ಉಡುಪಿ: ಕೆಜಿಎಫ್ ಚಿತ್ರ ವೀಕ್ಷಣೆಗೆ ಟಿಕೆಟ್ ಸಿಗದ ಹಿನ್ನೆಲೆ, ಯಶ್ ಅಭಿಮಾನಿಗಳಿಂದ ದಾಂಧಲೆ

•   Fri, Dec 21 2018 09:26:14 PM



• ಉಡುಪಿ, ಡಿ 21(SM): ಕೆಜಿಎಫ್ ಚಲನಚಿತ್ರ ಇಂದು ಬಿಡುಗಡೆಗೊಂದಡಿದ್ದು ಟಿಕೆಟ್ ಸಿಗದ ಹಿನ್ನೆಲೆಯಲ್ಲಿ ಯಶ್ ಅಭಿಮಾನಿಗಳು ದಾಂಧಲೆ ನಡೆಸಿದ ಘಟನೆ ಉಡುಪಿಯ ಅಲಂಕಾರ್ ಚಿತ್ರಮಂದಿರದಲ್ಲಿ ನಡೆದಿದೆ.

  

  

  ಕೆಜಿಎಫ್ ಚಲನಚಿತ್ರ ರಾಜ್ಯಾದ್ಯಂತ ಮಾತ್ರವಲ್ಲದೆ ದೇಶ ವಿದೇಶಗಳಲ್ಲಿ ಶುಕ್ರವಾರ ಬಿಡುಗಡೆಗೊಂಡಿದೆ. ಉಡುಪಿಯ ಅಲಂಕಾರ್ ಚಿತ್ರಮಂದಿರದಲ್ಲಿ ಪ್ರಥಮ ಪ್ರದರ್ಶನ ಮುಂಜಾನೆ 10 ಗಂಟೆಗೆ ಪ್ರಾರಂಭವಾಗಿತ್ತು. ಆ ಸಂದರ್ಭದಲ್ಲೇ 100ಕ್ಕೂ ಹೆಚ್ಚು ಯಶ್ ಅಭಿಮಾನಿಗಳು ಟಿಕೆಟ್ ಸಿಗದೆ ನಿರಾಸೆಗೊಂಡಿದ್ದರು.

  ಮಧ್ಯಾಹ್ನದ ಟಿಕೆಟ್ ಈಗಾಲೇ ನೀಡಬೇಕೆಂದು ಚಲನಚಿತ್ರ ಮಂದಿರದ ಸಿಬ್ಬಂದಿಗಳಲ್ಲಿ ವಾಗ್ವಾದಕ್ಕೆ ಇಳಿದ ಘಟನೆ ನಡೆಯಿತು. ಮಾತ್ರವಲ್ಲದೆ ಭದ್ರತೆಗೆ ಅಳವಡಿಸಿದ ಗೇಟ್ ಗಳನ್ನು ಮುರಿದು ಚಿತ್ರಮಂದಿರದ ಒಳಗೆ ನುಗ್ಗಲು ಯತ್ನಿಸಿದ ಘಟನೆ ಕೂಡ ನಡೆಯಿತು.

  ಪರಿಸ್ಥಿತಿ ವಿಕೋಪಕ್ಕೆ ಹೋಗುವುದನ್ನು ಅರಿತ ಮಂದಿರದ ಸಿಬ್ಬಂದಿಗಳು ನಗರ ಠಾಣೆಗೆ ದೂರು ನೀಡಿದರು. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಯಶ್ ಅಭಿಮಾನಿಗಳನ್ನು ಸಮಾಧಾನ ಪಡಿಸಲು ಯತ್ನಿಸಿದರು. ಅದಕ್ಕೂ ಒಪ್ಪದಿದ್ದಾಗ ಚಿತ್ರಮಂದಿರದ ಸಿಬ್ಬಂದಿಗಳು 11 ಗಂಟೆಗೆ ಮುಂದಿನ ಪ್ರದರ್ಶನ ಇದ್ದು ಅದರ ಟಿಕೆಟ್ ನೀಡುವುದಾಗಿ ಹೇಳಿ ಸಮಾಧಾನ ಪಡಿಸಿದರು.