ಬೆಳ್ಳಾರೆ: ನಾನು ಜೊತೆಗಿದ್ದಿದ್ದರೆ ಹೀಗಾಗುತ್ತಿರಲಿಲ್ಲ-ಮೃತ ಪ್ರವೀಣ್ ಪತ್ನಿ ಕಣ್ಣೀರು

•   Wed, Jul 27 2022 08:50:37 PM



• ಬೆಳ್ಳಾರೆ, ಜು 27 (DaijiworldNews/SM): ನಾನು ನನ್ನ ಗಂಡನ ಜೊತೆಗಿದ್ದಿದ್ದರೆ, ಅವರಿಗೆ ಈ ದುಸ್ಥಿತಿ ಎದುರಾಗುತ್ತಿರಲಿಲ್ಲ ಎಂದು ಮೃತ ಪ್ರವೀಣ್ ಪತ್ನಿ ನೂತನಾ ತಮ್ಮ ಅಳಲು ತೋಡಿಕೊಂಡಿದ್ದಾರೆ. ಮಾಧ್ಯಮ ಪ್ರಶ್ನೆಗೆ ಉತ್ತರಿಸಿದ ಅವರು, ತಮ್ಮ ಮನದ ಇಂಗಿತ ವ್ಯಕ್ತಪಡಿಸಿದ್ದಾರೆ.

  ನಾವಾಯ್ತು ನಮ್ಮ ಕೆಲಸವಾಯ್ತು ಎನ್ನುವ ರೀತಿಯಲ್ಲಿರುತ್ತಿದ್ದೆವು. ಪತಿ ಪ್ರವೀಣ್ ಅವರು ಮೊದಲಿನಿಂದಲೂ ಸಂಘಟನೆಯಲ್ಲಿ ಸಕ್ರೀಯರಾಗಿದ್ದರು. ನಮ್ಮ ಮದುವೆಯ ಬಳಿಕ ಅವರಿಗೆ ಹೆಚ್ಚಿನ ಜವಾಬ್ದಾರಿ ಸಿಕ್ಕಿತ್ತು. ಪಕ್ಷದವರೆಲ್ಲರ ಜೊತೆ ಉತ್ತಮ ಸಂಬಂಧ ಹೊಂದಿದ್ದರು. ನಿತ್ಯ ನಾನು ಅವರ ಜೊತೆ ಇರುತ್ತಿದ್ದೆ. ಸಂಜೆ ಜೊತೆಯಾಗಿಯೇ ನಾವು ಅಂಗಡಿಯಿಂದ ಮನೆಗೆ ಬರುತ್ತಿದ್ದೆವು. ಆದರೆ, ಮಂಗಳವಾರದಂದು ನಾನು ಅವರ ಜೊತೆ ಇರಲಿಲ್ಲ. ಒಂದೊಮ್ಮೆ ನಾನು ಇರುತ್ತಿದ್ದರೆ, ಇಂತಹ ಘಟನೆ ಆಗುತ್ತಿರಲಿಲ್ಲ ಎಂದು ಪತ್ನಿ ಕಣ್ಣೀರು ಸುರಿಸಿದ್ದಾರೆ.

  ನಿತ್ಯ ಸಂಜೆ ಅಂಗಡಿ ಕೆಲಸ ಮುಗಿಸಿ ಮನೆಗೆ ಮರಳುತ್ತಿದ್ದೆವು. ಯಾರ ಸುದ್ದಿಗೂ ನಾವು ಹೋಗುತ್ತಿರಲಿಲ್ಲ. ಮಸೂದ್ ಕೊಲೆಯ ಬಳಿಕ ನಾವು ಎಲ್ಲಿಯೂ ಹೋಗುತ್ತಿರಲಿಲ್ಲ. ಅಂಗಡಿಯಿಂದ ನೇರ ಮನೆಗೆ ಮರಳುತ್ತಿದ್ದೆವು ಎಂದಿದ್ದಾರೆ. ಇನ್ನು ಕೊಲೆ ಪ್ರಕರಣದಲ್ಲಿ ಭಾಗಿಯಾಗಿರುವವರಿಗೆ ತಕ್ಕ ಶಿಕ್ಷೆಯಾಗಲಿ. ಹೀಗೆ ಬೇರೆಯಾರಿಗೂ ಅಗುವುದು ಬೇಡ. ಕಾನೂನಿನಲ್ಲಿ ಸೂಕ್ತ ಶಿಕ್ಷೆಯಾಗಲೇಬೇಕು ಎಂದು ಒತ್ತಾಯಿಸಿದ್ದಾರೆ.