ಚಂದ್ರನ ಕಕ್ಷೆಯೆಡೆಗೆ ಯಶಸ್ವಿಯಾಗಿ ಪ್ರಯಾಣ ಬೆಳೆಸಿದ ಚಂದ್ರಯಾನ-2

•   Wed, Aug 14 2019 08:36:34 AM



• ಬೆಂಗಳೂರು, ಆ.14(Daijiworld News/SS): ಚಂದ್ರಯಾನ-2 ಭೂಮಿಯ ಕಕ್ಷೆಯನ್ನು ತೊರೆದು ಚಂದ್ರನ ಕಕ್ಷೆಯೆಡೆಗೆ ಬುಧವಾರ ಮುಂಜಾನೆ ಯಶಸ್ವಿಯಾಗಿ ಪ್ರಯಾಣ ಬೆಳೆಸಿದೆ ಎಂದು ಇಸ್ರೋ ತಿಳಿಸಿದೆ.

  

  ಇಸ್ರೋದ ಮಹತ್ವಾಕಾಂಕ್ಷಿ ಯೋಜನೆಯಾದ ಚಂದ್ರಯಾನ-2 ನೌಕೆಯನ್ನು ಟ್ರಾನ್ಸ್ ಲೂನಾರ್ ಇನ್​ಸೆರ್ಷನ್​ ಪ್ರಕ್ರಿಯೆ ಮೂಲಕ ಬುಧವಾರ ಬೆಳಗಿನ ಜಾವ 2.21ಕ್ಕೆ ಭೂ ಕಕ್ಷೆಯಿಂದ ಚಂದ್ರನೆಡೆಗೆ ಕಳುಹಿಸಲಾಯಿತು. ಆ.20ರಂದು ನೌಕೆ ಚಂದ್ರನ ಕಕ್ಷೆಗೆ ಪ್ರವೇಶಿಸಲಿದೆ. ಕೊನೆಯ ಕಕ್ಷೆ ಬದಲಾವಣೆಯ ಪ್ರಕ್ರಿಯೆಯ ಭಾಗವಾಗಿ ನೌಕೆಯ ಇಂಜಿನ್​ ಅನ್ನು 1203 ಸೆಕೆಂಡ್ ದಹಿಸುವ ಮೂಲಕ ಭೂ ಕಕ್ಷೆಯಿಂದ ಹೊರಗೆ ಕಳುಹಿಸಲಾಯಿತು ಎಂದು ಇಸ್ರೋ ತಿಳಿಸಿದೆ.

  ಚಂದ್ರಯಾನ -2ರ ಎಲ್ಲ ಯಂತ್ರಗಳು ಸಹಜ ಸ್ಥಿತಿಯಲ್ಲಿ ಕಾರ್ಯ ನಿರ್ವಹಿಸುತ್ತಿವೆ. ಆ. 20 ಕ್ಕೆ ಚಂದ್ರ ಕಕ್ಷೆ ಮುಟ್ಟಲಿರುವ ನೌಕೆ, ಮುಂದಿನ 17 ದಿನಗಳಲ್ಲಿ ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಯಲಿದೆ ಎಂದು ಇಸ್ರೋ ತಿಳಿಸಿದೆ.

  ಜು. 22 ರಂದು ಚಂದ್ರಯಾನ -2 ನೌಕೆಯನ್ನು ಉಡಾವಣೆ ಮಾಡಲಾಗಿತ್ತು. ಆ ನಂತರ ಹಂತ ಹಂತವಾಗಿ 5 ಬಾರಿ ನೌಕೆಯ ಕಕ್ಷೆಯ ಬದಲಾವಣೆ ಮಾಡಲಾಗಿತ್ತು. ಕೊನೆಯ ಬಾರಿ ಆ. 6 ರ ಮಂಗಳವಾರ ಮಧ್ಯಾಹ್ನ 3.04ರ ಸುಮಾರಿಗೆ ನೌಕೆಯಲ್ಲಿರುವ ಇಂಜಿನ್​ನ್ನು 1,041 ಸೆಕೆಂಡ್ ದಹಿಸುವ ಮೂಲಕ ಹಳೆಯ ಕಕ್ಷೆಯಿಂದ ಚಿಮ್ಮಿ ಹೊಸ ಕಕ್ಷೆಗೆ ಏರಿಸಲಾಗಿತ್ತು.