ಮೂವರು ಪ್ರಾಣ ಸ್ನೇಹಿತರು ಜೊತೆಗೆ UPSC ಪರೀಕ್ಷೆ ಬರೆದು ಐಎಎಸ್-ಐಪಿಎಸ್‌ ಅಧಿಕಾರಿಗಳಾದ ಕಥೆ

•   Sun, Jan 19 2025 08:31:07 AM



• ನವದೆಹಲಿ, ಜ.19 (DaijiworldNews/AK):ಸ್ನೇಹ ಎಂಬುದು ಒಂದು ಅಮೂಲ್ಯ ಸಂಪತ್ತು. ಪ್ರತಿಯೊಬ್ಬರ ಬದುಕಿನಲ್ಲೂ ಒಂದೊಳ್ಳೆ ಸ್ನೇಹಿತ ಬಹು ದೊಡ್ಡ ಪಾತ್ರ ವಹಿಸುತ್ತದೆ. ಅದೇ ರೀತಿ ಜೀವನದಲ್ಲಿ ಏನಾದರೂ ಸಾಧಿಸಲೇಬೇಕು ಎಂದು ಪಣ ತೊಟ್ಟ ಈ ಸ್ನೇಹಿತರು ಜೊತೆಯಾಗಿ UPSC ಪರೀಕ್ಷೆ ಬರೆದು, ಅದರಲ್ಲಿ ಉತ್ತಮ ಅಂಕಗಳೊಂದಿಗೆ ತೇರ್ಗಡೆಯಾಗಿ ಇಂದು ಐಎಎಸ್‌-ಐಪಿಎಸ್‌ ಅಧಿಕಾರಿಗಳಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಮೂವರು ಸ್ನೇಹಿತರ ಈ ಯಶಸ್ಸಿನ ಕಥೆ ನಿಜಕ್ಕೂ ನಮಗೆಲ್ಲರಿಗೂ ಪ್ರೇರಣೆ.

  

  ನಾವು ಇಂದು ಹೇಳೋದಕ್ಕೆ ಹೊರಟಿದ್ದು, ಮೂವರು ಗೆಳೆಯರಾದ ಐಎಎಸ್‌ ವಿಶಾಲ್‌ ಮಿಶ್ರಾ, ಐಎಎಸ್‌ ಗೌರವ್‌ ವಿಜಯರಾಮ್‌ ಕುಮಾರ್‌ ಮತ್ತು ಐಪಿಎಸ್‌ ಸಾದ್‌ ಮಿಯಾನ್‌ ಖಾನ್‌ ಅವರದು. ಈ ಮೂವರು ಸ್ನೇಹಿತರು 2017 ರಲ್ಲಿ UPSC ಸಿವಿಲ್‌ ಸರ್ವೀಸ್‌ ಪರೀಕ್ಷೆ ಬರೆದು ಐಎಎಸ್-ಐಪಿಎಸ್‌ ಅಧಿಕಾರಿಗಳಾಗುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಪರೀಕ್ಷೆಯಲ್ಲಿ ಸಾದ್‌ ಖಾನ್‌ 25 ನೇ ರ್‍ಯಾಂಕ್‌, ಗೌರವ್‌ 34 ನೇ ರ್‍ಯಾಂಕ್‌ ಮತ್ತು ವಿಶಾಲ್‌ 49 ನೇರ್‍ಯಾಂಕ್‌ ಪಡೆದಿದ್ದಾರೆ.

  ಉತ್ತರ ಪ್ರದೇಶದ ಬಿಜ್ನೋರ್‌ ನಿವಾಸಿಯಾದ ಸಾದ್‌ ಮಿಯಾ ಖಾನ್‌ ಅವರು ತಾವು ಬಿ.ಟೆಕ್‌ ಓದುವ ಸಮಯದಲ್ಲಿ ವಿಶಾಲ್ ಮಿಶ್ರಾ ಅವರನ್ನು ಕಾನ್ಪುರದ ಹಾರ್ಕೋರ್ಟ್‌ ಬಟ್ಲರ್‌ ಟೆಕ್ನಾಲಜಿಕಲ್‌ ಯೂನಿವರ್ಸಿಟಿಯಲ್ಲಿ ಭೇಟಿಯಾದರು. ಹೀಗೆ ಪರಿಚಯವಾಗಿ ಈ ಇಬ್ಬರು ಬೆಸ್ಟ್‌ ಫ್ರೆಂಡ್ಸ್‌ ಆದರು. ಬಿ.ಟೆಕ್‌ ಪದವಿ ಮುಗಿಸಿ ಈ ಇಬ್ಬರೂ ಕಾನ್ಪುರದ ಐಐಟಿಯಲ್ಲಿ ಎಂ.ಟೆಕ್‌ ಪದವಿಯನ್ನು ಪಡೆದರು. ಈ ಸಮಯದಲ್ಲಿ ವಿಶಾಲ್‌ ಮತ್ತು ಸಾದ್‌ ಇಬ್ಬರೂ ಯುಪಿಎಸ್‌ಸಿ ಪರೀಕ್ಷೆಯನ್ನು ಬರೆಯಬೇಕೆಂದು ನಿರ್ಧರಿಸಿದರು ಮತ್ತು ಪರೀಕ್ಷೆಯ ತಯಾರಿಗಾಗಿ ದೆಹಲಿಗೆ ತೆರಳಿದರು.

  ಇಲ್ಲಿ ಇವರಿಗೆ ಚಂಡೀಘಡದ ಪಿಇಸಿ ಯೂನಿರ್ವಸಿಟಿ ಆಫ್‌ ಟೆಕ್ನಾಲಜಿ ಕಾಲೇಜ್‌ನಲ್ಲಿ ಬಿ.ಇ ಪದವಿಯನ್ನು ಮುಗಿಸಿ ಬಂದ ಗೌರವ್‌ ಅವರ ಪರಿಚಯವಾಗುತ್ತದೆ. ನಂತರ ಈ ಮೂವರು ಸ್ನೇಹಿತರು ಜೊತೆಯಾಗಿ UPSC ಪರೀಕ್ಷೆಗೆ ತಯಾರಿಯನ್ನು ನಡೆಸುತ್ತಾರೆ. ಹೀಗೆ ಸತತ ಪ್ರಯತ್ನಗಳ ಬಳಿಕ ಈ ಮೂವರು ಸ್ನೇಹಿತರು 2017 ರಲ್ಲಿ ಯುಪಿಎಸ್‌ಸಿ ಪರೀಕ್ಷೆಯನ್ನು ಬರೆದು ರ್‍ಯಾಂಕ್‌ ಪಡೆಯುತ್ತಾರೆ. ಪ್ರಸ್ತುತ ಈ ಮೂವರು ಸ್ನೇಹಿತರು ವಿವಿಧ ಸ್ಥಳಗಳಲ್ಲಿ ಸೇವೆಯಲ್ಲಿದ್ದಾರೆ. ಈ ಸ್ನೇಹಿತರ ಯಶಸ್ಸಿನನ ಕಥೆ ನಿಜಕ್ಕೂ ನಮಗೆಲ್ಲರಿಗೂ ಸ್ಫೂರ್ತಿದಾಯಕ.