ಮಂಗಳೂರು: ಬಲಿ ಪಡೆದ ಮೊದಲ ಮಳೆ - ಸ್ಕೂಟರ್ ಸವಾರ ಸಾವು

•   Mon, May 20 2019 01:18:05 PM



• ಉಳ್ಳಾಲ, ಮೇ 20 (Daijiworld News/MSP): ಸ್ಕೂಟರ್ ಅಪಘಾತಕ್ಕೀಡಾಗಿ ಕಾಂಗ್ರೆಸ್ ಕಾರ್ಯಕರ್ತ ಸಾವನ್ನಪ್ಪಿರುವ ಘಟನೆ ಕೋಟೆಕಾರು ಸಮೀಪದ ಪಾನೀರು ಬಳಿ ಭಾನುವಾರ ತಡರಾತ್ರಿ ವೇಳೆ ನಡೆದಿದೆ. ಮೊದಲ ಮಳೆಯಿಂದಾಗಿ ರಸ್ತೆಯಲ್ಲಿ ವಾಹನ ಜಾರಿ ಅಪಘಾತ ಸಂಭವಿಸಿದೆ.

  

  ಕೋಟೆಕಾರು ನಡಾರು ಸಾಯಿನಗರ ನಿವಾಸಿ ಪುಷ್ಪರಾಜ್ (45) ಸಾವನ್ನಪ್ಪಿದವರು. ರಿಕ್ಷಾ ಚಾಲಕರಾಗಿದ್ದ ಇವರು ಭಾನುವಾರ ದೇರಳಕಟ್ಟೆಯ ಫಾದರ್ ಮುಲ್ಲರ್ಸ್ ಆಸ್ಪತ್ರೆಯ ಆವರಣದಲ್ಲಿ ಬೆಂಕಿ ಬಿದ್ದಿರುವುದನ್ನು ನಂದಿಸಲು ಅಗ್ನಿ ಶಾಮಕ ದಳದ ಜತೆಗೆ ಸಹಕರಿಸಿದ್ದರು. ಬೆಂಕಿ ನಂದಿಸಿದ ಬಳಿಕ ಇವರ ಜತೆಗಿದ್ದ ಗೆಳೆಯನನ್ನು ಕೋಟೆಕಾರು ಕಡೆಗೆ ಸ್ಕೂಟರಿನಲ್ಲಿ ಬಿಟ್ಟು ಮನೆಗೆ ವಾಪಸ್ಸಾಗುವಾಗ ಘಟನೆ ಸಂಭವಿಸಿದೆ. ಮೊದಲ ಮಳೆಯಿಂದಾಗಿ ರಸ್ತೆಯಲ್ಲಿ ನೀರು ಹರಿದು ಸ್ಕೂಟರ್ ಸ್ಕಿಡ್ ಆಗಿ ಅಪಘಾತ ಸಂಭವಿಸಿದೆ. ರಸ್ತೆಗೆ ಉರುಳಿದ್ದ ಪುಷ್ಪರಾಜ್ ಅವರಿಗೆ ತಲೆಗೆ ಗಂಭೀರವಾಗಿ ಗಾಯಗೊಂಡು ಸಾವನ್ನಪ್ಪಿದ್ದಾರೆ. ಮಂಗಳೂರು ದಕ್ಷಿಣ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮೃತರು ಪತ್ನಿ ಹಾಗೂ ಶಾಲೆ ಕಲಿಯುತ್ತಿರುವ ಇಬ್ಬರು ಮಕ್ಕಳನ್ನು ಅಗಲಿದ್ದಾರೆ.