ಕಾರ್ಕಳ: ಒಂಟಿ ವೃದ್ಧನ ಹತ್ಯೆ ಪ್ರಕರಣ, ಆರೋಪಿಯನ್ನು ಬಂಧಿಸಿದ ಪೊಲೀಸರು

•   Mon, Oct 22 2018 10:34:39 PM



• ಕಾರ್ಕಳ, ಅ 22(SM): ಮದ್ಯದ ಅಮಲಿನಲ್ಲಿ ಸ್ನೇಹಿತನನ್ನು ಹತ್ಯೆಗೈದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಕಾರ್ಕಳದ ಕುಕ್ಕುಂದೂರು ನಕ್ರೆ ಪರಪ್ಪು ಎಂಬಲ್ಲಿನ ನಿವಾಸಿ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೊ(64) ಹತ್ಯೆಯಾದವರು. ಇವರ ಸ್ನೇಹಿತ ಟ್ರಾಯ್ ಹಿಲರಿ ಹತ್ಯೆ ನಡೆಸಿದ್ದು, ಆತನನ್ನು ಕಾರ್ಕಳದ ಜೋಡು ರಸ್ತೆ ಎಂಬಲ್ಲಿಂದ ಕಾರ್ಕಳ ಪೊಲೀಸರು ಬಂಧಿಸಿದ್ದಾರೆ.

  

  ಅಲೆಕ್ಸಾಂಡರ್, ಮೀನಾಕ್ಷಿ ಡಿಮೆಲ್ಲೋ ಎಂಬವರನ್ನು ಮದುವೆಯಾಗಿದ್ದರು. ದಂಪತಿಗೆ ಮಕ್ಕಳಿಲ್ಲದ ಕಾರಣ ಪತ್ನಿ ಮೀನಾಕ್ಷಿ ಮಂಗಳೂರಿನಲ್ಲಿ ಆಶ್ರಮದಲ್ಲಿ ನೆಲೆಸುತ್ತಿದ್ದಾರೆ. ಮುಂಬಯಿ ಶಿಪ್‌ನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೋ ಪ್ರಸಕ್ತ ಪರಪ್ಪು ಪರಿಸರದ ಮನೆಯೊಂದರಲ್ಲಿ ಏಕಾಂಗಿಯಾಗಿ ವಾಸವಾಗಿದ್ದರು. ಅವರ ಜೀವನದ ಖರ್ಚಿಗಾಗಿ ಸಹೋದರ ಮತ್ತು ಸಹೋದರಿಯವರು ಹಣವನ್ನು ನೀಡುತ್ತಿದ್ದರು.

  ಮುಂಬಯಿಯಲ್ಲಿದ್ದ ಇದ್ದಾಗ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೋರಿಗೆ ಟ್ರಾಯ್ ಹಿಲರಿ ಸ್ನೇಹಿತನಾಗಿದ್ದ. ಟ್ರಾಯ್ ಹಿಲರಿ ಹಲವಾರು ಬಾರಿ ಕಾರ್ಕಳಕ್ಕೆ ಬರುತ್ತಿದ್ದ. ಹಾಗೂ ಪರಪ್ಪುವಿನ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೋ ಮನೆಯಲ್ಲಿ ಕೆಲವು ದಿನಗಳ ಕಾಲ ತಂಗುತ್ತಿದ್ದ ಎನ್ನಲಾಗಿದೆ. ಮನೆಗೆ ಬಂದಿದ್ದ ಸ್ನೇಹಿತ ಟ್ರಾಯ್ ಹಿಲರಿಯೊಂದಿಗೆ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೋ ಮದ್ಯ ಸೇವಿಸುತ್ತಿದ್ದುದ್ದು ಸರ್ವೇ ಸಾಮಾನ್ಯವಾಗಿತ್ತು ಎಂದು ಸ್ಥಳೀಯರು ತಿಳಿಸಿದ್ದಾರೆ.

  ಅಕ್ಟೋಬರ್ ೨೧ರ ಸಂಜೆ ಮುಂಬಯಿಯಿಂದ ಬಂದಿದ್ದ ಟ್ರಾಯ್ ಹಿಲರಿಯೊಂದಿಗೆ ಸಂಜೆ 6 ಗಂಟೆಗೆ ಅಲೆಕ್ಸಾಂಡರ್ ಜಾನ್ ಡಿಮೆಲ್ಲೋ ಮದ್ಯ ಸೇವಿಸುತ್ತಿದ್ದರು. ಅದೇ ಸಂದರ್ಭದಲ್ಲಿ ಅವರಿಬ್ಬರೊಳಗೆ ಗಲಾಟೆ ನಡೆದಿದೆ ಎಂದು ಸ್ಥಳೀಯರು ಮಾಹಿತಿ ನೀಡಿದ್ದಾರೆ.

  ಹಾಗೂ ಸಂಬಂಧಿ ವಿಕ್ಟರ್ ಮಥಾಯಸ್ ಕಾರ್ಕಳ ಠಾಣೆಗೆ ದೂರು ನೀಡಿದ್ದಾರೆ. ಅದರಂತೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ಸೋಮವಾರ ಸಂಜೆ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸದ್ಯ ವಿಚಾರಣೆ ಮುಂದುವರೆದಿದೆ.