ಬಿಸಿಲೂರಿನಲ್ಲಿ ಪ್ರತಿಭಟನೆಯ ಬಿಸಿ - ಮೋದಿಗೆ ವೋಟು ಹಾಕಿ ಈಗ ನನ್ನ ಕೇಳ್ತೀರಾ?- ಸಿಎಂ ಗರಂ

•   Wed, Jun 26 2019 12:39:01 PM



• ರಾಯಚೂರು,ಜೂ 26 (Daijiworld News/MSP): ರಾಯಚೂರು ಜಿಲ್ಲೆಯ ಕರೇಗುಡ್ಡದಲ್ಲಿ ಗ್ರಾಮವಾಸ್ತವ್ಯ ನಡೆಸಲಿರುವ ಸಿಎಂ ಕುಮಾರಸ್ವಾಮಿ ರಾಜಧಾನಿಯಿಂದ ರಾಯಚೂರಿಗೆ ರೈಲು ಮೂಲಕ ಪ್ರಯಾಣಿಸಿದ ಬಳಿಕ ಯರಮರಸ್​ ಸರ್ಕಿಟ್​ ಹೌಸ್​ನಲ್ಲಿ ಉಳಿದುಕೊಂಡಿದ್ದಾರೆ. ಅತ್ತ ಕಡೆ ನಾಡದೊರೆಯ ಸ್ವಾಗತಕ್ಕಾಗಿ ಬಿಸಿಲ ನಾಡು ರಾಯಚೂರು ಸಿದ್ದವಾಗಿದ್ದು, ಜನರಲ್ಲಿ ಸಡಗರ, ಸಂಭ್ರಮ ಮನೆ ಮಾಡಿದೆ.

  

  ಇನ್ನು ಸರ್ಕಿಟ್​ ಹೌಸ್​ನಲ್ಲಿ ಉಳಿದುಕೊಂಡಿದ್ದ ಮುಖ್ಯಮಂತ್ರಿಗಳನ್ನು ಕಾಂಗ್ರೆಸ್​ ಶಾಸಕ ಬಸನಗೌಡ ದದ್ದಲ್​​​​, ಬಿಜೆಪಿ ಶಾಸಕ ಡಾ.ಶಿವರಾಜ್ ಪಾಟೀಲ್​ ಸೇರಿದಂತೆ ಹಲವರು ಪಕ್ಷದ ನಾಯಕರು ಭೇಟಿಯಾಗಿ ಮಾತುಕತೆ ನಡೆಸಿದರು. ಆ ಬಳಿಕ ರಸ್ತೆ ಮಾರ್ಗವಾಗಿ ಸಿಎಂ ಕರೆಗುಡ್ಡಕ್ಕೆ ಪ್ರಯಾಣ ಬೆಳೆಸಿದರು. KA-36, F-1614 ನಂಬರಿನ ಬಸ್​ ಮೂಲಕ ಕರೇಗುಡ್ಡ ಕಡೆಗೆ ಪ್ರಯಾಣಿಸುತ್ತಿದ್ದ ವೇಳೆ ಸಿಎಂ ಪ್ರತಿಭಟನಾಕಾರ ಬಿಸಿ ತಟ್ಟಿದೆ.

  ಅವರು ತೆರಳುವ ರಸ್ತೆಗೆ ಅಡ್ಡಲಾಗಿ ಕುಳಿತು ಪ್ರತಿಭಟನೆ ನಡೆಸುತ್ತಿದ್ದ ಪ್ರತಿಭಟನಕಾರರೊಂದಿಗೆ ಬಸ್ಸಿನಲ್ಲಿಯೇ ಕುಳಿತು ಮುಖ್ಯಮಂತ್ರಿ ಪ್ರತಿಭಟನಾಕಾರರೊಂದಿಗೆ ಮಾತುಕತೆ ನಡೆಸಿದರು. ಈ ವೇಳೆ ಪ್ರತಿಭಟನಾಕಾರರೊಂದಿಗೆ ರಸ್ತೆ ತಡೆದು ಯಾಕೆ ಪ್ರತಿಭಟನೆ ನಡೆಸುತ್ತೀರಿ, ನೀವೆಲ್ಲಾ ನೇರವಾಗಿ ನನ್ನ ಬಳಿ ಯಾಕೆ ಬಂದಿಲ್ಲ ಎಂದು ಪ್ರಶ್ನಿಸಿದ್ದು ಮಾತ್ರವಲ್ಲದೆ ನೀವು ನರೇಂದ್ರ ಮೋದಿಗೆ ವೋಟು ಹಾಕಿದ್ದೀರಿ. ಈಗ ನನ್ನ ಯಾಕೆ ಕೇಳುತ್ತೀರಿ ಎಂದು ಸಿಎಂ ಗರಂ ಆಗಿದ್ದಾರೆ. ಆ ಬಳಿಕ ಬೇಡಿಕೆ ಈಡೇರಿಸುವ ಭರವಸೆ ನೀಡಿ ಮುಂದೆ ಪ್ರಯಾಣಿಸಿದರು.