ಯಾವುದೇ ತರಬೇತಿ ಪಡೆಯದೆ ಯುಪಿಎಸ್‌ಸಿ ಬರೆದು ಐಪಿಎಸ್ ಅಧಿಕಾರಿಯಾದ ಅಂಶಿಕಾ ವರ್ಮಾ

•   Wed, Jun 25 2025 08:51:57 AM



• ಉತ್ತರ ಪ್ರದೇಶ, ಜೂ. 25 (DaijiworldNews/AA): ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆಯು ವಿಶ್ವದ ಕಠಿಣ ಪರೀಕ್ಷೆಗಳಲ್ಲಿ ಒಂದಾಗಿದೆ. ಈ ಪರೀಕ್ಷೆಯನ್ನು ಯಾವುದೇ ತರಬೇತಿ ಪಡೆಯದೇ ಸ್ವಯಂ ಅಧ್ಯಯನದ ಮೂಲಕ ಉತ್ತೀರ್ಣರಾಗುವುದು ಕಷ್ಟಸಾಧ್ಯ. ಹೀಗೆ ಯಾವುದೇ ತರಬೇತಿ ಪಡೆಯದೇ ಸ್ವಯಂ ಅಧ್ಯಯನದ ಮೂಲಕ ಉತ್ತೀರ್ಣರಾಗಿ ಐಪಿಎಸ್ ಅಧಿಕಾರಿಯಾದ ಅಂಶಿಕಾ ವರ್ಮಾ ಅವರ ಯಶೋಗಾಥೆ ಇದು.

  ಐಪಿಎಸ್ ಅಂಶಿಕಾ ವರ್ಮಾ ಅವರು ಉತ್ತರ ಪ್ರದೇಶದ ಪ್ರಯಾಗ್‌ರಾಜ್ ಮೂಲದವರು. ಅವರ ತಂದೆ ಅನಿಲ್ ವರ್ಮಾ ಅವರು ಸರ್ಕಾರಿ ಉದ್ಯೋಗಿಯಾಗಿದ್ದು, ಈಗ ನಿವೃತ್ತರಾಗಿದ್ದಾರೆ. ಅಂಶಿಕಾ ವರ್ಮಾ ಅವರು ತಮ್ಮ ಶಾಲಾ ಶಿಕ್ಷಣವನ್ನು ಪ್ರಯಾಗ್‌ರಾಜ್‌ನಲ್ಲಿ ಪೂರ್ಣಗೊಳಿಸಿದರು. ಅವರು 2018ರಲ್ಲಿ ನೋಯ್ಡಾದಿಂದ ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ಇಂಜಿನಿಯರಿಂಗ್‌ನಲ್ಲಿ ಬಿ.ಟೆಕ್ ಪದವಿ ಪಡೆದರು. ಪದವಿ ಪಡೆದ ನಂತರ, ಅವರು ಯುಪಿಎಸ್‌ಸಿ ಪರೀಕ್ಷೆಗಳಿಗೆ ತಯಾರಿ ಆರಂಭಿಸಿದರು.

  ಯುಪಿಎಸ್‌ಸಿ ಪರೀಕ್ಷೆಯನ್ನು ಭೇದಿಸಲು, ಅಂಶಿಕಾ ಅವರು ಯಾವುದೇ ತರಬೇತಿ ಕೇಂದ್ರಕ್ಕೆ ಸೇರದೆ ಸ್ವಯಂ ಅಧ್ಯಯನವನ್ನು ಅವಲಂಬಿಸಿದರು. ಆದಾಗ್ಯೂ, ಅವರು ತಮ್ಮ ಮೊದಲ ಪ್ರಯತ್ನದಲ್ಲಿ ವಿಫಲರಾದರು. ಆದರೂ, ಅಂಶಿಕಾ ಅವರು ಛಲಬಿಡದೆ ಮತ್ತೆ ಎರಡನೇ ಬಾರಿಗೆ ಪರೀಕ್ಷೆಗೆ ಹಾಜರಾದರು.

  2021ರಲ್ಲಿ ಎರಡನೇ ಬಾರಿಗೆ ಯುಪಿಎಸ್‌ಸಿ ಪರೀಕ್ಷೆ ಬರೆದ ಅವರು, 136ನೇ ಅಖಿಲ ಭಾರತ ರ‍್ಯಾಂಕ್ ಗಳಿಸಿ ಉತ್ತೀರ್ಣರಾಗುವಲ್ಲಿ ಯಶಸ್ವಿಯಾದರು. ಅವರಿಗೆ ಐಪಿಎಸ್ ಹುದ್ದೆ ಮತ್ತು ಅವರ ತವರು ರಾಜ್ಯವಾದ ಉತ್ತರ ಪ್ರದೇಶದ ಕೇಡರ್ ಸಿಕ್ಕಿತು. ನಂತರ ಅವರು ತಮ್ಮ ಐಪಿಎಸ್ ತರಬೇತಿಯನ್ನು ಆರಂಭಿಸಿದರು.

  ಆರಂಭದಲ್ಲಿ, ಐಪಿಎಸ್ ಅಂಶಿಕಾ ವರ್ಮಾ ಅವರಿಗೆ ಆಗ್ರಾದ ಫತೇಪುರ್ ಸಿಕ್ರಿ ಪೊಲೀಸ್ ಠಾಣೆಯಲ್ಲಿ ಎಸ್‌ಎಚ್‌ಒ ಆಗಿ ಜವಾಬ್ದಾರಿ ನೀಡಲಾಯಿತು. ನಂತರ, 2023ರ ಡಿಸೆಂಬರ್ ೧೮ರಂದು ಅವರನ್ನು ಗೋರಖ್‌ಪುರದಲ್ಲಿ ಎಎಸ್‌ಪಿ ಆಗಿ ನೇಮಿಸಲಾಯಿತು. ಉತ್ತರ ಪ್ರದೇಶ ಸರ್ಕಾರ ಅವರನ್ನು ಬರೇಲಿಯ ದಕ್ಷಿಣದ ಎಸ್‌ಪಿ ಆಗಿ ಬಡ್ತಿ ನೀಡಿತು. ಅವರು ಪ್ರಸ್ತುತ ಬರೇಲಿಯಲ್ಲಿ ಹೆಚ್ಚುವರಿ ಎಸ್‌ಪಿ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.