ಡಿಕೆಶಿ ವಿರುದ್ಧದ ಯತ್ನಾಳ್​ ಅರ್ಜಿಗೆ ಸುಪ್ರೀಂ ತರಾಟೆ - ಮಾರ್ಚ್ 26ಕ್ಕೆ ವಿಚಾರಣೆ ಮುಂದೂಡಿಕೆ

•   Wed, Jan 29 2025 07:57:46 PM



• ಬೆಂಗಳೂರು, ಜ.29(DaijiworldNews/TA): ಡಿ.ಕೆ. ಶಿವಕುಮಾರ್ ಅವರ ವಿರುದ್ಧದ ಅಕ್ರಮ ಆಸ್ತಿ ಗಳಿಕೆ ತನಿಖೆಗೆ ಸಂಬಂಧಿಸಿದಂತೆ ಸಿಬಿಐ ಅನುಮತಿಯನ್ನು ಹಿಂಪಡೆದಿದ್ದ ಕಾಂಗ್ರೆಸ್ ಸರ್ಕಾರದ ಕ್ರಮವನ್ನು ಪ್ರಶ್ನಿಸಿ ಸಲ್ಲಿಸಿದ ಬಿಜೆಪಿ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್​ನ ಅರ್ಜಿಯನ್ನು ಸುಪ್ರೀಂಕೋರ್ಟ್​ ಇಂದು (ಜನವರಿ 29) ವಿಚಾರಣೆ ಮಾಡಿದೆ.

  

  ಈ ಸಂದರ್ಭದಲ್ಲಿ, ನ್ಯಾಯಾಮೂರ್ತಿ ಯತ್ನಾಳ್​ಗೆ ತೀವ್ರ ಟೀಕೆಗಳನ್ನು ಮಾಡಿದ್ದಾರೆ. "ಪೊಲಿಟಿಕಲ್ ಅಡ್ವಾಂಟೆಜ್​ ಪಡೆಯಲು ನೀವು ಇಂತಹ ಅರ್ಜಿಗಳನ್ನು ಹಾಕುತ್ತಿದ್ದೀರಿ. ರಾಜಕೀಯ ಕಾರ್ಯಗಳನ್ನು ಫೀಲ್ಡ್ ನಲ್ಲಿ ಮಾಡಿ," ಎಂದು ನ್ಯಾಯಮೂರ್ತಿ ಯತ್ನಾಳ್​ಗೆ ತರಾಟೆಗೆ ತೆಗೆದುಕೊಂಡರು. ನಂತರ ಸುಪ್ರೀಂಕೋರ್ಟ್​ ಮುಂದಿನ ವಿಚಾರಣೆಯನ್ನು ಮಾರ್ಚ್ 26ಕ್ಕೆ ಮುಂದೂಡುವುದಾಗಿ ಘೋಷಣೆ ಮಾಡಿದೆ.

  ಡಿ.ಕೆ. ಶಿವಕುಮಾರ್​ ಅವರ ಆದಾಯ ಮೀರಿ ಆಸ್ತಿ ಗಳಿಕೆ ಪ್ರಕರಣದ ತನಿಖೆಯನ್ನು ಸಿಬಿಐಗೆ ನೀಡಲಾಗಿತ್ತು. ಆದರೆ, ಸಿದ್ದರಾಮಯ್ಯ ಸರ್ಕಾರ ಅಧಿಕಾರಕ್ಕೆ ಬರುವ ಮೊದಲು ಈ ಅನುಮತಿಯನ್ನು ಹಿಂಪಡೆಯಲಾಗಿತ್ತು. ಇದನ್ನು ಪ್ರಶ್ನಿಸಿ, ಸಿಬಿಐ ಹಾಗೂ ಯತ್ನಾಳ್​ ಹೈಕೋರ್ಟ್​ ಮೆಟ್ಟಿಲೇರಿದರು, ಆದರೆ ಹೈಕೋರ್ಟ್​ ಅದನ್ನು ವಜಾ ಮಾಡಿತ್ತು. ನಂತರ, ಯತ್ನಾಳ್​ ಹೈಕೋರ್ಟ್​ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂಕೋರ್ಟ್​ಗೆ ಮೇಲ್ಮನವಿ ಸಲ್ಲಿಸಿದ್ದರು.