ಮಂಗಳೂರು: ಸಾಧನೆಗೆ ನ್ಯೂನತೆ ಅಡ್ಡಿಯಲ್ಲ ಎಂದು ತೋರಿಸಿಕೊಟ್ಟಿದ್ದಾರೆ ಈ ಎಂಟು ವಿದ್ಯಾರ್ಥಿಗಳು

•   Thu, May 19 2022 04:36:39 PM



• ಮಂಗಳೂರು/ಕಡಬ, ಮೇ 19 (DaijiworldNews/DB): ಸಾಧನೆಗೆ ನ್ಯೂನತೆಗಳು ಅಡ್ಡಿಯಲ್ಲ ಎಂಬುದನ್ನು ಈ ಎಂಟು ಮಂದಿ ವಿದ್ಯಾರ್ಥಿಗಳು ತೋರಿಸಿಕೊಟ್ಟಿದ್ದಾರೆ. ಎಂಡೋಸಲ್ಪಾನ್ ಸಂತ್ರಸ್ತರಾಗಿದ್ದರೂ ಆ ನೋವನ್ನು ಮೆಟ್ಟಿ ನಿಂತು ಎಸೆಸ್ಸೆಲ್ಸಿಯಲ್ಲಿ ಸಾಧನೆ ಮಾಡಿದ್ದಾರೆ.

  ಹೌದು. ಕಡಬ ತಾಲೂಕಿನ ರಾಮಕುಂಜ ವಿದ್ಯಾಚೇತನ ಶಾಲೆಯ ಐವರು ವಿದ್ಯಾರ್ಥಿಗಳು ಈ ಸಾಧನೆ ಮಾಡಿದವರು. ವಿದ್ಯಾರ್ಥಿಗಳಾದ ವಿಜೇಶ್ (ಶೇ.59.84), ರಂಶೀದ್ (ಶೇ. 58.88), ಸುರೇಶ್ (ಶೇ.50.08), ಪದ್ಮಶೇಖರ್‍ (ಶೇ.42.88) ಹಾಗೂ ಮೋಹನ್ (ಶೇ. 41.92) ಅಂಕ ಗಳಿಸಿ ತೇರ್ಗಡೆ ಹೊಂದಿದ್ದಾರೆ ಎಂದು ಶಾಲೆಯ ಮುಖ್ಯ ಶಿಕ್ಷಕಿ ಶಶಿಕಲಾ ತಿಳಿಸಿದ್ದಾರೆ.

  ಇನ್ನು ಮಂಗಳೂರಿನ ಕೋಟೆಕಣಿ ರೋಮನ್ ಆಂಡ್ ಕ್ಯಾಥರಿನ್ ಲೋಬೋ ಅಂಧ ಮಕ್ಕಳ ಶಾಲೆಯ ವಿದ್ಯಾರ್ಥಿಗಳಾದ ಸಚಿನ್ (ಶೇ. 82.72), ಶ್ರೀ ಮೆನ್ಮಾ ಬಲ್ಲಾಳ್ (ಶೇ.75.84), ಹಾಗೂ ನಿತೇಶ್ (ಶೇ. 56) ಅಂಕ ಗಳಿಸಿದ್ದಾರೆ.

  ಎರಡೂ ಶಾಲೆಗಳು ಮಂಗಳೂರಿನ ಸೇವಾ ಭಾರತಿ ಸಂಸ್ಥೆಯಿಂದ ನಡೆಸಲ್ಪಡುತ್ತಿದೆ. ಎಂಡೋ ಪೀಡಿತ ವಿದ್ಯಾರ್ಥಿಗಳು ಖಾಸಗಿಯಾಗಿ ಪರೀಕ್ಷೆ ಬರೆದಿದ್ದರು. ಇವರಿಗೆ ದ.ಕ. ಜಿಲ್ಲಾಧಿಕಾರಿ ಡಾ. ಕೆ.ವಿ. ರಾಜೇಂದ್ರ, ಡಿಡಿಪಿಐ ಸುಧಾಕರ್ ಕೆ. ಹಾಗೂ ಇತರ ಅಧಿಕಾರಿಗಳು ಕಡಬದಲ್ಲಿರುವ ವಿದ್ಯಾರ್ಥಿಗಳ ಮನೆ ಸಮೀಪದಲ್ಲಿಯೇ ಪರೀಕ್ಷೆ ಬರೆಯಲು ಅವಕಾಶ ಕಲ್ಪಿಸಿ ವಿಶೇಷಪರೀಕ್ಷಾ ಕೇಂದ್ರವನ್ನು ತೆರೆದಿದ್ದರು. ಈ ವ್ಯವಸ್ಥೆ ಆಗದೇ ಇದ್ದಿದ್ದಲ್ಲಿ ಮನೆಯಿಂದ 34 ಕಿಮೀ ದೂರದಲ್ಲಿರುವ ಪುತ್ತೂರಿನ ವಿವೇಕಾನಂದ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಎಂಡೋ ಪೀಡಿತರಿಗೆ ಪರೀಕ್ಷೆ ಬರೆಯುವ ಸಂಕಷ್ಟ ಒದಗುತ್ತಿತ್ತು. ಜಿಲ್ಲಾಧಿಕಾರಿಯವರ ವಿಶೇಷ ಮುತುವರ್ಜಿಯಿಂದ ಈ ಸಮಸ್ಯೆ ನಿವಾರಣೆಯಾಗಿದೆ ಎನ್ನುತ್ತಾರೆ ಸಂಸ್ಥೆಯ ಪ್ರಮುಖರು.

  ಪರೀಕ್ಷೆಯನ್ನು ಎದುರಿಸಲು ಸಹಕರಿಸಿದಕ್ಕೆ ವಿದ್ಯಾರ್ಥಿಗಳು ರಾಮಕುಂಜೇಶ್ವರ ಕಾಲೇಜು ಪ್ರಾಂಶುಪಾಲ ಸತೀಶ್ ಭಟ್ ದೀಕ್ಷಿತಾ, ದೀಪಾ, ಮನೀಶಾ, ಕಾವ್ಯಶ್ರೀ, ಅನ್ವಿತಾ ಮತ್ತಿತರರಿಗೆ ಧನ್ಯವಾದ ಅರ್ಪಿಸಿದ್ದಾರೆ.