ಮಾ.14 ರಂದು ಕಾಸರಗೋಡಿಗೆ ರಾಹುಲ್ ಗಾಂಧಿ - ಹತ್ಯೆಯಾದ ಯುವ ಕಾಂಗ್ರೆಸ್ ಕಾರ್ಯಕರ್ತರ ಮನೆಗೆ ಭೇಟಿ

•   Wed, Mar 13 2019 05:26:46 PM



• ಕಾಸರಗೋಡು, ಮಾ 13(MSP): ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಮಾ.14 ರ ಗುರುವಾರ  ಕಾಸರಗೋಡಿಗೆ ಆಗಮಿಸಲಿದ್ದು, ಇತ್ತೀಚಿಗೆ ಕೊಲೆಗೀಡಾದ ಯುವ ಕಾಂಗ್ರೆಸ್ ಕಾರ್ಯಕರ್ತರಾದ ಪೆರಿಯದ ಕೃಪೇಶ್ ಮತ್ತು ಶರತ್ ಲಾಲ್ ರವರ ಮನೆಗೆ ಭೇಟಿ ನೀಡಲಿದ್ದಾರೆ.

  

  
  ಗುರುವಾರ  ಮಧ್ಯಾಹ್ನ 1.30 ಕ್ಕೆ ಕಣ್ಣೂರು ವಿಮಾನ ನಿಲ್ದಾಣಕ್ಕೆ ತಲುಪಲಿರುವ ಅವರು ಅಲ್ಲಿಂದ ಹೆಲಿಕಾಪ್ಟರ್ ನಲ್ಲಿ ಪೆರಿಯ ಕೇಂದ್ರ ವಿದ್ಯಾಲಯದ ಹೆಲಿಪ್ಯಾಡ್ ನಲ್ಲಿ ಬಂದಿಳಿಯಲಿದ್ದು , ನಂತರ ಕಾರು ಮೂಲಕ ಪೆರಿಯ ಕಲ್ಯೊಟ್ ಗೆ ತೆರಳಲಿದ್ದು ಕೃಪೇಶ್ ಮತ್ತು ಶರತ್ ಲಾಲ್ ರ ಮನೆಯವರನ್ನು ಭೇಟಿಯಾಗಿ ಅವರ ನೋವಿಗೆ ಸ್ಪಂದಿಸಲಿದ್ದಾರೆ.

  ರಾಹುಲ್ ಗಾಂಧಿ ಭೇಟಿ ಹಿನ್ನಲೆಯಲ್ಲಿ ಬಂದೋ ಬಸ್ತ್ ಏರ್ಪಡಿಸಲಾಗಿದ್ದು , ಎಸ್ ಪಿ ಜಿ ತಂಡವು ಪೆರಿಯ ಕಲ್ಯೊಟ್ ಗೆ ಆಗಮಿಸಿ ಭದ್ರತೆ ಕುರಿತು ಅವಲೋಕನ ನಡೆಸಿದೆ. ರಾಹುಲ್ ಗಾಂಧಿ ಹಾದು ಹೋಗುವ ರಸ್ತೆ , ಕೃಪೇಶ್ ಮತ್ತು ಶರತ್ ಲಾಲ್ ರ ಮನೆ ಹಾಗೂ ಪರಿಸರ ದಲ್ಲಿ ಎಸ್ ಪಿ ಜಿ ವಿಶೇಷ ನಿಗಾ ಇರಿಸಿದೆ. ಬಳಿಕ ಕಣ್ಣೂರಿಗೆ ತೆರಳಲಿರುವ ರಾಹುಲ್ ಗಾಂಧಿ ಕಳೆದ ಆಗಸ್ಟ್ ನಲ್ಲಿ ಕಣ್ಣೂರಿನ ಮಟ್ಟನ್ನೂರಿನಲ್ಲಿ ಕೊಲೆಗೀಡಾದ ಶುಹೈಬ್ ರ ಕುಟುಂಬಸ್ಥರನ್ನು ಭೇಟಿ ಮಾಡಲಿದ್ದಾರೆ. ಎರಡು ದಿನಗಳ ಭೇಟಿಗಾಗಿ ಇಂದು ಕೇರಳಕ್ಕೆ ಆಗಮಿಸಿರುವ ರಾಹುಲ್ ಗಾಂಧಿ ಹಲವು ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ.