ಮಂಗಳೂರು KSRTC: ದಸರಾಗೆ ನಾಲ್ಕು ಟೂರ್ ಪ್ಯಾಕೇಜ್‌ - ಯಾವಾಗಿನಿಂದ ? ಎಷ್ಟು ದರ?

•   Wed, Oct 04 2023 04:11:56 PM



• ಮಂಗಳೂರು, ಅ 04 (DaijiworldNews/MS): ನವರಾತ್ರಿ ಸಂಭ್ರಮದ ಸಿದ್ಧತೆ ಈಗಿನಿಂದಲೇ ಆರಂಭವಾಗಿದ್ದು ಈ ಹಬ್ಬದ ಸಂದರ್ಭದಲ್ಲಿ ದೇಗುಲ ದರ್ಶನಕ್ಕೂ ಸಾಕಷ್ಟು ಮಂದಿ ತಯಾರಿ ನಡೆಸುತ್ತಿದ್ದಾರೆ. ಹೀಗಾಗಿ, ಜನರ ಅನುಕೂಲಕ್ಕೆ ತಕ್ಕಂತೆ ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗ ಟೂರ್ ಪ್ಯಾಕೇಜ್ ಘೋಷಿಸಿದೆ.

  ಕಳೆದ ವರ್ಷವೂ ಕೆಎಸ್‌ಆರ್‌ಟಿಸಿ ಆಯೋಜಿಸಿದ್ದ ದಸರಾ ಟೂರ್ ಪ್ಯಾಕೇಜ್ ಗೆ ಉತ್ತಮ ಸ್ಪಂದನೆ ವ್ಯಕ್ತವಾಗಿದ್ದು, ಇದರಿಂದ ಸ್ಪೂರ್ತಿ ಪಡೆದು ಈ ಬಾರಿ ಮಂಗಳೂರು ಮತ್ತು ಸುತ್ತಮುತ್ತಲಿನ ದೇವಸ್ಥಾನಗಳಿಗೆ ತನ್ನ ಪ್ರವಾಸವನ್ನು ವಿಸ್ತರಿಸಿದೆ.

  ದಸರಾ ದರ್ಶನ ಪ್ಯಾಕೇಜ್‌ ಕುರಿತು ಪತ್ರಿಕಾಗೋಷ್ಟಿ ನಡೆಸಿ ಮಾತನಾಡಿದ ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗೀಯ ನಿಯಂತ್ರಣಾಧಿಕಾರಿ ರಾಜೇಶ್ ಶೆಟ್ಟಿ "ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗದ ದಸರಾ ದರ್ಶನ ಪ್ಯಾಕೇಜ್‌ಗೆ ಪ್ರವಾಸಿಗರು ಮತ್ತು ಸ್ಥಳೀಯರು ಸಕಾರಾತ್ಮಕವಾಗಿ ಸ್ಪಂದಿಸಿದ ಹಿನ್ನೆಲೆಯಲ್ಲಿ ಮಂಗಳೂರು ಮತ್ತು ಸುತ್ತಮುತ್ತಲಿನ ದೇವಸ್ಥಾನಗಳಿಗೆ ಹಬ್ಬದ ಸಂದರ್ಭದಲ್ಲಿ ಅಕ್ಟೋಬರ್ 15 ರಿಂದ ದಸರಾ ದರ್ಶನ ಪ್ಯಾಕೇಜ್ ಆರಂಭವಾಗಲಿದೆ" ಎಂದು ತಿಳಿಸಿದ್ದಾರೆ.

  "ಕಳೆದ ವರ್ಷ ಮುಂಬೈ ನಗರ ಹಾಗೂ ಹೊರ ರಾಜ್ಯ ಮತ್ತು ಜಿಲ್ಲೆಯ ಜನರು ಕೆಎಸ್‌ಆರ್‌ಟಿಸಿ ಆರಂಭಿಸಿದ್ದ ದಸರಾ ದರ್ಶನ ಪ್ಯಾಕೇಜ್ ಉತ್ತಮವಾಗಿ ಬಳಸಿಕೊಂಡಿದ್ದಾರೆ. ಈ ವರ್ಷವೂ ದಸರಾ ದರ್ಶನ ಪ್ಯಾಕೇಜ್ ಅನ್ನು ಮರುಪ್ರಾರಂಭಿಸಲು ನಮಗೆ ಕರೆಗಳು ಬರುತ್ತಿವೆ. KSRTC ಮಂಗಳೂರು ವಿಭಾಗವು ಅಕ್ಟೋಬರ್ 15 ರಿಂದ ಅಕ್ಟೋಬರ್ 24 ರವರೆಗೆ ದಸರಾ ದರ್ಶನ ಪ್ಯಾಕೇಜ್ ಅನ್ನು ಪ್ರಾರಂಭಿಸಲಿದೆ, ಉತ್ತಮ ಪ್ರತಿಕ್ರಿಯೆ ಬಂದರೆ ಪ್ಯಾಕೇಜ್ ಅನ್ನು ಅಕ್ಟೋಬರ್ 30 ರವರೆಗೆ ವಿಸ್ತರಿಸುವ ಯೋಜನೆ ಇದೆ ಎಂದು ಹೇಳಿದ್ದಾರೆ.

  ನಾಲ್ಕು ದಸರಾ ದರ್ಶನ ಪ್ಯಾಕೇಜ್‌:

  KSRTC ಮಂಗಳೂರು ವಿಭಾಗದಿಂದ ದಸರಾ ದರ್ಶನ ಪ್ಯಾಕೇಜ್‌ನಲ್ಲಿ ಒಂದು ದಿನದ ಪೂರ್ತಿ ವಿವಿಧ ದೇವಸ್ಥಾನಗಳ ದರ್ಶನ ಮಾಡಬಹುದಾಗಿದೆ. ಈ ಬಾರಿ ನಾಲ್ಕು ಪ್ಯಾಕೇಜ್‌ಗಳಿವೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ದಸರಾ ದರ್ಶನ ಪ್ಯಾಕೇಜ್ ಬೆಲೆಯಲ್ಲಿಯೂ ಏರಿಕೆಯಾಗಿದೆ.

  ಪ್ಯಾಕೇಜ್ 1: ಮಂಗಳೂರು ದಸರಾ ದರ್ಶನ 

  ವಯಸ್ಕರಿಗೆ ರೂ 400 (ನಾನ್ ಎಸಿ) , ರೂ 500 (ಎಸಿ) , 6-12 ವರ್ಷ ವಯಸ್ಸಿನ ಮಕ್ಕಳಿಗೆ ರೂ 300 (ನಾನ್ ಎಸಿ) ಮತ್ತು ರೂ 400 (ಎಸಿ)

  ಮಂಗಳದೇವಿ ದೇವಸ್ಥಾನ, ಪೊಳಲಿ ದೇವಸ್ಥಾನ, ಸುಂಕದಕಟ್ಟೆ ಶ್ರೀ ಅಂಬಿಕಾ ಅನ್ನಪೂರ್ಣೇಶ್ವರಿ ದೇವಸ್ಥಾನ, ಶ್ರೀ ಕಟೀಲು ದೇವಸ್ಥಾನ, ಬಪ್ಪನಾಡು ದೇವಸ್ಥಾನ (ಊಟ), ಸಸಿಹಿತ್ಲು ದೇವಸ್ಥಾನ ಮತ್ತು ಬೀಚ್, ಚಿತ್ರಾಪುರ ದೇವಸ್ಥಾನ, ಉರ್ವ ದೇವಸ್ಥಾನ (ಸಂಜೆ ತಿಂಡಿ) ಮತ್ತು ಕುದ್ರೋಳಿ ದೇವಸ್ಥಾನ.

  ಪ್ಯಾಕೇಜ್ 2: ಮಂಗಳೂರು - ಕೊಲ್ಲೂರು ಪ್ರವಾಸ ಪ್ಯಾಕೇಜ್ 

  ರೂ. 500 (ವಯಸ್ಕರಿಗೆ) ರೂ. 400 (ಮಕ್ಕಳಿಗೆ)

  ಮಾರನಕಟ್ಟೆ ಮಹಾಲಿಂಗೇಶ್ವರ ದೇವಸ್ಥಾನ, ಕೊಲ್ಲೂರು ದೇವಸ್ಥಾನ, ಕಮಲಶೀಲೆ ಶ್ರೀ ದುರ್ಗಾ ಪರಮೇಶ್ವರಿ ದೇವಸ್ಥಾನ (ಊಟ), ಉಡುಪಿ ಉಚ್ಚಿಲ ಮಹಾಲಕ್ಷ್ಮಿ ದೇವಸ್ಥಾನ

  ಪ್ಯಾಕೇಜ್ 3: ಮಂಗಳೂರು - ಮಡಿಕೇರಿ ಪ್ರವಾಸ ಪ್ಯಾಕೇಜ್
  ರೂ 500 (ವಯಸ್ಕರು) ರೂ 400 (ಮಕ್ಕಳು)

  ಮಂಗಳೂರು - ಮಡಿಕೇರಿ, ಮಡಿಕೇರಿ ರಾಜ ಸ್ಥಾನ, ಅಭಿ ಜಲಪಾತ, ನಿಸರ್ಗಧಾಮ, ಗೋಲ್ಡನ್ ಟೆಂಪಲ್ ಮತ್ತು ಹಾರಂಗಿ ಅಣೆಕಟ್ಟು.

  ಈ ಬಾರಿಯ ಹೊಸ ಪ್ಯಾಕೇಜ್ 4: ಪಂಚದುರ್ಗ ದರ್ಶನ ಪ್ರವಾಸ ಪ್ಯಾಕೇಜ್ (ದರ ಇನ್ನೂ ನಿರ್ಧರಿಸಲಾಗಿಲ್ಲ)

  ತಲಪಾಡಿ, ಚಿತ್ರಾಪುರ, ಮುಲ್ಕಿ, ಕಟೀಲು ಮತ್ತು ಮುಂಡ್ಕೂರಿನ ದುರ್ಗಾ ಪರಮೇಶ್ವರಿ ದೇವಸ್ಥಾನ.

  ಮಂಗಳೂರು-ಮಡಿಕೇರಿ ಪ್ಯಾಕೇಜ್ ಹೊರತುಪಡಿಸಿ ಮೂರು ಪ್ಯಾಕೇಜ್‌ಗಳಲ್ಲಿ ಉಚಿತ ಮಧ್ಯಾಹ್ನ ಮತ್ತು ಸಂಜೆ ತಿಂಡಿಗಳನ್ನು ಒದಗಿಸಲಾಗುವುದು.

  ಮುಂದಿನ ವಾರದಿಂದ ಆನ್‌ಲೈನ್ ಮೂಲಕ ಮುಂಗಡ ಬುಕ್ಕಿಂಗ್ ಆರಂಭವಾಗಲಿದೆ.