ಗುಜರಾತ್‌ನ ಕಾಂಡ್ಲಾ ಬಂದರು ತಲುಪಿದ 20,400 ಮೆಟ್ರಿಕ್ ಟನ್ ಎಲ್‌ಪಿಜಿ ಹೊತ್ತ ಭಾರತದ ಹಡಗು

•   Wed, Apr 15 2026 04:34:25 PM



• ಗಾಂಧಿನಗರ, ಏ. 15 (DaijiworldNews/AA): 20,400 ಮೆಟ್ರಿಕ್ ಟನ್ ಎಲ್‌ಪಿಜಿಯನ್ನು ಹೊತ್ತ ಭಾರತದ ಹಡಗು 'ಜಗ ವಿಕ್ರಮ್' ಯಶಸ್ವಿಯಾಗಿ ಗುಜರಾತ್‌ನ ಕಾಂಡ್ಲಾ ಬಂದರಿಗೆ ಬಂದು ತಲುಪಿದೆ.

  ಅಮೆರಿಕ ಮತ್ತು ಇರಾನ್ ನಡುವಿನ ಇತ್ತೀಚಿನ ಕದನ ವಿರಾಮದ ಮಾತುಕತೆ ಬಳಿಕ ಹಾರ್ಮುಜ್ ಜಲಸಂಧಿಯನ್ನು ದಾಟಿ ಬಂದ ಭಾರತದ ಮೊದಲ ಹಡಗು ಇದಾಗಿದೆ. ಇನ್ನು ಜಗ ವಿಕ್ರಮ್ ಹಾರ್ಮುಜ್ ಜಲಸಂಧಿಯನ್ನು ಸುರಕ್ಷಿತವಾಗಿ ದಾಟಿದ 9ನೇ ಹಡಗಾಗಿದೆ.

  ಮುಂಬೈ ಮೂಲದ ಗ್ರೇಟ್ ಈಸ್ಟರ್ನ್ ಶಿಪ್ಪಿಂಗ್ ಕಂಪನಿ ಮಾಲೀಕತ್ವದ ಈ ಹಡಗು ಮಧ್ಯಮ ಗಾತ್ರದ್ದಾಗಿದೆ. ಈ ಹಡಗು 20,400 ಟನ್ ಸಾಮರ್ಥ್ಯದ ದ್ರವೀಕೃತ ಪೆಟ್ರೋಲಿಯಂ ಅನಿಲ (ಎಲ್‌ಪಿಜಿ) ಸಾಗಾಣಿಕೆಯ ಸಾಮರ್ಥ್ಯ ಹೊಂದಿದೆ. ಈ ಹಡಗಿನಲ್ಲಿ 24 ಮಂದಿ ಭಾರತೀಯ ಸಿಬ್ಬಂದಿ ಇದ್ದರು.

  ಶುಕ್ರವಾರ ರಾತ್ರಿ ಹಾಗೂ ಶನಿವಾರ ಬೆಳಗ್ಗಿನ ಜಾವದ ನಡುವೆ ಹಾರ್ಮುಜ್ ಜಲಸಂಧಿಯನ್ನು ಈ ಟ್ಯಾಂಕರ್ ದಾಟಿತ್ತು. ಬಳಿಕ ಒಮಾನ್ ಕೊಲ್ಲಿಯ ಸಮೀಪದಲ್ಲಿ ಸಂಚರಿಸಿತ್ತು. ಶನಿವಾರ ಮಧ್ಯಾಹ್ನ ಪೂರ್ವ ಭಾಗದ ಜಲಸಂಧಿಯನ್ನು ದಾಟಿತ್ತು. ಇದೀಗ ಕಾಂಡ್ಲಾ ಬಂದರಿಗೆ ಈ ಹಡಗು ಬಂದು ತಲುಪಿದೆ.