ಕಾಸರಗೋಡು: ಜ್ವರದಿಂದ ಮೃತಪಟ್ಟ ಬಾಲಕಿಯ ಕೋವಿಡ್, ನಿಫಾ ವರದಿ ನೆಗೆಟಿವ್

•   Fri, Sep 17 2021 09:23:03 PM



• ಕಾಸರಗೋಡು, ಸೆ. 17 (DaijiworldNews/SM): ಜ್ವದಿಂದ ಮೃತಪಟ್ಟ ಬದಿಯಡ್ಕ ಪಿಲಾಂಕಟ್ಟೆಯ ಐದರ ಹರೆಯದ ಬಾಲಕಿಯ ನಿಫಾ ತಪಾಸಣಾ ವರದಿ ನೆಗೆಟಿವ್ ಆಗಿದ್ದು, ಕೊರೋನ ತಪಾಸಣಾ ವರದಿ ಕೂಡ ನೆಗಟಿವ್ ಆಗಿದೆ.

  

  ಶುಕ್ರವಾರ ಮಧ್ಯಾಹ್ನದ ವೇಳೆಗೆ ಪುಣೆ ಪ್ರಯೋಗಾಲಯದಿಂದ ತಪಾಸಣಾ ವರದಿ ಲಭಿಸಿದೆ. ಬಾಲಕಿಯಲ್ಲಿ ನಿಫಾ ಸೋಂಕಿನ ಲಕ್ಷಣ ಕಂಡು ಬಂದ ಹಿನ್ನಲೆಯಲ್ಲಿ ಸಂಶಯ ನಿವಾರಣೆಗೆ ಗಂಟಲಿನ ದ್ರವದ ಮಾದರಿಯನ್ನು ತಪಾಸಣೆಗೆ ಕಳುಹಿಸಲಾಗಿತ್ತು.

  ಕೆಲವು ದಿನಗಳಿಂದ ಜ್ವರದಿಂದ ಬಳಲುತ್ತಿದ್ದ ನಜಾ ಫಾತಿಮಾ ಎಂಬ ಬಾಲಕಿ ಕಣ್ಣೂರಿನ ಆಸ್ಪತ್ರೆಯಲ್ಲಿ ಬುಧವಾರ ರಾತ್ರಿ ಮೃತಪಟ್ಟಿದ್ದಳು. ಬಾಲಕಿಯ ಮನೆ ಹೊಂದಿರುವ ಚೆಂಗಳ ಗ್ರಾಮ ಪಂಚಾಯತ್ ವ್ಯಾಪ್ತಿ ಹಾಗೂ ಪರಿಸರದ ಗ್ರಾಮ ಪಂಚಾಯತ್ ಗಳಲ್ಲಿ ಆರೋಗ್ಯ ಇಲಾಖೆ ಮುಂಜಾಗ್ರತಾ ಕ್ರಮ ತೆಗೆದುಕೊಂಡಿದ್ದರು.

  ಚೆಂಗಳ ಅಲ್ಲದೆ ಬದಿಯಡ್ಕ, ಕುಂಬ್ಡಾಜೆ ಗ್ರಾಮ ಪಂಚಾಯತ್ ವ್ಯಾಪ್ತಿಯಲ್ಲಿ ನಿಗಾ ಇರಿಸಲಾಗಿತ್ತು. ಜನ ಸೇರುವ ಕಾರ್ಯಕ್ರಮಕ್ಕೆ ಆರೋಗ್ಯ ಇಲಾಖೆ ನಿಷೇಧ ಹೇರಿತ್ತು. ಕೋವಿಡ್ ವ್ಯಾಕ್ಸಿನ್ ಸ್ಥಗಿತ ಗೊಳಿಸಿತ್ತು. ಇದೀಗ ಸಂಶಯಗಳು ದೂರವಾದುದರಿಂದ ನಾಗರಿಕರು ಹಾಗೂ ಆರೋಗ್ಯ ಇಲಾಖೆ ನಿಟ್ಟುಸಿರು ಬಿಡುವಂತಾಗಿದೆ.