ಕುಂದಾಪುರ: ಹುಣ್ಸೆಮಕ್ಕಿಯಲ್ಲಿ ಚಿರತೆ ದಾಳಿ - ಮಹಿಳೆ ಗಂಭೀರ

•   Mon, Mar 04 2019 12:57:30 PM



• ಕುಂದಾಪುರ,ಮಾ 04(MSP): ಅಂಗಡಿಗೆ ಹಾಲು ಕೊಡಲೆಂದು ತೆರಳಿದ್ದ ಯುವತಿಯ ಮೇಲೆ ಚಿರತೆಯೊಂದು ದಾಳಿ ನಡೆಸಿದ್ದ ಪರಿಣಾಮ ಯುವತಿ ಗಂಭೀರ ಗಾಯಗೊಂಡ ಘಟನೆ ಕುಂದಾಪುರ ತಾಲೂಕಿನ ಹುಣ್ಸೆಮಕ್ಕಿ ಎಂಬಲ್ಲಿ ಮಾ.4ರ ಸೋಮವಾರ ಬೆಳಿಗ್ಗೆ ನಡೆದಿದೆ. ಗಂಭೀರ ಗಾಯಗೊಂಡ ಯುವತಿಯನ್ನು ಹುಣ್ಸೆಕಟ್ಟೆ ನಿವಾಸಿ ಪ್ರೇಮ(32) ಎಂದು ಗುರುತಿಸಲಾಗಿದೆ. 

  

  

  ಪ್ರೇಮ ಪ್ರತಿದಿನದಂತೆ ಸೋಮವಾರ ಬೆಳ್ಳಂಬೆಳಗ್ಗೆ ಹುಣ್ಸೆಮಕ್ಕಿಯಲ್ಲಿರುವ ಹಾಲು ಸೊಸೈಟಿಗೆ ಹಾಲು ಕೊಡಲೆಂದು ತೆರಳಿದ್ದ ಸಂದರ್ಭ ಚಿರತೆ ದಾಳಿ ನಡೆಸಿದೆ ಎನ್ನಲಾಗಿದ್ದು, ಪ್ರೇಮ ಅವರ ಮುಖ ಹಾಗೂ ಕುತ್ತಿಗೆಗೆ ಗಂಭೀರ ಗಾಯಗಳಾಗಿವೆ. ತಕ್ಷಣ ಅವರನ್ನು ಸ್ಥಳೀಯರು ಕುಂದಾಪುರದ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿದ್ದು ಪ್ರಥಮ ಚಿಕಿತ್ಸೆಯ ಬಳಿಕ ಉಡುಪಿಗೆ ಕೊಂಡೊಯ್ಯಲಾಗಿದೆ.

  ಇತ್ತೀಚಿನ ದಿನಗಳಲ್ಲಿ ಆಲೂರು, ಆಜ್ರಿ, ಹಳ್ಳಿಹೊಳೆ, ಹುಣ್ಸೆಮಕ್ಕಿ, ಶಂಕರನಾರಾಯಣ ಭಾಗಗಳಲ್ಲಿ ಚಿರತೆ ಹಾವಳಿ ಹೆಚ್ಚುತ್ತಿದ್ದು, ಆಜ್ರಿಯಲ್ಲಿ ವಾರದ ಹಿಂದಷ್ಟೆ ಮಹಿಳೆಯೊಬ್ಬರಿಗೆ ಚಿರತೆ ದಾಳಿ ಮಾಡಿತ್ತು. ಈ ಬಗ್ಗೆ ಸಂಬಂಧಪಟ್ಟ ಅರಣ್ಯ ಇಲಾಖಾಧಿಕಾರಿಗಳಿಗೆ ಹಲವು ಬಾರಿ ದೂರು ನೀಡಲಾಗಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ. ಇನ್ನಾದರೂ ಸಂಬಂಧಪಟ್ಟವರು ಎಚ್ಚೆತ್ತುಕೊಳ್ಳಲಿ ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.