ಮಂಗಳೂರು:ಬಿಜೆಪಿಯ ಜಾತಿ ರಾಜಕಾರಣ ದೇಶಕ್ಕೆ ಮಾರಕ-ಶಾಸಕ ಹಾರೀಸ್

•   Sat, Apr 06 2019 08:59:51 PM



• ಮಂಗಳೂರು,ಏ06(AZM):ಬಿಜೆಪಿಯ ಜಾತಿ ರಾಜಕಾರಣ ದೇಶಕ್ಕೆ ಮಾರಕವಾಗಿದ್ದು, ಕಳೆದ ಐದು ವರ್ಷದಲ್ಲಿ ಕೇಂದ್ರ ಬಿಜೆಪಿ ಸರಕಾರದ ಸಾಧನೆ ಶೂನ್ಯ ಎಂದು ಬೆಂಗಳೂರಿನ ಶಾಸಕ ಎನ್.ಎ. ಹಾರಿಸ್ ತಿಳಿಸಿದ್ದಾರೆ.

  

  ಇಂದು ಮಂಗಳೂರಿಗೆ ಮಿಥುನ್ ರೈ ಪರ ಚುನಾವಣಾ ಪ್ರಚಾರಕ್ಕೆ ಬಂದ ಅವರು ಸುದ್ಧಿಗಾರರೊಂದಿಗೆ ಈ ಕುರಿತು ಮಾತನಾಡಿದರು. ಮೋದಿ ಸರಕಾರದ ರಫೇಲ್ ಹಗರಣದ ಬಗ್ಗೆ ಪಕ್ಷದ ಅಧ್ಯಕ್ಷ ರಾಹುಲ್ ಗಾಂಧಿಯವರು ‘ಚೌಕಿದಾರ್ ಚೋರ್ ಹೈ’ ಎಂದು ನೇರವಾಗಿ ಹೇಳಿದ್ದಾರೆ. ಪ್ರಧಾನಿ ಚೋರ್ ಅಲ್ಲದಿದ್ದರೆ ಸಿಬಿಐ ಅಧಿಕಾರಿಯನ್ನು ಯಾಕೆ ರಾತ್ರೋರಾತ್ರಿ ವರ್ಗಾವಣೆ ಮಾಡುತ್ತೀರಿ. ಕೋರ್ಟ್ ಅವರನ್ನು ಮತ್ತೇ ಅದೆ ಜಾಗಕ್ಕೆ ಕಳುಹಿಸಿದರೆ ಬಿಜೆಪಿ ಮತ್ತೆ ಬೇರೆ ಕಡೆಗೆ ವರ್ಗಾಯಿಸುತ್ತದೆ. ಫೈಲ್ ಕಳೆದು ಹೋಗಿದೆ ಎಂದು ಕೀಳು ರಾಜಕೀಯ ಮಾಡುತ್ತಿದ್ದಾರೆ ಎಂದು ಕೇಂದ್ರ ಸರಕಾರದ ವಿರುದ್ಧ ಅವರು ಆಕ್ರೋಶ ವ್ಯಕ್ತಪಡಿಸಿದರು.

  ಬಿಜೆಪಿ ಸರಕಾರ ಬಂದರೆ ಸಾಮಾನ್ಯವಾಗಿ ಎಲ್ಲಾ ಆಹಾರ ಪದಾರ್ಥಗಳ ಬೆಲೆ ಇಳಿಸುತ್ತೇವೆ ಎಂದಿದ್ದರು. ಆದರೆ ಈಗ ಕೇಂದ್ರದಲ್ಲಿ ಬಿಜೆಪಿ ಸರಕಾರವೇ ಇದೆ. ಆದರೆ ಯಾವ ಪದಾರ್ಥಗಳ ಬೆಲೆ ಇಳಿಸಿದ್ದಾರೆ ಎಂದು ಕೇಂದ್ರದ ಆಡಳಿತ ವೈಖರಿಯನ್ನು ಟೀಕಿಸಿದರು.

  ಕೇಂದ್ರದ ಬಿಜೆಪಿ ಸರಕಾರ ಯೋಜನೆಗಳನ್ನು ಅನುಷ್ಠಾನಗೊಳಿಸುವಲ್ಲಿ ವಿಫಲವಾಗಿದೆ. ರೈತ ಕಷ್ಟವನ್ನು ತಾಳದೇ ರಾಜ್ಯ ಸರಕಾರ 75 ಸಾವಿರ ಕೋಟಿ ರೂ. ಸಾಲಮನ್ನಾ ಮಾಡಿತು. ಆದರೆ ಕೇಂದ್ರ ಸರಕಾರ ಯಾವ ರೈತನ ಸಾಲವನ್ನೂ ಮನ್ನಾ ಮಾಡಲಿಲ್ಲ. ಅಧಿಕಾರಕ್ಕಾಗಿ ಆಮಿಷಗಳನ್ನು ಒಡ್ಡುತ್ತಿದ್ದಾರೆ. ಭರವಸೆಗಳು ಕೇವಲ ಭರವಸೆಯಾಗಿಯೇ ಉಳಿದಿವೆ ಎಂದು ದೂರಿದರು