ಜಗನ್ನಾಥನ ಮಹಾ ರಥಯಾತ್ರೆಗೆ ಭವ್ಯ ಚಾಲನೆ - ಭಕ್ತಿಸಾಗರವಾದ ಪುರಿ

•   Thu, Jul 16 2026 09:22:31 AM



• ಪುರಿ, ಜು. 16 (DaijiworldNews/TA): ವಿಶ್ವದ ಅತಿದೊಡ್ಡ ಧಾರ್ಮಿಕ ಉತ್ಸವಗಳಲ್ಲಿ ಒಂದಾದ ಐತಿಹಾಸಿಕ ಶ್ರೀ ಜಗನ್ನಾಥ ರಥಯಾತ್ರೆ ಗುರುವಾರ ಒಡಿಶಾದ ಪುರಿಯಲ್ಲಿ ಅತ್ಯಂತ ವೈಭವ ಮತ್ತು ಭಕ್ತಿಭಾವದಿಂದ ಆರಂಭಗೊಂಡಿದೆ. ದೇಶ-ವಿದೇಶಗಳಿಂದ ಲಕ್ಷಾಂತರ ಭಕ್ತರು ಪುರಿಗೆ ಆಗಮಿಸಿದ್ದು, ಇಡೀ ನಗರ ‘ಜಯ ಜಗನ್ನಾಥ’ ಎಂಬ ಘೋಷಣೆಯಿಂದ ಮೊಳಗುತ್ತಿದೆ. ಬಿಗಿ ಭದ್ರತಾ ವ್ಯವಸ್ಥೆಯ ನಡುವೆ ರಥೋತ್ಸವಕ್ಕೆ ಅಧಿಕೃತ ಚಾಲನೆ ನೀಡಲಾಗಿದೆ.

  

  ಪುರಿ ರಥಯಾತ್ರೆಯ ಪ್ರಮುಖ ವೈಶಿಷ್ಟ್ಯವೆಂದರೆ, ಸಾಮಾನ್ಯವಾಗಿ ಭಕ್ತರು ದೇವರ ದರ್ಶನಕ್ಕಾಗಿ ದೇವಾಲಯಕ್ಕೆ ತೆರಳಬೇಕಾದರೆ, ಈ ಉತ್ಸವದಲ್ಲಿ ಶ್ರೀ ಜಗನ್ನಾಥ, ಅಣ್ಣ ಬಲಭದ್ರ ಹಾಗೂ ತಂಗಿ ಸುಭದ್ರಾ ದೇವಿ ಸ್ವತಃ ದೇವಾಲಯದಿಂದ ಹೊರಬಂದು ಭಕ್ತರಿಗೆ ದರ್ಶನ ನೀಡುತ್ತಾರೆ. ಜಾತಿ, ಮತ, ಧರ್ಮ ಹಾಗೂ ಸಾಮಾಜಿಕ ಭೇದವಿಲ್ಲದೆ ಎಲ್ಲರಿಗೂ ಸಮಾನವಾಗಿ ಆಶೀರ್ವಾದ ನೀಡುವ ಸಂಪ್ರದಾಯವೇ ಈ ರಥಯಾತ್ರೆಯ ವಿಶೇಷತೆ.

  ಸನಾತನ ಸಂಪ್ರದಾಯದ ಪ್ರಕಾರ, ಜಗನ್ನಾಥ ಸ್ವಾಮಿ ತನ್ನ ಒಡಹುಟ್ಟಿದವರೊಂದಿಗೆ ಸುಮಾರು ಮೂರು ಕಿಲೋಮೀಟರ್ ದೂರದಲ್ಲಿರುವ ಗುಂಡಿಚಾ ದೇವಸ್ಥಾನಕ್ಕೆ ವಾರ್ಷಿಕವಾಗಿ ತೆರಳುತ್ತಾರೆ. ದೇವತೆಗಳು ಒಂಬತ್ತು ದಿನಗಳ ಕಾಲ ಅಲ್ಲೇ ವಾಸ್ತವ್ಯ ಹೂಡಿ ವಿಶೇಷ ಪೂಜೆಗಳನ್ನು ಸ್ವೀಕರಿಸುತ್ತಾರೆ.

  ಪುರಿ ರಥಯಾತ್ರೆಯ ಮತ್ತೊಂದು ವಿಶೇಷವೆಂದರೆ, ಹಿಂದಿನ ವರ್ಷದ ರಥಗಳನ್ನು ಮರುಬಳಕೆ ಮಾಡುವುದಿಲ್ಲ. ಪ್ರತಿ ವರ್ಷವೂ ಅಕ್ಷಯ ತೃತೀಯದಿಂದ ಆರಂಭಿಸಿ ಆಯ್ದ ವಿಶೇಷ ಮರಗಳಿಂದ ಮೂರು ಬೃಹತ್ ರಥಗಳನ್ನು ಹೊಸದಾಗಿ ನಿರ್ಮಿಸಲಾಗುತ್ತದೆ. ಶ್ರೀ ಜಗನ್ನಾಥನ ರಥ – ನಂದಿಘೋಷ, ಬಲಭದ್ರನ ರಥ – ತಾಳಧ್ವಜ,  ಸುಭದ್ರಾ ದೇವಿಯ ರಥ – ದರ್ಪದಲನ. ಈ ರಥಗಳ ಹಗ್ಗವನ್ನು ಭಕ್ತಿಯಿಂದ ಸ್ಪರ್ಶಿಸಿ ಎಳೆಯುವುದರಿಂದ ಪಾಪಗಳು ಪರಿಹಾರವಾಗುತ್ತವೆ ಎಂಬುದು ಭಕ್ತರ ನಂಬಿಕೆಯಾಗಿದೆ.

  ರಾಜನೂ ಭಗವಂತನ ಸೇವಕನೇ : ರಥಯಾತ್ರೆಯ ಪ್ರಮುಖ ಆಚರಣೆಗಳಲ್ಲಿ 'ಛೇರಾ ಪಹರಾ' ಕೂಡ ಒಂದಾಗಿದೆ. ರಥಗಳು ಚಲನೆ ಆರಂಭಿಸುವ ಮೊದಲು ಪುರಿಯ ಗಜಪತಿ ಮಹಾರಾಜರು ಚಿನ್ನದ ಹಿಡಿಕೆಯಿರುವ ಕಸಪೊರಕೆಯಿಂದ ರಥದ ಸುತ್ತಮುತ್ತ ಗುಡಿಸಿ, ಶ್ರೀಗಂಧ ಮಿಶ್ರಿತ ನೀರನ್ನು ಪ್ರೋಕ್ಷಣೆ ಮಾಡುತ್ತಾರೆ. ಭಗವಂತನ ಮುಂದೆ ರಾಜನಾಗಲಿ ಅಥವಾ ಸಾಮಾನ್ಯ ಪ್ರಜೆಯಾಗಲಿ ಎಲ್ಲರೂ ಸಮಾನರು ಎಂಬ ಸಂದೇಶವನ್ನು ಈ ಸಂಪ್ರದಾಯ ಸಾರುತ್ತದೆ.

  ರಥಯಾತ್ರೆಯ ಪ್ರಮುಖ ವೇಳಾಪಟ್ಟಿ:
  ಜುಲೈ 16: ರಥಯಾತ್ರೆ ಆರಂಭ, 'ಪಹಂಡಿ' ಆಚರಣೆ ಹಾಗೂ ರಥಗಳ ಸಂಚಲನ.
  ಜುಲೈ 17 ರಿಂದ 23: ಗುಂಡಿಚಾ ದೇವಸ್ಥಾನದಲ್ಲಿ ದೇವತೆಗಳ ವಾಸ್ತವ್ಯ ಹಾಗೂ ವಿಶೇಷ ಪೂಜೆಗಳು.
  ಜುಲೈ 24: ದೇವತೆಗಳು ಮೂಲ ಜಗನ್ನಾಥ ದೇವಸ್ಥಾನಕ್ಕೆ ಮರಳುವ ಬಹುಡಾ ಯಾತ್ರೆ.

  ಲಕ್ಷಾಂತರ ಭಕ್ತರ ಅನುಕೂಲಕ್ಕಾಗಿ ಒಡಿಶಾ ಸರ್ಕಾರ ಹಾಗೂ ಸ್ಥಳೀಯ ಆಡಳಿತವು ಪುರಿ ನಗರದಲ್ಲಿ ಬಿಗಿ ಭದ್ರತೆ, ಸುಗಮ ಸಂಚಾರ ವ್ಯವಸ್ಥೆ ಹಾಗೂ ಅಗತ್ಯ ಮೂಲಸೌಕರ್ಯಗಳನ್ನು ಕಲ್ಪಿಸಿದ್ದು, ಉತ್ಸವವು ಶಾಂತಿಯುತವಾಗಿ ನಡೆಯಲು ಅಗತ್ಯ ಎಲ್ಲಾ ಸಿದ್ಧತೆಗಳನ್ನು ಮಾಡಲಾಗಿದೆ.