"ಏಕತೆಯ ಪ್ರತಿಮೆ" ತಲುಪಲು ಆರಂಭವಾಗಲಿದೆ ಏರ್​ಪೋರ್ಟ್ ಮತ್ತು ರೈಲು ಸೇವೆ

•   Sat, Nov 17 2018 03:25:27 PM



• ಅಹಮದಾಬಾದ್​, ನ17(SS):  ಜಗತ್ತಿನ ಅತೀ ಎತ್ತರದ ಸರ್ದಾರ್​ ವಲ್ಲಭಭಾಯಿ ಅವರ ಏಕತಾ ಪ್ರತಿಮೆಗೆ ಸುಗಮ ಸಂಪರ್ಕ ಕಲ್ಪಿಸಲು ಗುಜರಾತ್​ ಸರ್ಕಾರ ಸಕಲ ವ್ಯವಸ್ಥೆ ಮಾಡುತ್ತಿದೆ ಎಂಬ ಮಾಹಿತಿಯನ್ನು ಮುಖ್ಯಮಂತ್ರಿ ಕಚೇರಿ ಮಾಧ್ಯಮಗಳಿಗೆ ಬಿಡುಗಡೆ ಮಾಡಿದೆ.

  

  ಗುಜರಾತ್ ಸಮೀಪದ ಕೆವಾಡಿಯ ಎಂಬಲ್ಲಿನ ನರ್ಮದಾ ನದಿ ತೀರದಲ್ಲಿ ಅನಾವರಣಗೊಂಡಿರುವ ಪ್ರತಿಮೆಗೆ ಹತ್ತಿರವಾಗಿ ವಿಮಾನ ನಿಲ್ದಾಣ ನಿರ್ಮಿಸಲು ಮತ್ತು ರೈಲು ಸಂಪರ್ಕ ಕಲ್ಪಿಸುವ ಸಂಬಂಧ ಗುಜರಾತ್​ ಮುಖ್ಯಮಂತ್ರಿ ವಿಜಯ್​ ರೂಪಾನಿ ಅವರು ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರ ಅಧಿಕಾರಿಗಳು ಮತ್ತು ರೈಲ್ವೆ ಮಂಡಳಿಯ ಅಧಿಕಾರಿಗಳೊಂದಿಗೆ ಇತ್ತೀಚೆಗೆ ದೆಹಲಿಯಲ್ಲಿ ಸಭೆ ನಡೆಸಿದ್ದಾರೆ.

  ಸರ್ದಾರ್​ ವಲಭಭಾಯಿ ಪ್ರತಿಮೆ ಇರುವ ಕೆವಾಡಿಯ ಗ್ರಾಮದಿಂದ ರಾಜ್​ಪಿಪ್ಲಾ 23 ಕಿ.ಮೀ. ದೂರದಲ್ಲಿದೆ. ಹೀಗಾಗಿ ನರ್ಮಾದಾ ಜಿಲ್ಲೆಯ ರಾಜ್​ಪಿಪ್ಲಾ ಎಂಬಲ್ಲಿ ವಿಮಾನ ನಿಲ್ದಾಣ ನಿರ್ಮಿಸಲಾಗುವುದು. ಈ ಮೂಲಕ ಪ್ರತಿಮೆಗೆ ಸುಗಮ ಸಂಪರ್ಕ ಕಲ್ಪಿಸಲಾಗುವುದು ಎಂದು ವಿಜಯ್​ ರೂಪಾನಿ ಹೇಳಿದ್ದಾರೆ.

  ಇದೇ ವೇಳೆ ರೈಲ್ವೆ ಮಂಡಳಿಯೊಂದಿಗೂ ಸಭೆ ನಡೆಸಿದ್ದು, ರಾಜ್ಯದ ಹಲವು ರೈಲ್ವೆ ಯೋಜನೆಗಳಿಗೆ ಸಂಬಂಧಿಸಿದಂತೆ ಚರ್ಚಿಸಿದ್ದಾರೆ. ಪ್ರತಿಮೆ ಇರುವ ಕೆವಾಡಿಯ ವರೆಗೂ ರೈಲು ಮಾರ್ಗ ನಿರ್ಮಿಸುವಂತೆ ಮನವಿ ಮಾಡಿದ್ದಾರೆ ಎನ್ನಲಾಗಿದೆ.