ಯೋಗಿ ಆದಿತ್ಯನಾಥ್​ ಕುರಿತು ಅವಹೇಳನಕಾರಿ ಪೋಸ್ಟ್​ ಮಾಡಿದ್ದ ಮತ್ತೊಬ್ಬ ವ್ಯಕ್ತಿಯ ಬಂಧನ

•   Mon, Jun 10 2019 10:05:14 AM



• ಗೋರಖ್​ಪುರ್, ಜೂ10(Daijiworld News/SS): ಸಾಮಾಜಿಕ ಜಾಲತಾಣದಲ್ಲಿ ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್​ ಕುರಿತು ಅವಹೇಳನಕಾರಿ ಪೋಸ್ಟ್​ ಮಾಡಿದ ಮತ್ತೊಬ್ಬ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

  

  ಸಿಎಂ ಯೋಗಿ ಕುರಿತು ಅವಹೇಳನಕಾರಿ ವಿಷಯವನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್​ ಮಾಡಿದ್ದಕ್ಕೆ ಬಂಧಿಸಲಾಗಿದ್ದು, ಆತನ ಮೊಬೈಲ್​ ಅನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಕಳೆದ ಮೂರು ದಿನಗಳಲ್ಲಿ ಒಟ್ಟು ನಾಲ್ಕು ಮಂದಿಯನ್ನು ಉತ್ತರ ಪ್ರದೇಶ ಪೊಲೀಸರು​ ಬಂಧಿಸಿದ್ದಾರೆ.

  ಖಾಸಗಿ ಮಾಧ್ಯಮವೊಂದರ ಸಂಪಾದಕ, ಮಾಲೀಕ ಜತೆಗೆ ಹವ್ಯಾಸಿ ಪತ್ರಕರ್ತನನ್ನು ಶನಿವಾರವಷ್ಟೇ ಬಂಧಿಸಲಾಗಿತ್ತು. ಸಿಎಂ ಯೋಗಿ ಕುರಿತು ಆಕ್ಷೇಪಾರ್ಹ ವಿಷಯವನ್ನು ಬಿತ್ತರಿಸಿದ್ದಾರೆ ಎಂಬ ಆರೋಪದ ಮೇಲೆ ಬಂಧನ ಮಾಡಲಾಗಿತ್ತು. ಪ್ರಶಾಂತ್​ ಕನೋಜ್​ ಬಂಧಿತ ಪತ್ರಕರ್ತನಾಗಿದ್ದು, ಸಿಎಂ ಯೋಗಿ ಕುರಿತು ಅವಹೇಳನಕಾರಿಯಾಗಿ ಟ್ವೀಟ್​ ಮಾಡಿದ್ದರು ಎನ್ನಲಾಗಿದೆ.

  ಮತ್ತೊಂದು ಪ್ರಕರಣದಲ್ಲಿ ಖಾಸಗಿ ಸುದ್ದಿ ಮಾಧ್ಯಮದ ಮಾಲೀಕ ಇಸಿಕಾ ಸಿಂಗ್​ ಮತ್ತು ಸಂಪಾದಕ ಅನುಜ್​ ಶುಕ್ಲ ಎಂಬುವವರನ್ನು ಶನಿವಾರ ನೋಯ್ಡಾದಲ್ಲಿ ಬಂಧಿಸಲಾಗಿತ್ತು.