ಕಣಿವೆ ರಾಜ್ಯದ 'ಟಾಪ್ ಟೆನ್ ' ಉಗ್ರರ ಪಟ್ಟಿ ರಿಲೀಸ್

•   Tue, Jun 04 2019 04:25:01 PM



• ಶ್ರೀನಗರ, ಜೂ 4 Daijiworld News/MSP): ಕಾಶ್ಮೀರ ಕಣಿವೆಯಲ್ಲಿನ ಟಾಪ್ 10 ಉಗ್ರರ ಪಟ್ಟಿ ಜಮ್ಮು-ಕಾಶ್ಮೀರ ಭದ್ರತಾ ಪಡೆ ಮಂಗಳವಾರ ಬಿಡುಗಡೆ ಮಾಡಿದೆ. ಭಯೋತ್ಪಾದಕ ಚಟುವಟಿಕೆಯಲ್ಲಿ ತೊಡಗಿರುವ ಉಗ್ರರನ್ನು ಮಟ್ಟಹಾಕಲು ತಯಾರಿ ಮಾಡಿಕೊಂಡಿರುವ ಭದ್ರತಾ ಪಡೆ, ಇದಕ್ಕಾಗಿಯೇ ಟಾಪ್ 10 ಉಗ್ರರ ಪಟ್ಟಿಯನ್ನು ರಿಲೀಸ್ ಮಾಡಿದೆ. ಈ ಪೈಕಿ 2010ರಿಂದ ಭಯೋತ್ಪಾದನಾ ಸಂಘಟನೆ ಜೊತೆ ಶಾಮೀಲಾಗಿರುವ ಹಿಜ್ಬುಲ್ ಮುಜಾಹಿದೀನ್ ಉಗ್ರಗಾಮಿ ಸಂಘಟನೆಯ ಮುಖ್ಯಸ್ಥ ರಿಯಾಝ್ ಅಹ್ಮದ್ ಟಾಪ್ 10 ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ.

  

  ಶ್ರೀನಗರದ ಮೊಹಮ್ಮದ್​ ಅಶ್ ರಖ್ ಖಾನ್​, ಶ್ರೀನಗರದ ಡಾ. ಸೈಫುಲ್ಲಾ, ಬಾರಾಮುಲ್ಲಾದ ಮೆಹ್ರಾಜ್​ ಉದ್​ ದ್ದಿನ್​, ಕುಪ್ವಾರಾದ ಅಜಾಜ್​ ಅಹ್ಮದ್​ ಮಲಿಕ್​ ಮತ್ತು ಪುಲ್ವಾಮಾದ ಅರ್ಷೈದ್​ ಉಲ್​ ಹಕ್​, ಲಷ್ಕರ್​ ಎ ತೊಯ್ಬಾದ ವಾಸಿಂಗ್​ ಅಹ್ಮದ್​ ಅಲಿಯಾಸ್​ ಒಸಾಮಾ, ಜೈಷ್​ ಎ ಮೊಹಮ್ಮದ್​ನ ಹಫೀಜ್​ ಉಮರ್​ ಮತ್ತು ಝಾಹೀದ್​ ಶೇಖ್​ ಈ ಪಟ್ಟಿಯಲ್ಲಿರುವ ಟಾಪ್ ಟೆನ್ ಉಗ್ರರಾಗಿದ್ದಾರೆ. .ಕಣಿವೆ ರಾಜ್ಯದಲ್ಲಿ ಭಯೋತ್ಪಾದನೆಯನ್ನು ಪರಿಣಾಮಕಾರಿಯಾಗಿ ಹತ್ತಿಕ್ಕುವ ನಿಟ್ಟಿನಲ್ಲಿ ಭದ್ರತಾಪಡೆಗಳು ಈ ಪಟ್ಟಿಯನ್ನು ಸಿದ್ಧಪಡಿಸಿದೆ.

  ಇದಲ್ಲದೆ ಉಗ್ರಗಾಮಿ ಚಟುವಟಿಕೆಯಲ್ಲಿ ಭಾಗಿಯಾಗಿದ್ದ ಸುಮಾರು 86 ಉಗ್ರರನ್ನು ಇಲ್ಲಿಯತಕ ಹೊಡೆದುರುಳಿಸಲಾಗಿದೆ, 20 ಉಗ್ರರನ್ನು ಬಂಧಿಸಲಾಗಿದೆ. ಎಂದು ಜನರಲ್ ಆಫೀಸರ್ ಕಮಾಂಡಿಂಗ್ ಲೆಫ್ಟಿನೆಂಟ್ ಜನರಲ್ ರಣಬೀರ್ ಸಿಂಗ್ ತಿಳಿಸಿದ್ದಾರೆ. ಉಗ್ರರ ವಿರುದ್ಧದ ನಮ್ಮ ಕಾರ್ಯಾಚರಣೆ ಮುಂದುವರಿಯಲಿದೆ ಎಂದು ತಿಳಿಸಿದ್ದಾರೆ.