ಅಕ್ರಮ ಗೋ ಸಾಗಾಟ – ಗೋಕಳ್ಳರ ಅಟ್ಟಹಾಸ ತಡೆಯಲು ಹೋದ ಪೊಲೀಸ್ ಪೇದೆಗೆ ಗಾಯ

•   Tue, Oct 17 2017 11:38:52 AM



• ಕುಂದಾಪುರ, ಅ 17: ಅಕ್ರಮ ಗೋ ಸಾಗಾಟ  ನಡೆಸುತ್ತಿದ್ದ ಆರೋಪಿಗಳನ್ನು ತಡೆಯಲು ಯತ್ನಿಸಿದ ವೇಳೆ ಪೊಲೀಸ್ ಸಿಬ್ಬಂದಿಯೋರ್ವ ಗಾಯಗೊಂಡ ಘಟನೆ ಕುಂದಾಪುರ ಗ್ರಾಮಾಂತರ ಠಾಣೆಯ ಮುಂಭಾಗದಲ್ಲಿ ನಡೆದಿದೆ.

   

  

  

  

  

  

  

  

  

   

  ಪ್ರಶಾಂತ್ ನಾಗಣ್ಣ ಘಟನೆಯಲ್ಲಿ ಗಂಭೀರ  ಗಾಯಗೊಂಡಿದ್ದು, ಕುಂದಾಪುರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

  ಘಟನೆ ಹಿನ್ನೆಲೆ:

  ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಗೆ ಗುಲ್ವಾಡಿ ಕಡೆಯಿಂದ ಅಕ್ರಮವಾಗಿ ಗೋವನ್ನು ಬಸ್ರೂರು ಮೂಲಕ ಸಾಗಿಸಲಾಗುತ್ತಿದೆ ಎನ್ನುವ ಮಾಹಿತಿ ದೊರಕ್ಕಿದ್ದು, ಈ ಹಿನ್ನೆಲೆ ಗುಲ್ವಾಡಿ ಸೇತುವೆ ಮೇಲೆ ವಾಹನವನ್ನು ಅಡ್ಡ ಹಾಕುವ ಉದ್ದೇಶದಿಂದ ಪೊಲೀಸರು ಕಾರ್ಯಾಚರಣೆಗಿಳಿದ್ದರು. ಆದರೆ ಕೂದಲೆಳೆ ಅಂತರದಿಂದ ತಪ್ಪಿಸಿಕೊಂಡ ಆರೋಪಿಗಳು ಬಸ್ರೂರು ಮೂಲಕ ಕಂಡ್ಲೂರು ಕಡೆ ತೆರಳಿದ್ದರು. ಹೀಗಾಗಿ ಪೊಲೀಸರು ಠಾಣೆ ಎದುರು ಬ್ಯಾರಿಕೇಡ್ ಅಳವಡಿಸಿ ವಾಹನಕ್ಕೆ ತಡೆಯೊಡ್ಡುವಂತೆ ಸೂಚಿಸಿದ್ದರು. ಈ ಹಿನ್ನೆಲೆ ಸಿಬ್ಬಂದಿಗಳಾದ ಅಶೋಕ್ ಮತ್ತು ಪ್ರಶಾಂತ್ ನಾಗಣ್ಣ ಬ್ಯಾರಿಕೆಡ್ ಅಳವಡಿಸಿ ಅಕ್ರಮ ಗೋ ಸಾಗಾಟ ಮಾಡುತ್ತಿದ್ದ ವಾಹನಕ್ಕಾಗಿ ಕಾದಿದ್ದರು. ಆದರೆ ಸ್ಥಳಕ್ಕೆ ಬಂದ ಅಕ್ರಮ ಗೋಸಾಗಾಟಗಾರರ  ವಾಹನ ಬ್ಯಾರಿಕೇಡ್‌ನ್ನು ಮುರಿದು ಸ್ಥಳದಿಂದ ಪರಾರಿಯಾಗಿದೆ.

  ಈ ಸಂದರ್ಭ ಆಳೆತ್ತರಕ್ಕೆ ಹಾರಿದ  ಬ್ಯಾರಿಕೇಡ್  ಪ್ರಶಾಂತ್  ನಾಗಣ್ಣರ  ಮಂಡಿ ಮೇಲೆ ಬಿದ್ದಿದ್ದು, ಮಂಡಿ ಚಿಪ್ಪಿಗೆ ತೀವ್ರ ಪ್ರಮಾಣದ ಗಾಯವಾಗಿದೆ.

  ಪೊಲೀಸರ ಹರಸಾಹಸದಿಂದ ಗುಲ್ವಾಡಿ ಸೇತುವೆ ಸಮೀಪ  ಅಕ್ರಮ ಗೋ ಸಾಗಾಟ ನಡೆಸುತ್ತಿದ್ದ ವಾಹನ ತಡೆ ಹಿಡಿದಿದ್ದು, ವಾಹನದಲ್ಲಿ 25 ಜಾನುವಾರುಗಳು ಪತ್ತೆಯಾಗಿದೆ. ಇದರಲ್ಲಿ 11 ಜಾನುವಾರುಗಳು ಮೃತ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಈ ಕುರಿತು ಕಂಡ್ಲೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.