'ಸತತ ಬೆಲೆ ಏರಿಕೆಯಿಂದ ಸರ್ಕಾರ ಬಡವರ ಮೇಲೆ ಬರೆ ಎಳೆಯುತ್ತಿದೆ'- ವಿಜಯೇಂದ್ರ

•   Wed, Feb 19 2025 01:33:19 PM



• ಬೆಂಗಳೂರು, ಫೆ.19 (DaijiworldNews/AA): ಸತತವಾಗಿ ಬೆಲೆ ಏರಿಕೆ ಮಾಡುವ ಮೂಲಕ ಸರ್ಕಾರ ಬಡವರ ಮೇಲೆ ಬರೆ ಎಳೆಯುತ್ತಿದೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ತಿಳಿಸಿದ್ದಾರೆ.

  ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, ಬೆಲೆ ಏರಿಕೆ ಮತ್ತು ಆರ್ಥಿಕ ದುಸ್ಥಿತಿಯಿಂದ ರಾಜ್ಯ ದಿವಾಳಿ ಅಂಚಿಗೆ ಬಂದು ತಲುಪಿದೆ. ರಾಜ್ಯದ ಆರ್ಥಿಕ ಪರಿಸ್ಥಿತಿ ಬಗ್ಗೆ ಶ್ವೇತ ಪತ್ರ ಹೊರಡಿಸಬೇಕು ಎಂದು ಒತ್ತಾಯಿಸಿದ ಅವರು, ರಾಜ್ಯದಲ್ಲಿ ಬೆಲೆ ಏರಿಕೆ ಎಷ್ಟಾಗಿದೆ ಎಂಬ ವಿವರ ನೀಡಿದರು.

  ಆಸ್ತಿ ನೋಂದಣಿ ಶುಲ್ಕ - ಶೇ 60, ಆಸ್ತಿ ಮಾರ್ಗದರ್ಶನ ಮೌಲ್ಯಗಳು ಶೇ 30, ವಾಹನ ನೋಂದಣಿ ಶುಲ್ಕ ಶೇ 10, ಆಸ್ಪತ್ರೆ ಸೇವಾ ಶುಲ್ಕಗಳು ಶೇ 5, ಸರ್ಕಾರಿ ಕಾಲೇಜು ಶುಲ್ಕಗಳು ಶೇ 10, ಬೆಂಗಳೂರು ಮೆಟ್ರೋ ದರಗಳು ಶೇ 50, ಎಲೆಕ್ಟ್ರಿಕ್ ವಾಹನ ತೆರಿಗೆ ಶೇ 10, ವಿದ್ಯುತ್ ದರಗಳು ಶೇ 14.5, ನೀರಿನ ಸುಂಕಗಳು ಶೇ 30, ಆಸ್ತಿ ತೆರಿಗೆ ಶೇ 25, ಬೀಜ ಬೆಲೆಗಳು ಶೇ 60, ಬಿಯರ್ ಬೆಲೆಗಳು ಶೇ 45, ಹಾಲಿನ ಬೆಲೆಗಳು ಶೇ 15, ಬಸ್ ದರಗಳು ಶೇ 15, ಜನನ ಮತ್ತು ಮರಣ ಪ್ರಮಾಣ ಪತ್ರಗಳ ಶುಲ್ಕ ಶೇ 100 ಏರಿಸಿದೆ ಎಂದು ಮಾಹಿತಿ ನೀಡಿದ್ದಾರೆ.

  ಕರ್ನಾಟಕ ರಾಜ್ಯ ಸಾರಿಗೆ ಸಂಸ್ಥೆಗೆ ರಾಜ್ಯ ಸರ್ಕಾರ 7,000 ಕೋಟಿ ರೂ. ನೀಡಬೇಕಿದ್ದು ಇನ್ನೂ ಕೊಟ್ಟಿಲ್ಲ. ಸಾರಿಗೆ ಸಂಸ್ಥೆ ಮುಚ್ಚುವ ಸ್ಥಿತಿಗೆ ತಲುಪಿದೆ ಎಂದರು.