ಮಂಗಳೂರು: ಜೆಪ್ಪು ಸಂ. ಅಂತೋನಿ ಆಶ್ರಮದ ವಾರ್ಷಿಕ ಹಬ್ಬ, ಶತಮಾನೋತ್ತರ ಬೆಳ್ಳಿ ಹಬ್ಬದ ಸಮಾರೋಪ

•   Tue, Jun 13 2023 10:45:45 PM



• ಮಂಗಳೂರು, ಜೂ. 13 (DaijiworldNews/SM): ಮಂಗಳೂರಿನ ಜಪ್ಪು ಸಂತ ಅಂತೋನಿ ಆಶ್ರಮದ ವಾರ್ಷಿಕ ಹಬ್ಬ ಮತ್ತು ಶತಮಾನೋತ್ತರ ಬೆಳ್ಳಿ ಹಬ್ಬ ಆಚರಣೆಯ ಸಮಾರೋಪ ಮಂಗಳವಾರ ನಡೆಯಿತು. ಇದರ ಅಂಗವಾಗಿ ಸಂಜೆ 6 ಗಂಟೆಗೆ ಸಂಭ್ರಮದ ಬಲಿ ಪೂಜೆಯನ್ನು ಮಂಗಳೂರಿನ ಬಿಷಪ್ ರೈ.ರೆ. ಪೀಟರ್ ಪಾವ್ಲ್ ಸಲ್ದಾನ್ಹಾ ಅವರು ಮಿಲಾಗ್ರಿಸ್ ಚರ್ಚ್ ನಲ್ಲಿ ನಡೆಸಿ ಕೊಟ್ಟರು.

  ವಿಕಾರ್ ಜನರಲ್ ಮೊ. ಮ್ಯಾಕ್ಸಿಮ್ ಎಲ್. ನೋರೋನ್ಹಾ, ಸಂತ ಅಂತೋನಿ ಆಶ್ರಮದ ನಿರ್ದೇಶಕ ಫಾ. ಜೆ. ಬಿ. ಕ್ರಾಸ್ತಾ, ಮಿಲಾಗ್ರಿಸ್ ಚರ್ಚ್ ನ ಪ್ರಧಾನ ಗುರು ಫಾ. ಬೊನವೆಂಚರ್ ನಜರೆತ್ ಮತ್ತು ಮಂಗಳೂರು ನಗರ ಸುತ್ತಮುತ್ತಲ ವಿವಿಧ ಚರ್ಚ್ ಗಳ ಧರ್ಮಗುರುಗಳು ಉಪಸ್ಥಿತರಿದ್ದರು. ಬಲಿ ಪೂಜೆ ಸಂದರ್ಭದಲ್ಲಿ ಪ್ರವಚನ ನೀಡಿದ ಬಿಷಪ್ ವಂ. ಡಾ. ಪೀಟರ್ ಪಾವ್ಲ್ ಸಲ್ದಾನ್ಹಾ ಅವರು, ಸಂತ ಅಂತೋನಿ ಅವರದು ಆಕರ್ಷಕ ವ್ಯಕ್ತಿತ್ವ. ಅವರ ಪವಿತ್ರ ಸ್ಮರಣಿಕೆಯು ಅವರ ಸಮಗ್ರ ಬದುಕಿನ ಪ್ರತಿಬಿಂಬ. ಅವರು ಮರಣ ಹೊಂದಿ ಹಲವು ವರ್ಷ ಕಳೆದರೂ ಇಂದಿಗೂ ಅವರನ್ನು ಸ್ಮರಿಸುತ್ತಾರೆ. ಅವರಲ್ಲಿ ಪ್ರಾರ್ಥಿಸುವ ಮೂಲಕ ದೇವರ ಸಾಮಿಪ್ಯ ಪಡೆಯುತ್ತಾರೆ. ಅವರ ಬದುಕು ನಮಗೆಲ್ಲರಿಗೂ ಆದರ್ಶ ಹಾಗೂ ಪ್ರೇರಣೆಯಾಗಿದೆ. ಮಂಗಳೂರಿನಲ್ಲಿ 125 ವರ್ಷಗಳ ಹಿಂದೆ ಆರಂಭವಾದ ಸಂತ ಅಂತೋನಿ ಅವರ ಭಕ್ತಿಯ ಆಚರಣೆ ನೂರಾರು ಜನರ ಉತ್ತಮ ಬದುಕಿಗೆ ಸಹಾಯಕ ವಾಗಿದೆ. ದೇವರ ವಾಕ್ಯದ ಪ್ರಕಾರ ಜೀವಿಸಿದರೆ ಶಕ್ತಿಯುತರಾಗ ಬಹುದೆಂಬುದಕ್ಕೆ ಸಂತ ಅಂತೋನಿ ಅವರು ಸಾಕ್ಷಿ ಎಂದರು.

  ಸಂತ ಅಂತೋನಿ ಆಶ್ರಮದ ನಿರ್ದೇಶಕ ಫಾ. ಜೆ. ಬಿ. ಕ್ರಾಸ್ತಾ ಅವರು ವಂದನಾರ್ಪಣೆ ಸಲ್ಲಿಸಿದರು. ಆಶ್ರಮದ 125 ನೇ ವರ್ಷಾಚರಣೆ ಅಂಗವಾಗಿ 12 ತಿಂಗಳು ಕಾಲ ವಿವಿಧ ಕಾರ್ಯಕ್ರಮಗಳು ಜರಗಿದ್ದು, ಇಂದು ಇವೆಲ್ಲವುಗಳ ಸಮಾರೋಪದ ಪ್ರಯುಕ್ತ ಶತಮಾನೋತ್ತರ ಬೆಳ್ಳಿ ಹಬ್ಬದ ಲಾಂಚನಕ್ಕೆ ಬೆಳಗಿಸಿದ್ದ ದೀಪಗಳನ್ನು ಆರಿಸಲಾಯಿತು. ಹಬ್ಬದ ಪ್ರಯುಕ್ತ ಇಂದು ಬೆಳಗ್ಗೆ 6 ಗಂಟೆಗೆ ವಿಕಾರ್ ಜನರಲ್ ಮೊ. ಮ್ಯಾಕ್ಸಿಮ್ ಎಲ್. ನೋರೋನ್ಹಾ ಅವರು ಜಪ್ಪು ಆಶ್ರಮದಲ್ಲಿ ಬಲಿಪೂಜೆ ಮತ್ತು ಆರಾಧನೆ, 8.15 ಕ್ಕೆ ಎಪಿಸ್ಕೋಪಲ್ ವಲಯ ಮುಖ್ಯಸ್ಥ ಫಾ. ವಿನ್ಸೆಂಟ್ ಮೊಂತೇರೊ ಅವರಿಂದ ಮಿಲಾಗ್ರಿಸ್ ಚರ್ಚ್ ನಲ್ಲಿ ಬಲಿ ಪೂಜೆ, 11 ಗಂಟೆಗೆ ಬರೇಲಿ ಧರ್ಮ ಪ್ರಾಂತ್ಯದ ಬಿಷಪ್ ವಂ. ಫಾ. ಇಗ್ನೇಷಿಯಸ್ ಡಿ ಸೋಜಾ ಅವರು ಜಪ್ಪು ಆಶ್ರಮದಲ್ಲಿ ಬಲಿ ಪೂಜೆ ನೇವೇರಿಸಿದರು. ಮಧ್ಯಾಹ್ನ 12.30 ಗಂಟೆಗೆ ಸಹ ಮಿಲನ ಕಾರ್ಯಕ್ರಮ ನಡೆಯಿತು.