ಕಾಸರಗೋಡು: ಸ್ನಾನಕ್ಕೆಂದು ಹೊಳೆಗೆ ಇಳಿದ 14 ವರ್ಷದ ಬಾಲಕ ನೀರಿನಲ್ಲಿ ಮುಳುಗಿ ಸಾವು

•   Sun, Oct 14 2018 11:51:58 AM



• ಕಾಸರಗೋಡು, ಅ 14(MSP): ಬಾಲಕನೋರ್ವ  ಹೊಳೆಯಲ್ಲಿ ಮುಳುಗಿ ಮೃತಪಟ್ಟ ಘಟನೆ  ಕುಂಬಳೆ ಠಾಣಾ ವ್ಯಾಪ್ತಿಯ  ಕಿದೂರಿನಲ್ಲಿ  ನಡೆದಿದೆ. ದಂಡೆಗೋಳಿಯ ಮಾರ್ಸೆಲ್  ಡಿಸೋಜ ಅವರ ಏಕೈಕ ಪುತ್ರ  ಮೆಲ್ವಿನ್  ಡಿ ಸೋಜ  (14) ಮೃತಪಟ್ಟ ಬಾಲಕ . ಶನಿವಾರ ಮಧ್ಯಾಹ್ನ ಇಬ್ಬರು ಸ್ನೇಹಿತರ ಜೊತೆ  ಶಿರಿಯ  ಬಜ್ಪೆ  ಉಳುವಾರು  ಹೊಳೆಯಲ್ಲಿ   ಸ್ನಾನಕ್ಕಿಳಿದ  ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ನೀರುಪಾಲಾಗಿದ್ದ ಬಾಲಕನಿಗೆ ಸ್ಥಳೀಯರು ,  ಅಗ್ನಿಶಾಮಕ ದಳದ ಸಿಬ್ಬಂದಿಗಳು , ಪೊಲೀಸರು, ಬೆಸ್ತರು  ಶೋಧ ನಡೆಸಿದ್ದು , ತಡರಾತ್ರಿ  ಕುಂಬಳೆ ಸಮೀಪ ಹೊಳೆಯಲ್ಲಿ ಮೃತದೇಹ ಪತ್ತೆಯಾಗಿದೆ.

  

   

  ಅ.13 ರ ಶನಿವಾರ ಮಧ್ಯಾಹ್ನ ಸ್ನೇಹಿತರ ಜೊತೆಗೆ ಹೊಳೆಗೆ ಸ್ನಾನಕ್ಕೆ ತೆರಳಿದ್ದ ಮೆಲ್ವಿನ್ ಸಂಜೆಯಾದರೂ ಮನೆಗೆ ಬಾರದಿದ್ದುದರಿಂದ ಮನೆಯವರು ಗಾಬರಿಗೊಂಡು ಸ್ನೇಹಿತರಲ್ಲಿ ವಿಚಾರಿಸಿದಾಗ ಘಟನೆ ಬೆಳಕಿಗೆ ಬಂದಿದೆ. ಬಳಿಕ ಶೋಧ ನಡೆಸಲಾಗಿತ್ತು. ಬೆಸ್ತರು ಶೋಧಕ್ಕೆ ಕೈಜೋಡಿಸಿದ್ದು ಮಧ್ಯರಾತ್ರಿ 12.30 ರ ಸುಮಾರಿಗೆ ಬೆಸ್ತರು ಮೃತದೇಹವನ್ನು ಮೇಲಕ್ಕೆತ್ತುವಲ್ಲಿ ಯಶಸ್ವಿಯಾದರು ಮೃತದೇಹವನ್ನು ಕಾಸರಗೋಡು ಜನರಲ್ ಆಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ಬಳಿಕ ಸಂಬಂಧಿಕರಿಗೆ ಬಿಟ್ಟು ಕೊಡಲಾಯಿತು .

  ಮೆಲ್ವಿನ್ ಶೇಣಿ ಶ್ರೀ ಶಾರದಾಂಬಾ ಶಾಲೆಯ ಒಂಭತ್ತನೇ ತರಗತಿ ವಿದ್ಯಾರ್ಥಿಯಾಗಿದ್ದನು. ಮಾರ್ಸೆಲ್ ಡಿ ಸೋಜ ಮತ್ತು ಮೆಟಿಲ್ಡಾ ದಂಪತಿಯ ಏಕೈಕ ಪುತ್ರನಾಗಿದ್ದಾನೆ.