'ಕಾಂಗ್ರೆಸ್ - ಜೆಡಿಎಸ್ ಜಗಳಕ್ಕೆ ಸಿದ್ದರಾಮಯ್ಯ ರಿಂಗ್ ಮಾಸ್ಟರ್ ' - ಸಂಸದೆ ಶೋಭಾ ಕರಂದ್ಲಾಜೆ

•   Tue, Jan 29 2019 04:45:14 PM



• ಉಡುಪಿ,ಜ 29 (MSP): ಕಾಂಗ್ರೆಸ್ ಜೆಡಿಎಸ್ ಜಗಳಕ್ಕೆ ಸಿದ್ದರಾಮಯ್ಯ ರಿಂಗ್ ಮಾಸ್ಟರ್ ಆಗಿದ್ದು ಅವರಿಗೆ ಮತ್ತೊಮ್ಮೆ ಮುಖ್ಯಮಂತ್ರಿ ಆಗುವ ಆಸೆ ಇದ್ದು, ಇದಕ್ಕಾಗಿ ಸಿಎಂ ಕುಮಾರಸ್ವಾಮಿಯ ಕಾಲೆಳೆಯುತ್ತಿದ್ದಾರೆ ಎಂದು ಸಂಸದೆ ಶೋಭಾ ಕರಂದ್ಲಾಜೆ ಕಿಡಿಕಾರಿದ್ದಾರೆ.

  

  ಉಡುಪಿಯಲ್ಲಿ ಜ.29ರ ಮಂಗಳವಾರ ಪತ್ರಕರ್ತರ ಪ್ರಶ್ನೆಗೆ ಉತ್ತರಿಸಿ ಮಾತನಾಡಿದ ಅವರು, ಏಳು ತಿಂಗಳಿನಿಂದ ಸಮ್ಮಿಶ್ರ ಸರ್ಕಾರ ತೆವಳುತ್ತಾ ಸಾಗುತ್ತಿದೆ. ರಾಜ್ಯ ಸರಕಾರ ಉರುಳಿಸಲು ಸಿದ್ದರಾಮಯ್ಯ ಒಳಗಿಂದ ಒಳಗೆ ಮಸಲತ್ತು ನಡೆಸುತ್ತಿದ್ದು, ಇದಕ್ಕಾಗಿ ತಮ್ಮ ಶಾಸಕರನ್ನು ಎತ್ತಿಕಟ್ಟುತ್ತಿದ್ದಾರೆ. ಕಾಂಗ್ರೆಸ್ ಜೆಡಿಎಸ್ ನಡುವೆ ಮಾತ್ರವಲ್ಲಿದೆ ಕಾಂಗ್ರೆಸ್ ಪಕ್ಷದ ಒಳಗೂ ಆಂತರಿಕ ಜಗಳ ನಡೆಯುತ್ತಿದೆ. ಮತ್ತೊಮ್ಮೆ ಮುಖ್ಯಮಂತ್ರಿ ಪಟ್ಟಕ್ಕೆ ಏರಬೇಕು ಎಂದು ಸಿದ್ದರಾಮಯ್ಯ ಅವರು, ಕುತಂತ್ರ ನಡೆಸುತ್ತಿದ್ದಾರೆ. ಸರ್ಕಾರ ಉರುಳಿಸುವ ಕೆಲಸ ಮಾಡುತ್ತಿರುವ ಅವರು ಬಿಜೆಪಿಯ ಮೇಲೆ ಗೂಬೆ ಕೂರಿಸುವ ಪ್ರಯತ್ನ ನಡೆಸುತ್ತಿದ್ದಾರೆ. ಇನ್ನೊಂದೆಡೆ ಇದನ್ನೇ ಬಂಡವಾಳ ಮಾಡಿ ಸಿಎಂ ಕುಮಾರಸ್ವಾಮಿ ತಮ್ಮ ಅಸಹಾಯಕತೆ ಹೊರಹಾಕಿ ಸಹಾನುಭೂತಿ ಗಿಟ್ಟಿಸುತ್ತಿದ್ದಾರೆ ಎಂದು ಸಂಸದೆ ಆರೋಪಿಸಿದ್ದಾರೆ.

  ಮಹಿಳೆಯ ಕೈಯಿಂದ ಮೈಕ್ ಕಸಿದು ಏರುದನಿಯಲ್ಲಿ ಮಾತನಾಡಿದ ಪ್ರಕರಣಕ್ಕೆ ಸಂಬಂಧಿಸಿದ ಪ್ರಶ್ನೆಗೆ ಉತ್ತರಿಸಿದ ಸಂಸದೆ, ಮಾಜಿ ಸಿಎಂ ಸಿದ್ದರಾಮಯ್ಯ ಅವರಿಗೆ ಯಾರ ಮೇಲೂ ವಿಶ್ವಾಸವಿಲ್ಲ. ಮಹಿಳೆಯರ ಬಗ್ಗೆ ಗೌರವ ಇಲ್ಲ. ಮೈಸೂರಲ್ಲಿ ಸಿದ್ದರಾಮಯ್ಯ ಸೋತ ಮೇಲೆ ಹತಾಶರಾಗಿದ್ದಾರೆ. ಹೀಗಾಗಿ ಮೈಸೂರಿಗೆ ಹೋದಾಗೆಲ್ಲ ಅವರಿಗೆ ಸಿಟ್ಟು ಬರುತ್ತದೆ, ಜಗಳ ಮಾಡ್ತಾರೆ. ಅವರಿಗೆ ಪ್ರಜಾತಂತ್ರ ವ್ಯವಸ್ಥೆ ಮೇಲೆ ಅವರಿಗೆ ವಿಶ್ವಾಸವಿಲ್ಲ ಎಂದು ಸಿದ್ದರಾಮಯ್ಯ ಅವರ ವಿರುದ್ದ ಕಿಡಿಕಾರಿದರು.

  ಇದಕ್ಕೂ ಮೊದಲು ಜಾರ್ಜ್ ಫರ್ನಾಂಡೀಸ್ ಅವರ ನಿಧನಕ್ಕೆ ಕಂಬನಿ ಮಿಡಿದ ಅವರು, ಜಾರ್ಜ್ ಫರ್ನಾಂಡೀಸ್ ಕರಾವಳಿಯ ಹೆಮ್ಮೆಯ ಪುತ್ರ. ದೇಶದಲ್ಲಿ ತುರ್ತುಪರಿಸ್ಥಿತಿ ಇದ್ದಾಗ ಜೈಲುವಾಸ ಅನುಭವಿಸಿವರು, ಚೀನಾ ಸಿಯಾಚಿನ್ ಯುದ್ಧಭೂಮಿಗೆ ಹೋದ ಸಚಿವ, ಕಾರ್ಗಿಲ್ ವಿಜಯದ ಶ್ರೇಯಸ್ಸು ವಾಜಪೇಯಿ ಹಾಗೂ ಜಾರ್ಜ್ ಫರ್ನಾಂಡೀಸ್ ಸಲ್ಲುತ್ತದೆ. ಇಂತಹ ಶ್ರೇಷ್ಟ ರಾಜಕಾರಣಿ, ಅಪ್ರತಿಮ ದೇಶಭಕ್ತನನ್ನು ನಾವು ಇಂದು ಕಳೆದುಕೊಂಡಿದ್ದೇವೆ ಎಂದು ಸಂತಾಪ ಸೂಚಿಸಿದ್ದಾರೆ.

  ಮೀನುಗಾರ ನಾಪತ್ತೆ ಪ್ರಕರಣದ ಪ್ರಶ್ನೆಗೆ ಉತ್ತರಿಸಿದ ಅವರು, ಸಾಗರದಾಳದಲ್ಲಿ ಬೋಟ್ ಪತ್ತೆಯಾಗಿದೆ ಎಂಬ ಮಾಹಿತಿ ಇದೆ. ಸರಕಾರ ಕಣ್ಮರೆಯಾದವರ ಹುಡುಕಾಟದಲ್ಲಿದೆ ಎಂದು ಉತ್ತರಿಸಿದ್ದಾರೆ.