ಐಎಎಸ್‌ ಅರ್ಜುನ್ ಪಾಂಡಿಯನ್ ಯಶಸ್ಸಿನ ಕಥನ

•   Wed, Feb 25 2026 08:20:24 AM



• ತಿರುವನಂತಪುರಂ, ಫೆ. 25 (DaijiworldNews/AK): ಇಡುಕ್ಕಿಯ ಸಣ್ಣ ಹಳ್ಳಿಯ ಅಂಗನವಾಡಿ ಕೇಂದ್ರದಲ್ಲಿ ತಾಯಿಯ ಜೊತೆ ಚಾಪೆಯ ಮೇಲೆ ಕುಳಿತು ಅಕ್ಷರಗಳನ್ನು ಕಲಿತ ಬಾಲಕ ಇಂದು ಅದೇ ವ್ಯವಸ್ಥೆಯನ್ನು ರೂಪಾಂತರಗೊಳಿಸುವ ಧ್ಯೇಯ ಹೊಂದಿದ ಜಿಲ್ಲಾಧಿಕಾರಿಯಾಗಿ ಹೊರಹೊಮ್ಮಿದ್ದಾನೆ. ಕೇರಳ ಕೇಡರ್‌ನ 2017ರ ಬ್ಯಾಚ್ ಐಎಎಸ್ ಅಧಿಕಾರಿ ಅರ್ಜುನ್ ಪಾಂಡಿಯನ್ ಅವರು ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಎರಡನೇ ಪ್ರಯತ್ನದಲ್ಲಿ ಆಲ್ ಇಂಡಿಯಾ ರ್ಯಾಂಕ್ 248 ಪಡೆದು ಸಾಧನೆ ಮಾಡಿದ್ದಾರೆ.

  ಅವರ ತಾಯಿ ಎಸ್. ಉಷಾ ಕುಮಾರಿ ಕಳೆದ 26 ವರ್ಷಗಳಿಂದ ಇಡುಕ್ಕಿ ಜಿಲ್ಲೆಯ ಒಂದು ಗ್ರಾಮದಲ್ಲಿ ಅಂಗನವಾಡಿ ಕಾರ್ಯಕರ್ತೆಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಬಾಲ್ಯದಲ್ಲೇ ತಾಯಿ ಕೆಲಸ ಮಾಡುತ್ತಿದ್ದ ಕೇಂದ್ರದಲ್ಲೇ ಕುಳಿತು ಕಲಿತ ಪಾಠಗಳು ಪಾಂಡಿಯನ್ ಅವರ ಜೀವನದ ದೃಷ್ಟಿಕೋಣವನ್ನೇ ರೂಪಿಸಿವೆ. ಇಂದು ಅವರು ಅದೇ ಅಂಗನವಾಡಿ ವ್ಯವಸ್ಥೆಯನ್ನು ಬಲಪಡಿಸುವತ್ತ ಗಮನ ಹರಿಸಿರುವುದು ವಿಶೇಷ.

  ಇಡುಕ್ಕಿಯ ಎಲಪ್ಪಾರ ಮೂಲದ ಅರ್ಜುನ್ ಪಾಂಡಿಯನ್ ಪ್ರಸ್ತುತ ತ್ರಿಶೂರ್ ಜಿಲ್ಲೆಯ ಜಿಲ್ಲಾಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಕಿಲಿಮನೂರು ಮತ್ತು ತಿರುವನಂತಪುರದಲ್ಲಿ ಶಾಲಾ ಶಿಕ್ಷಣ ಪೂರ್ಣಗೊಳಿಸಿದ ಅವರು, ಕೊಲ್ಲಂನ ಟಿಕೆಎಂ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್‌ನಲ್ಲಿ ಬಿ.ಟೆಕ್ ಪದವಿ ಪಡೆದರು. ನಂತರ ಟಿಸಿಎಸ್‌ನಲ್ಲಿ ಉದ್ಯೋಗ ಪಡೆದರೂ, ನಾಗರಿಕ ಸೇವೆ ಸಾಧಿಸುವ ಕನಸಿಗಾಗಿ 2014ರಲ್ಲಿ ರಾಜೀನಾಮೆ ನೀಡಿ ಯುಪಿಎಸ್‌ಸಿ ಪರೀಕ್ಷೆಗೆ ತಯಾರಿ ಆರಂಭಿಸಿದರು.

  ಐಎಎಸ್ ಅಧಿಕಾರಿಯಾಗಿ ಅವರು ಮುಖ್ಯ ಕಾರ್ಯದರ್ಶಿಯ ಸಿಬ್ಬಂದಿ ಅಧಿಕಾರಿ, ಕಾರ್ಮಿಕ ಆಯುಕ್ತ ಹಾಗೂ ಕಣ್ಣೂರಿನ ಸಹಾಯಕ ಕಲೆಕ್ಟರ್ ಸೇರಿದಂತೆ ಹಲವು ಮಹತ್ವದ ಹುದ್ದೆಗಳನ್ನು ನಿರ್ವಹಿಸಿದ್ದಾರೆ. ತ್ರಿಶೂರ್ ಜಿಲ್ಲಾಧಿಕಾರಿಯಾಗಿ ಅಧಿಕಾರ ವಹಿಸಿಕೊಂಡ ಬಳಿಕ ಅಂಗನವಾಡಿ ಮೂಲಸೌಕರ್ಯ ಸುಧಾರಣೆಗೆ ವಿಶೇಷ ಒತ್ತು ನೀಡಿದರು. ವರ್ಷಗಳಿಂದ ಬಾಡಿಗೆ ಕಟ್ಟಡಗಳಲ್ಲಿ ಅಥವಾ ಹಾಳಾದ ಪರಿಸ್ಥಿತಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸುಮಾರು 300 ಅಂಗನವಾಡಿಗಳಿಗೆ ಹೊಸ ಕಟ್ಟಡಗಳ ನಿರ್ಮಾಣ ಕಾರ್ಯಕ್ಕೆ ಚಾಲನೆ ನೀಡಿದರು. ಈಗಾಗಲೇ 20 ಕೇಂದ್ರಗಳಿಗೆ ಹೊಸ ಕಟ್ಟಡ ಸಿಕ್ಕಿದ್ದು, ಇನ್ನೂ 50 ಕೇಂದ್ರಗಳ ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ.

  ಅರಿಂಪುರ ಪಂಚಾಯತ್‌ನ ಒಂದು ಅಂಗನವಾಡಿಗೆ “ಕಲೆಕ್ಟರ್ಸ್ ಡ್ರೀಮ್” ಎಂಬ ಹೆಸರಿಡಲಾಗಿದೆ. ಅಂಗನವಾಡಿಗಳು ಕೇವಲ ಮಕ್ಕಳ ಆರೈಕೆ ಕೇಂದ್ರಗಳಲ್ಲ, ಗ್ರಾಮಗಳ ಸಾರ್ವಜನಿಕ ಸಂಸ್ಥೆಗಳಾಗಬೇಕು ಎಂಬ ನಂಬಿಕೆಯಿಂದ “ವಾ ವಯಿಕಂ” (ಬನ್ನಿ, ಓದಿ) ಕಾರ್ಯಕ್ರಮದ ಮೂಲಕ ಗ್ರಂಥಾಲಯ ಸಂಸ್ಕೃತಿಯನ್ನು ಉತ್ತೇಜಿಸಿದರು. ಜಿಲ್ಲೆಯಲ್ಲಿ ಈಗಾಗಲೇ 15 ಗ್ರಂಥಾಲಯಗಳನ್ನು ಸ್ಥಾಪಿಸಲಾಗಿದ್ದು, ಇನ್ನೂ 15 ಗ್ರಂಥಾಲಯಗಳ ಯೋಜನೆ ರೂಪಿಸಲಾಗಿದೆ. ಸಿಎಸ್‌ಆರ್ ನಿಧಿಗಳು ಹಾಗೂ ಸಾರ್ವಜನಿಕ ದೇಣಿಗೆಗಳ ನೆರವಿನಿಂದ ಪುಸ್ತಕಗಳನ್ನು ಸಂಗ್ರಹಿಸಲಾಗುತ್ತಿದೆ. ಮಕ್ಕಳು, ವೃದ್ಧರು ಸೇರಿದಂತೆ ಎಲ್ಲರೂ ಓದಲು ಮತ್ತು ಸಮಯ ಕಳೆಯಲು ಅಂಗನವಾಡಿ ಕೇಂದ್ರಗಳನ್ನು ಸಮುದಾಯ ಕೇಂದ್ರಗಳಾಗಿ ರೂಪಿಸುವುದು ಅವರ ಗುರಿಯಾಗಿದೆ.

  ಐಎಎಸ್ ಆಗುವ ಮೊದಲು ಅವರು ಐಟಿ ಕ್ಷೇತ್ರದಲ್ಲಿ ಎರಡೂವರೆ ವರ್ಷ ಕೆಲಸ ಮಾಡಿದ್ದರು. ಕಾಲೇಜು ದಿನಗಳಲ್ಲಿ ಚಹಾ ತೋಟದಲ್ಲೂ ಕೆಲಸ ಮಾಡಿದ ಅನುಭವವಿದೆ. ಅವರ ತಾಯಿ ಉಷಾ ಕುಮಾರಿ ಇಂದಿಗೂ ಎಲಪ್ಪಾರ ಪಂಚಾಯತ್‌ನ ಅಂಗನವಾಡಿ ಸಂಖ್ಯೆ 46ರಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಅಂಗನವಾಡಿ ಕಾರ್ಯಕರ್ತರು ಎದುರಿಸುವ ಸವಾಲುಗಳ ಬಗ್ಗೆ ತಮ್ಮ ಮಗ ಸದಾ ಪ್ರಶ್ನಿಸುತ್ತಿದ್ದುದನ್ನು ಅವರು ನೆನಪಿಸಿಕೊಳ್ಳುತ್ತಾರೆ.

  ಬಾಲ್ಯದಲ್ಲಿ ಕಂಡ ಅನುಭವವೇ ಜೀವನದ ಧ್ಯೇಯವಾಗಿ ರೂಪಾಂತರಗೊಂಡಿರುವ ಅರ್ಜುನ್ ಪಾಂಡಿಯನ್ ಅವರ ಕಥೆ, ಬೇರುಗಳನ್ನು ಮರೆಯದೇ ಸಮಾಜಕ್ಕೆ ಮರಳಿಸುವ ನಿಜವಾದ ಯಶಸ್ಸಿನ ಮಾದರಿಯಾಗಿದೆ.