ಮಹಾಕಾಳೇಶ್ವರ ದೇವಸ್ಥಾನದ ಫುಡ್ ಸೆಂಟರ್‌ನಲ್ಲಿ ದುಪಟ್ಟಾ ಯಂತ್ರಕ್ಕೆ ಸಿಲುಕಿ ಮಹಿಳೆ ಸಾವು

•   Sat, Dec 21 2024 12:31:06 PM



• ಉಜ್ಜಯಿನಿ,ಡಿ.21(DaijiworldNews/TA): ಮಧ್ಯಪ್ರದೇಶದ ಉಜ್ಜಯಿನಿಯ ಮಹಾಕಾಳೇಶ್ವರ ದೇವಸ್ಥಾನದ ಆಹಾರ ಕೇಂದ್ರದಲ್ಲಿ ಶನಿವಾರ ಆಲೂಗೆಡ್ಡೆ ಸುಲಿಯುವ ಯಂತ್ರಕ್ಕೆ ‘ದುಪಟ್ಟಾ’ ಸಿಲುಕಿ 30 ವರ್ಷದ ಮಹಿಳೆ ಮೃತಪಟ್ಟಿದ್ದಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ದೇವಸ್ಥಾನದ ಅನ್ನ ಕ್ಷೇತ್ರದಲ್ಲಿ ಬೆಳಗ್ಗೆ ಈ ಅವಘಡ ಸಂಭವಿಸಿದೆ ಎಂದು ಉಪವಿಭಾಗೀಯ ಮ್ಯಾಜಿಸ್ಟ್ರೇಟ್ (ಎಸ್‌ಡಿಎಂ) ಲಕ್ಷ್ಮೀ ನಾರಾಯಣ ಗಾರ್ಗ್ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

  

  ಮಹಿಳೆ ರಜನಿ ಖತ್ರಿ ಭೋಜನಶಾಲೆಯಲ್ಲಿ ಕೆಲಸ ಮಾಡುತ್ತಿದ್ದಾಗ ಆಕೆಯ ದುಪಟ್ಟಾ ಆಲೂಗಡ್ಡೆ ಸುಲಿಯುವ ಯಂತ್ರದಲ್ಲಿ ಸಿಕ್ಕಿಹಾಕಿಕೊಂಡಿದೆ ಎಂದು ಖಾಸಗಿ ಭದ್ರತಾ ಸೇವೆಯ ಉದ್ಯೋಗಿಗಳು ಮತ್ತು ಆವರಣದಲ್ಲಿದ್ದ ಇತರ ಮಹಿಳೆಯರು ತಿಳಿಸಿದ್ದಾರೆ.

  ಮಹಿಳೆಯ ಕುತ್ತಿಗೆಗೆ ದುಪಟ್ಟಾ ಬಿಗಿಯಾಗಿ ಅನಾಹುತ ಸಂಭವಿಸಿದೆ. ಆಕೆಯನ್ನು ಖಾಸಗಿ ಆಸ್ಪತ್ರೆಗೆ ಕೊಂಡೊಯ್ಯಲಾಗಿದ್ದು, ವೈದ್ಯರು ಆಕೆ ಮೃತಪಟ್ಟಿರುವುದಾಗಿ ತಿಳಿಸಿದ್ದಾರೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದ್ದು, ವರದಿ ಬಂದರೆ ನಿಖರ ಕಾರಣ ತಿಳಿಯಲಿದೆ ಎಂದು ಹೇಳಲಾಗಿದೆ. ಮೃತ ಮಹಿಳೆಯ ಕುಟುಂಬಕ್ಕೆ ಸರ್ಕಾರ ಆರ್ಥಿಕ ನೆರವು ನೀಡಲಿದೆ ಎಂದು ಎಸ್‌ಡಿಎಂ ತಿಳಿಸಿದ್ದಾರೆ.