ಉಡುಪಿ: ಪಕ್ಷದ ಕಾರ್ಯಕ್ರಮಕ್ಕೆ ಗೈರಾಗುತ್ತಿದ್ದ ಪ್ರಮೋದ್ ಗೆ ಉಸಿರುಗಟ್ಟುವುದು ಹೇಗೆ? - ಅಶೋಕ್ ಕೊಡವೂರು

•   Wed, May 11 2022 05:01:56 PM



• ಉಡುಪಿ, ಮೇ 11 (DaijiworldNews/MS): ಕಳೆದ ಸುಮಾರು ಮೂರು ವರ್ಷಗಳಿಂದ ಪಕ್ಷದ ಯಾವುದೇ ಕಾರ್ಯಕ್ರಮಕ್ಕೆಹಾಜರಾಗದ ಪ್ರಮೋದ್ ಮಧ್ವರಾಜ್ ಗೆ ಪಕ್ಷದಲ್ಲಿ ಉಸಿರುಗಟ್ಟುವುದು ಹೇಗೆ? ಸದ್ಯಕ್ಕೆ ನಮಗೆ ಅಧಿಕಾರ ಇಲ್ಲ ಹೀಗಾಗಿ ಅವರಿಗೆ ಉಸಿರು ಕಟ್ಟಿರಬಹುದು ಎಂದು ಪ್ರಮೋದ್ ಬಿಜೆಪಿ ಸೇರ್ಪಡೆ ಕುರಿತು ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಅಶೋಕ್ ಕುಮಾರ್ ಕೊಡವೂರು ಪ್ರತಿಕ್ರಿಯೆ ನೀಡಿದರು.

  ನಮ್ಮದು ಪ್ರಜಾಪ್ರಭುತ್ವದ ಅಡಿಯಲ್ಲಿ ಇರುವ ಪಕ್ಷ. ಪ್ರಮೋದ್ ಅವರಿಗಾಗಿ ನಮ್ಮ ಎಲ್ಲಾ ಕಾರ್ಯಕರ್ತರು, ನಾಯಕರು ಕೆಲಸ ಮಾಡಿದ್ದಾರೆ. ಅವರಿಗೆ ಪಕ್ಷ ಎಲ್ಲಾ ಸೌಲಭ್ಯ ನೀಡಿದೆ. ಅವರ ಕುಟುಂಬದ ಎರಡು ಪೀಳಿಗೆಗೆ ಪಕ್ಷ ಕೆಲಸ ಮಾಡಿದೆ. ಅವರು ಹೇಳಿದ ಎಲ್ಲಾ ಬೇಡಿಕೆಗಳನ್ನು ಪೂರೈಸಿದೆ. ಇನ್ನಾದರೂ ನಾವ್ಯಾರೂ ಮೇಲೆ ಬರಬಾರದಾ? ಹೋಗುವುದು ಅವರ ಇಚ್ಛೆ. ಆದರೆ ಹೋದ ಮೇಲೆ ಆರೋಪ ಮಾಡುವುದು ಏಕೆ? ಎಂದು ಅವರು ಪ್ರಶ್ನಿಸಿದರು.

  ಅವರ ತಾಯಿಗೆ ಇಂದು ಕೂಡಾ ಸಾವಿರಾರು ರೂಪಾಯಿ ಪಿಂಚಣಿ ಬರುತ್ತದೆ ಎಂದರೆ ಅದು ಕಾರ್ಯಕರ್ತರ ಶ್ರಮದ ಫಲ. ನಾವು ನಮ್ಮ ಕುಂಟುಂಬಕ್ಕಾಗಿ ದುಡಿದು ಕೊಡುವ ಹಣವನ್ನು ಪಕ್ಷಕ್ಕಾಗಿ ನೀಡುತ್ತಿದ್ದೇವೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

  ಅವರು ಹೋದ ಮೇಲೆ ನನಗೆ ಏನೂ ವಿಶೇಷ ಅನಿಸಲಿಲ್ಲ. ಪ್ರಥಮ ಹಂತದಲ್ಲಿ ನಾನು ಅವರೊಂದಿಗೆ ಮಾತನಾಡಲು ಹೋಗಿದ್ದೆ. ಜೆಡಿಎಸ್ ಅಭ್ಯರ್ಥಿಯಾಗಿ ಸ್ಪರ್ಧೆ ಮಾಡಿದ್ದರು. ಆಗ ಪಕ್ಷದ ಚೌಕಟ್ಟಿನಲ್ಲಿ ಮಾತನಾಡಿದ್ದೇನೆ. ಪಕ್ಷದ ಶಿಸ್ತನ್ನು ಎಲ್ಲರೂ ಪಾಲಿಸಬೇಕು. ಅವರು ಹೋದ ಬಳಿಕ ಎಷ್ಟೊ ಕಾರ್ಯಕರ್ತರು "ಈಗ ನಮಗೆ ಉಸಿಡಾಡುವ ಹಾಗೆ‌ ಆಗಿದೆ" ಎನ್ನುತ್ತಾರೆ ಎಂದು ಹೇಳಿದರು.