ನಕ್ಸಲರ ಅಟ್ಟಹಾಸ - ಐಇಡಿ ಸ್ಫೋಟಗೊಂಡು 11 ಭದ್ರತಾ ಸಿಬ್ಬಂದಿಗಳು ಗಂಭೀರ - ರಾಂಚಿಗೆ ಏರ್‌ಲಿಫ್ಟ್

•   Tue, May 28 2019 10:23:30 AM



• ಜಾರ್ಖಂಡ್‌ , ಮೇ 28 (Daijiworld News/MSP): ಜಾರ್ಖಂಡ್‌ನಲ್ಲಿ ನಕ್ಸಲರು ಸುಧಾರಿತ ಬಾಂಬ್ ಸ್ಫೋಟಗೊಳಿಸಿದ ಕಾರಣ 11 ಮಂದಿ ಸಿಬ್ಬಂದಿ ಗಾಯಗೊಂಡಿದ್ದಾರೆ. ಮಂಗಳವಾರ ಬೆಳಗಿನ ಜಾವ 4.43 ರ ವೇಳೆಗೆ ಸರಾಯ್‌ಕೆಲ್ಲಾದ ಕುಛಾಯ್‌ ಪ್ರದೇಶದಲ್ಲಿ ನಕ್ಸಲರು ಐಇಡಿ ಸ್ಫೋಟಗೊಳಿಸಿದ ಪರಿಣಾಮ ಭದ್ರತಾ ಸಿಬ್ಬಂದಿಗಳು ಗಾಯಗೊಂಡಿದ್ದಾರೆ.

  

  ನಕ್ಸಲರ ವಿರುದ್ದ ಭದ್ರತಾಪಡೆಯ 209 ಕೋಬ್ರಾ ಪಡೆ ಮತ್ತು ಜಾರ್ಖಂಡ್​ ಪೊಲೀಸರು ಜಂಟಿಯಾಗಿ ಮಂಗಳವಾರ ಮುಂಜಾನೆ ವಿಶೇಷ ಕಾರ್ಯಾಚರಣೆಗೆ ಇಳಿದಿದ್ದರು. ಹೀಗಾಗಿ ಭದ್ರತಾಪಡೆ ಬೆಳಗಿನ ಜಾವ 4.53ರಲ್ಲಿ ಸರಾಯ್‌ಕೆಲ್ಲಾ ಎಂಬ ಪ್ರದೇಶಕ್ಕೆ ತಲುಪಿದಾಗ ನಕ್ಸಲರು ನೆಲದಲ್ಲಿ ಅಡಗಿಸಿಟ್ಟಿದ್ದ ಸುಧಾರಿತ ಬಾಂಬ್ ಸಿಡಿಸಿದ್ದಾರೆ.

  ಗಾಯಗೊಂಡ ಭದ್ರತಾ ಸಿಬಂದಿಗಳ ಪೈಕಿ 8 ಮಂದಿ ವಿಶೇಷ ಕಾರ್ಯಾಚರಣೆ 209 ಕೋಬ್ರಾ ಪಡೆಯವರು, ಮತ್ತು ಮೂರು ಮಂದಿ ಜಾರ್ಖಂಡ್‌ ಪೊಲೀಸರು ಎಂದು ತಿಳಿದು ಬಂದಿದೆ. ಗಾಯಾಳುಗಳನ್ನು ರಾಂಚಿಗೆ ಏರ್‌ಲಿಫ್ಟ್ ಮಾಡಲಾಗಿದೆ. ಎಲ್ಲಾ ಗಾಯಾಳುಗಳ ಸ್ಥಿತಿ ಗಂಭೀರವಾಗಿದೆ ಎಂದು ತಿಳಿದು ಬಂದಿದೆ.