ಗುಂಡಿನ ಸುರಿಮಳೆಗೈದು ಹರಿಯಾಣದ ಕಾಂಗ್ರೆಸ್​ ಮುಖಂಡನ ಬರ್ಬರ ಹತ್ಯೆ

•   Thu, Jun 27 2019 02:35:18 PM



• ಫರಿದಾಬಾದ್​, ಜೂ 27 (Daijiworld News/MSP): ಹರಿಯಾಣದ ಕಾಂಗ್ರೆಸ್​ ವಕ್ತಾರ ವಿಕಾಸ್​ ಚೌಧರಿ (38) ಅವರ ಮೇಲೆ ದುಷ್ಕರ್ಮಿಗಳು ಗುಂಡಿನ ದಾಳಿ ನಡೆಸಿ, ಬರ್ಬರವಾಗಿ ಹತ್ಯೆ ಮಾಡಿದ್ದಾರೆ.

  

  
  ದೆಹಲಿಯ ಬಳಿ ಫರಿದಾಬಾದ್​ನ ಸೆಕ್ಟರ್​ 9ರಲ್ಲಿರುವ ಜಿಮ್​ನಿಂದ ವಾಪಾಸ್ ಬರುತ್ತಿದ್ದ ಸಂದರ್ಭ ವಿಕಾಸ್​ ಚೌಧರಿ ಬಳಿ ಬಂದ ಮಾರುತಿ ಕಾರಿನಲ್ಲಿದ್ದ ನಾಲ್ವರು ಏಕಾಏಕಿ ವಿಕಾಸ್​ ಮೇಲೆ ಗುಂಡಿನ ದಾಳಿ ನಡೆಸಿದ್ದಾರೆ. ದುಷ್ಕರ್ಮಿಗಳ ಗುಂಡಿನ ದಾಳಿ ಪರಿಣಾಮ ಸುಮಾರು 10 ಬುಲೆಟ್​ಗಳು ವಿಕಾಸ್​ ಚೌಧರಿಯವರ ದೇಹ ಹೊಕ್ಕಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ತೀವ್ರ ಗಾಯಗೊಂಡಿದ್ದ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಚಿಕಿತ್ಸೆ ಫಲಿಸಲಿಲ್ಲ.

  ಆರೋಪಿಯೂ, ವಿಕಾಸ್ ರನ್ನು ಈ ಹಿಂದೆಯೂ ಹಿಂಬಾಲಿಸಿಕೊಂಡು ಬಂದಿರುವುದು ತಿಳಿದುಬಂದಿದ್ದು ಇದು ವೈಯಕ್ತಿಕ ಕಾರಣಗಳಿಗೆ ಹತ್ಯೆಯಾಗಿರುವಂತೆ ತೋರುತ್ತದೆ ಪೊಲೀಸ್ ಅಧಿಕಾರಿ ತಿಳಿಸಿದ್ದಾರೆ. ಗುಂಡಿನ ದಾಳಿ ನಡೆಸಿರುವ ಘಟನೆ ಸಿಸಿಟಿವಿಯಲ್ಲಿ ದಾಖಲಾಗಿದೆ. ವಿಕಾಸ್​ ಚೌಧರಿ ಈ ಮೊದಲು ಇಂಡಿಯನ್​ ನ್ಯಾಷನಲ್​ ಲೋಕ ದಳ್​ದಲ್ಲಿ ಇದ್ದವರು. ಇತ್ತೀಚೆಗಷ್ಟೇ ಕಾಂಗ್ರೆಸ್​ ಸೇರ್ಪಡೆಯಾಗಿದ್ದರು.

  " ಹರಿಯಾಣ ಕಾಂಗ್ರೆಸ್​​ ವಕ್ತಾರ ವಿಕಾಸ್​ ಚೌಧರಿ ಅವರ ಬರ್ಬರ ಹತ್ಯೆ ಅತ್ಯಂತ ಅಮಾನುಷ ಕೃತ್ಯ.ಬಿಜೆಪಿಯ ಜಂಗಲ್ ರಾಜ್ ಆಡಳಿತ ವ್ಯವಸ್ಥೆ ರಾಜ್ಯವಾಳುತ್ತಿದೆ. ರಾಜ್ಯದಲ್ಲಿ ಯಾರಿಗೂ ಕಾನೂನಿನ ಭಯವಿಲ್ಲದಂತಾಗಿದೆ.ಹಾಗಾಗಿ ಇಂತಹ ಘಟನೆಗಳು ಇತ್ತೀಚೆಗೆ ತೀರಾ ಸಹಜವಾಗಿವೆ. ವಿಕಾಸ್​ ಹತ್ಯೆ ಪ್ರಕರಣದ ತನಿಖೆಯಾಗಲಿ" ಎಂದು ಕಾಂಗ್ರೆಸ್ ಟ್ವೀಟ್ ಮೂಲಕ ಆಕ್ರೋಶ ವ್ಯಕ್ತಪಡಿಸಿದೆ.