ಬೆಳ್ತಂಗಡಿ: ಒಂದೇ ರಾತ್ರಿ ಏಳು ಅಂಗಡಿಯಲ್ಲಿ ಸರಣಿ ಕಳ್ಳತನ

•   Sun, Nov 04 2018 09:33:21 AM



• ಬೆಳ್ತಂಗಡಿ, ನ 04 (MSP) ತಾಲೂಕಿನಲ್ಲಿ ಹಲವೆಡೆ ಶುಕ್ರವಾರ ರಾತ್ರಿ ಸರಣಿ ಕಳ್ಳತನ ನಡೆದಿದೆ. ಬೆಳ್ತಂಗಡಿ, ಲಾಯಿಲಾ, ಮುಂಡಾಜೆ ಸೇರಿದಂತೆ ಏಳು ಅಂಗಡಿಗಳಿಗೆ ಅ. 02 ರ ಶುಕ್ರವಾರ ತಡರಾತ್ರಿ ಕಳ್ಳರು ನುಗ್ಗಿದ್ದು, ಅಂಗಡಿಗಳ ಶಟರ್‌ಗಳನ್ನು ಮೀಟಿ ಕಳ್ಳತನವೆಸಗಿದ್ದಾರೆ. 

  

  

  

  ಬೆಳ್ತಂಗಡಿ ಸಂತೆಕಟ್ಟೆಯಲ್ಲಿರುವ ವೈನ್‌ಶಾಪ್‌ಗೆ ನುಗ್ಗಿದ ಕಳ್ಳರು ಹಣಕ್ಕಾಗಿ ಜಾಲಾಡಿದ್ದಾರೆ. ಹಣ ಸಿಗದೇ ಇರುವಾಗ ಎರಡು ಬಾಟಲ್ ಮದ್ಯವನ್ನು ಕೊಂಡೊಯ್ದಿದ್ದಾರೆ. ಇದೇ ಕಟ್ಟಡದಲ್ಲಿರುವ ಕೃಷಿ ಪರಿಕರದ ಮಾರಾಟದ ಅಂಗಡಿಯ ಶಟರನ್ನು ಮೀಟಿ ಒಳ ನುಗ್ಗಿ ಕಳವಿಗೆ ಯತ್ನಿಸಿದಾಗ ಅಂಗಡಿಯೊಳಗೆ ಮಲಗಿದ್ದ ಮಾಲಕರಿಗೆಎಚ್ಚರವಾಗಿ ಬೊಬ್ಬೆ ಹೊಡೆದಾಗ ಕಳ್ಳರು ಪರಾರಿಯಾಗಿದ್ದಾರೆ.

  
  ಲಾಯಿಲಾದಲ್ಲಿ ದಿನಸಿ ಅಂಗಡಿಯ ಶಟರ್ ಮುರಿದು ಕಳ್ಳತನಕ್ಕೆ ಯತ್ನಿಸಿದ್ದು ಹಣಕ್ಕಾಗಿ ಜಾಲಾಡಿದ್ದಾರೆ. ಅಲ್ಲಿ ಏನು ಸಿಗದಿದ್ದಾಗ ಸಿಗರೇಟ್ ಪ್ಯಾಕ್‌ನ್ನು ಕಳ್ಳತನಗೈದಿದ್ದಾರೆ. ಮುಂಡಾಜೆಯಲ್ಲಿ ಮೊಬೈಲ್‌ ಅಂಗಡಿ, ಮೀನಿನ ಅಂಗಡಿ, ಎರಡು ದಿನಸಿ ಅಂಗಡಿ ಸೇರಿದಂತೆ ನಾಲ್ಕು ಅಂಗಡಿಗೆ ಕಳ್ಳರು ಕನ್ನ ಹಾಕಿದ್ದು, ಕಳವಿಗೆ ಯತ್ನಿಸಿದ್ದಾರೆ. ಕಳೆದ ಎಂಟು ತಿಂಗಳ ಹಿಂದೆ ವೈನ್‌ಶಾಪ್ ಹಾಗೂ ಲಾಯಿಲಾದ ಅಂಗಡಿಗೆ ಇದೇ ಮಾದರಿಯಲ್ಲಿ ಕಳ್ಳತನ ಮಾಡಿದ್ದರು.

  ಒಂದೇ ರಾತ್ರಿ ಬೆಳ್ತಂಗಡಿಯಿಂದ ಮುಂಡಾಜೆಯ ವರೆಗೆ ಏಳು ಅಂಗಡಿಗಳಿಗೆ ಕನ್ನ ಹಾಕಲಾಗಿದ್ದು, ವೃತ್ತಿಪರ ಕಳ್ಳರು ಆಗಿರಬಹುದೆಂದು ಅಂದಾಜಿಸಲಾಗಿದೆ. ಸಿಸಿ ಕೆಮೆರಾ ಅಳವಡಿಸಿದ್ದ ಕಳ್ಳತನಕ್ಕೆ ಯತ್ನಿಸಿದ ಅಂಗಡಿಗಳಲ್ಲಿ ಸಿಸಿ ಕೆಮರಾದಲ್ಲಿ ಪರಿಶೀಲನೆ ನಡೆಸಿದಾಗ ಕಳ್ಳರು ಮುಖಕ್ಕೆ ಮಂಕಿಟೋಪಿ ಹಾಕಿರುವುದು ಕಂಡು ಬಂದಿದೆ. ಬೆಳ್ತಂಗಡಿ ವೃತ್ತ ನಿರೀಕ್ಷಕ ಸಂದೇಶಪಿ.ಜಿ. ಮಾರ್ಗದರ್ಶನದಲ್ಲಿಬೆಳ್ತಂಗಡಿ ಎಸ್‌ಐರವಿ ಬಿ.ಎಸ್. ಹಾಗೂ ಧರ್ಮಸ್ಥಳ ಎಸ್‌ಐ ಅವಿನಾಶ್‌ಅವರ ನೇತೃತ್ವದಲ್ಲಿ ತನಿಖೆ ನಡೆಸಲಾಗುತ್ತಿದ್ದು ಕಳ್ಳರ ಪತ್ತೆಗಾಗಿ ಬಲೆ ಬೀಸಿದ್ದಾರೆ.