ಹಿಂಪಡೆಯಲು ಬಿಜೆಪಿಯಿಂದ 15 ಲಕ್ಷದ ಅಮಿಷ - ಸ್ಪೋಟಕ ಮಾಹಿತಿ ಬಹಿರಂಗ

•   Sat, Jun 05 2021 01:19:28 PM



• ಕಾಸರಗೋಡು, ಜೂ 05 (DaijiworldNews/MS): ಚುನಾವಣಾ ಕಣದಿಂದ ಹಿಂದೆ ಸರಿಯಲು ಬಿಜೆಪಿ ಪಕ್ಷವೂ ಎರಡೂವರೆ ಲಕ್ಷ ರೂ. ನೀಡಿದ್ದಾಗಿ ಬಿಎಸ್ಪಿ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿ ಸ್ಪರ್ಧಾ ಕಣದಿಂದ ಹಿಂದೆ ಸರಿದ ಕೆ. ಸುಂದರ ಬಹಿರಂಗಪಡಿಸಿದ್ದು ಈ ಆರೋಪ ಬಿಜೆಪಿಗೆ ನುಂಗಲಾರದ ಬಿಸಿ ತುಪ್ಪವಾಗಿ ಪರಿಣಮಿಸಿದೆ.

   

   

  2016 ರಲ್ಲಿ ಮಂಜೇಶ್ವರ ಕ್ಷೇತ್ರದಿಂದ ಪಕ್ಷೇತರ ಅಭ್ತ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಕೆ . ಸುಂದರ 464 ಮತಗಳನ್ನು ಪಡೆದಿದ್ದರು . ಈ ಚುನಾವಣೆಯಲ್ಲಿ ಕೆ . ಸುರೇಂದ್ರನ್ ಕೇವಲ 89 ಮತಗಳ ಅಂತರದಿಂದ ಸೋಲು ಕಂಡಿದ್ದರು. ಕೆ . ಸುಂದರ ಪಡೆದ ಮತಗಳಿಂದ ಸೋಲುವಂತಾಯಿತು ಎಂಬ ಭಾವನೆ ಬಿಜೆಪಿಯಲ್ಲಿ ಕೇಳಿಬಂದಿತ್ತು.

  ಈ ಬಾರಿಯೂ ಕೆ. ಸುಂದರ ಬಿ ಎಸ್ಪಿ ಅಭ್ಯರ್ಥಿಯಾಗಿ ಮಂಜೇಶ್ವರದಿಂದ ಮತ್ತೆ ನಾಮಪತ್ರ ಸಲ್ಲಿಸಿದ್ದರು. ಆದರೆ ಆ ಬಳಿಕ ನಡೆದ ಬೆಳವಣಿಗೆಯಲ್ಲಿ ಕೆ. ಸುಂದರ ಅವರು ಕೊನೆ ಕ್ಷಣದಲ್ಲಿ ನಾಮಪತ್ರ ಹಿಂತೆಗೆದುಕೊಂಡು ಕೆ . ಸುರೇಂದ್ರನ್ ರಿಗೆ ಬೆಂಬಲ ಸೂಚಿಸಿದ್ದರು. ನಾಮಪತ್ರ ಹಿಂತೆಗೆದುಕೊಳ್ಳುವ ಎರಡು ದಿನಗಳ ಹಿಂದೆ ಸುಂದರ ದಿಡೀರ್ ಆಗಿ ನಾಪತ್ತೆಯಾಗಿದ್ದರು . ಈ ಬಗ್ಗೆ ಬಿಎಸ್ಪಿ ಜಿಲ್ಲಾ ಮುಖಂಡರು ಬದಿಯಡ್ಕ ಪೊಲೀಸರಿಗೆ ದೂರು ನೀಡಿದ್ದರು . ನಾಮಪತ್ರ ಹಿಂತೆಗೆದುಕೊಳ್ಳುವ ದಿನ ಕಳೆದ ಮರುದಿನವೇ ಬಿಜೆಪಿಯ ಮಂಜೇಶ್ವರ ಕ್ಷೇತ್ರ ಚುನಾವಣಾ ಕಚೇರಿಗೆ ತಲುಪಿ ತಾನು ಕಣದಿಂದ ಹಿಂದೆ ಸರಿದಿರುವುದಾಗಿ ಹೇಳಿಕೆ ನೀಡಿದ್ದರು. ಕೆ . ಸುರೇಂದ್ರನ್ ಹಾಗೂ ಬಿಜೆಪಿಯ ಮುಖಂಡರ ಮನವಿ ಮೇರೆಗೆ ನಾಮಪತ್ರ ಹಿಂದಕ್ಕೆ ಪಡೆದುಕೊಂಡಿರುವುದಾಗಿ ಸುಂದರ ಹೇಳಿಕೆ ನೀಡಿದ್ದರು .

  ಆದರೆ ವಿಧಾನಸಭೆ ಚುನಾವಣೆ ಕಳೆದು ಎರಡು ತಿಂಗಳು ಕಳೆಯುತ್ತಿದ್ದಂತೆ ಸ್ಪೋಟಕ ಮಾಹಿತಿಯನ್ನು ಕೆ. ಸುಂದರ ಹೊರಗೆಡವಿದ್ದಾರೆ. " ನಾಮಪತ್ರ ಹಿಂದಕ್ಕೆ ಪಡೆಯಲು ಕೆ . ಸುರೇಂದ್ರನ್ ಹಾಗೂ ಬಿಜೆಪಿ ಮುಖಂಡರು ಒತ್ತಡ ಹೇರಿದ್ದು , ಹಣ ನೀಡುವ ಭರವಸೆ ನೀಡಿದ್ದರು . ಆರಂಭದಲ್ಲಿ 15 ಲಕ್ಷ ರೂ . ನೀಡುವ ಭರವಸೆ ನೀಡಲಾಗಿತ್ತು ಆದರೆ ಎರಡೂ ವರೆ ಲಕ್ಷ ರೂ . ನೀಡಿದ್ದಾರೆ . ಎರಡು ಲಕ್ಷ ರೂ ತಾಯಿ ಕೈಯಲ್ಲಿ ಹಾಗೂ 50 ಸಾವಿರ ರೂ . ನನಗೆ ನೀಡಿದ್ದಾರೆ . ಇದಲ್ಲದೆ ಒಂದು ಸ್ಮಾರ್ಟ್ ಮೊಬೈಲ್ ಫೋನ್ ನ್ನು ಬಿಜೆಪಿಯ ಮುಖಂಡರು ನೀಡಿರುವುದಾಗಿ ಬಹಿರಂಗಪಡಿಸಿದ್ದು , ಇದಲ್ಲದೆ ಸುರೇಂದ್ರನ್ ಗೆದ್ದಲ್ಲಿ ಮಂಗಳೂರಿನಲ್ಲಿ ವೈನ್ ಶಾಪ್ ಗೆ ಪರವಾನಿಗೆ ಹಾಗೂ ಹೊಸ ಮನೆಯನ್ನು ನಿರ್ಮಿಸಿ ನೀಡುವ ಭರವಸೆಯನ್ನು ನೀಡಿದ್ದರು " ಎಂದು ಸುಂದರ ಬಹಿರಂಗಪಡಿಸಿದ್ದಾರೆ.

  ಕೆ . ಸುಂದರವರ ಈ ಹೇಳಿಕೆ ಇದೀಗ ಬಿಜೆಪಿಯ ನ್ನು ಸಂಶಯದ ನೆರಳಿನಲ್ಲಿ ನಿಲ್ಲಿಸಿದೆ . ಚುನಾವಣಾ ಸಂದರ್ಭದಲ್ಲಿ ತ್ರಿಶೂರ್ ನಲ್ಲಿ ಹಣ ಸಾಗಾಟ ಮಾಡುತ್ತಿದ್ದ ಕಾರನ್ನು ಅಪಹರಿಸಿದ್ದ ಘಟನೆ ನಡೆದಿತ್ತು. ಕಾರಿನಲ್ಲಿದ್ದ 25 ಲಕ್ಷ ರೂ . ವನ್ನು ದರೋಡೆ ಮಾಡಲಾಗಿತ್ತು . ಈ ಅಪಹರಣ ಮತ್ತು ದರೋಡೆಯಲ್ಲಿ ಬಿಜೆಪಿಯವರೇ ಶಾಮೀಲಾಗಿದ್ದರು ಎಂಬ ಮಾಹಿತಿ ಪೊಲೀಸರಿಗೆ ಲಭಿಸಿತ್ತು . ಇದ್ದಲ್ಲದೆ ಎನ್ ಡಿ ಎ ಘಟಕ ಪಕ್ಷವಾಗಿ ಸೇರ್ಪಡೆಗೊಳ್ಳಲು ಸಿ . ಕೆ ಜಾನು ನೇತೃತ್ವದ ಜನಾಧಿಪತ್ಯ ರಾಷ್ಟೀಯ ಪಕ್ಷ ಕ್ಕೆ ಹತ್ತು ಲಕ್ಷ ರೂ . ನೀಡಿದ್ದು , ಇದನ್ನು ಸಿ .ಕೆ ಜಾನು ಪಡೆದಿರುವುದಾಗಿ ಪಕ್ಷದ ಕೋಶಾಧಿಕಾರಿ ಪ್ರಸಿದಾ ಆರೋಪಿಸಿದ್ದು , ಚುನಾವಣೆಗೆ ಬಿಜೆಪಿ ಕೋಟ್ಯಾಂತರ ರೂ . ಗಳನ್ನು ವೆಚ್ಚ ಮಾಡಿದೆ ಎಂಬ ಮಾಹಿತಿಗಳು ಒಂದೊಂದಾಗಿ ಹೊರ ಬರತೊಡಗಿದೆ