ಐಎಎಸ್‌ ಸುಲೋಚನಾ ಮೀನಾ ಯಶಸ್ಸಿನ ಕಥೆ

•   Sun, Sep 20 2026 07:41:18 AM



• ಕೋಲ್ಕತ್ತಾ, ಸೆ.20 (DaijiworldNews/TA): ದೊಡ್ಡ ನಗರ, ದುಬಾರಿ ಕೋಚಿಂಗ್‌ ಅಥವಾ ಅಪಾರ ಹಣವಿದ್ದರಷ್ಟೇ ಯಶಸ್ಸು ಸಾಧ್ಯವಿಲ್ಲ ಎಂಬುದಕ್ಕೆ ರಾಜಸ್ಥಾನದ ಸವಾಯಿ ಮಾಧೋಪುರ್ ಜಿಲ್ಲೆಯ ಅದಲ್ವಾರಾ ಗ್ರಾಮದ ಸುಲೋಚನಾ ಮೀನಾ ಅವರ ಸಾಧನೆ ಉದಾಹರಣೆಯಾಗಿದೆ. ಕೇವಲ 22ನೇ ವಯಸ್ಸಿನಲ್ಲಿ ಮೊದಲ ಪ್ರಯತ್ನದಲ್ಲೇ ಯುಪಿಎಸ್‌ಸಿ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಅವರು ಐಎಎಸ್ ಅಧಿಕಾರಿಯಾದರು.

  

  ಸುಲೋಚನಾ ಅವರು ರಾಜಸ್ಥಾನದ ಅದಲ್ವಾರಾ ಗ್ರಾಮದಲ್ಲಿ ಬೆಳೆದವರು. ಆ ಕಾಲದಲ್ಲಿ ಗ್ರಾಮದಲ್ಲಿ ಹೆಣ್ಣುಮಕ್ಕಳು 10ನೇ ಅಥವಾ 12ನೇ ತರಗತಿ ಪೂರ್ಣಗೊಳಿಸಿದರೆ ಸಾಕು ಎಂಬ ಮನೋಭಾವವಿತ್ತು. ಉನ್ನತ ಶಿಕ್ಷಣಕ್ಕಿಂತ ಬೇಗ ಮದುವೆಯಾಗಬೇಕು ಎಂಬ ಅಭಿಪ್ರಾಯವೂ ಕೆಲವರಲ್ಲಿತ್ತು. ಆದರೆ ಸುಲೋಚನಾ ಅವರಿಗೆ ಬಾಲ್ಯದಿಂದಲೇ ಐಎಎಸ್ ಅಧಿಕಾರಿಯಾಗಬೇಕೆಂಬ ಕನಸಿತ್ತು. ತಮ್ಮ ಕನಸಿನ ಬಗ್ಗೆ ಹೇಳಿಕೊಂಡಾಗ ಗ್ರಾಮದ ಕೆಲವರು ಅವರನ್ನು ಅಪಹಾಸ್ಯ ಮಾಡುತ್ತಿದ್ದರು. ಓದನ್ನು ಬಿಟ್ಟು ಮದುವೆಯಾಗುವಂತೆ ಸಲಹೆ ನೀಡುತ್ತಿದ್ದರು. ಆದರೆ ಇಂತಹ ಮಾತುಗಳು ಅವರ ಸಂಕಲ್ಪವನ್ನು ಮತ್ತಷ್ಟು ಗಟ್ಟಿಗೊಳಿಸಿದವು. ಸುಲೋಚನಾ ಅವರ ತಂದೆ-ತಾಯಿ ರೈತರು. ಸರಳ ಕುಟುಂಬದಲ್ಲಿ ಬೆಳೆದ ಅವರು ತಮ್ಮ ಒಡಹುಟ್ಟಿದವರಲ್ಲಿ ಹಿರಿಯರು. ಕುಟುಂಬದ ಜವಾಬ್ದಾರಿಗಳೂ ಅವರ ಮೇಲಿದ್ದವು. ಪೋಷಕರು ತಮ್ಮ ಮಗಳು ಓದಿ ವೈದ್ಯೆಯಾಗಬೇಕು ಎಂದು ಬಯಸಿದ್ದರು. ಆದರೆ ಸುಲೋಚನಾ ಅವರ ಗುರಿ ಮಾತ್ರ ಐಎಎಸ್ ಅಧಿಕಾರಿಯಾಗುವುದಾಗಿತ್ತು.

  12ನೇ ತರಗತಿಯಲ್ಲಿ ಉತ್ತಮ ಅಂಕ ಗಳಿಸಿದ ಬಳಿಕ ಪೋಷಕರು ಧೈರ್ಯದಿಂದ ಅವರನ್ನು ದೆಹಲಿಗೆ ಉನ್ನತ ಶಿಕ್ಷಣಕ್ಕಾಗಿ ಕಳುಹಿಸಿದರು. ದೆಹಲಿ ವಿಶ್ವವಿದ್ಯಾಲಯದಲ್ಲಿ ಸಸ್ಯಶಾಸ್ತ್ರದಲ್ಲಿ ಪದವಿ ಪಡೆದ ಸುಲೋಚನಾ, ಕಾಲೇಜು ದಿನಗಳಲ್ಲೇ ಎನ್‌ಎಸ್‌ಎಸ್‌ನಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡರು. ವಿವಿಧ ಗ್ರಾಮಗಳಲ್ಲಿ ಎನ್‌ಎಸ್‌ಎಸ್ ಶಿಬಿರಗಳಲ್ಲಿ ಭಾಗವಹಿಸಿ ಜನರೊಂದಿಗೆ ಕೆಲಸ ಮಾಡುವ ಅವಕಾಶ ಅವರಿಗೆ ದೊರೆಯಿತು. ಈ ಅನುಭವದಿಂದ ಸಮಾಜ ಸೇವೆಯ ಆಸಕ್ತಿ ಮತ್ತಷ್ಟು ಬಲಗೊಂಡಿತು. ಬಳಿಕ ಯುಪಿಎಸ್‌ಸಿಯನ್ನು ತಮ್ಮ ಗುರಿಯನ್ನಾಗಿ ಆಯ್ಕೆ ಮಾಡಿಕೊಂಡರು. ಯುಪಿಎಸ್‌ಸಿ ತಯಾರಿಗಾಗಿ ಸುಲೋಚನಾ ಅವರು ಯಾವುದೇ ದುಬಾರಿ ಕೋಚಿಂಗ್‌ಗೆ ಸೇರಿರಲಿಲ್ಲ. ಬದಲಾಗಿ ಸ್ವಂತ ಅಧ್ಯಯನ ಯೋಜನೆಯನ್ನು ರೂಪಿಸಿಕೊಂಡು ಸಿದ್ಧತೆ ನಡೆಸಿದರು.

  ಅವರ ತಯಾರಿಯಲ್ಲಿ ದಿನನಿತ್ಯದ ಪತ್ರಿಕೆಗಳ ವಿಶ್ಲೇಷಣೆ, ಮೂಲಭೂತ ವಿಷಯಗಳಿಗಾಗಿ NCERT ಪುಸ್ತಕಗಳ ಅಧ್ಯಯನ, ಸ್ಟ್ಯಾಂಡರ್ಡ್ ಪುಸ್ತಕಗಳ ಓದು ಹಾಗೂ ಪ್ರಚಲಿತ ವಿದ್ಯಮಾನಗಳ ಅಧ್ಯಯನ ಪ್ರಮುಖವಾಗಿತ್ತು. ಯೂಟ್ಯೂಬ್‌ನ ಉಚಿತ ತರಗತಿಗಳು, ಹಿಂದಿನ ಟಾಪರ್‌ಗಳ ತಯಾರಿ ವಿಧಾನಗಳ ಅಧ್ಯಯನ, ಉತ್ತರ ಬರೆಯುವ ಅಭ್ಯಾಸ, ಅಣಕು ಪರೀಕ್ಷೆಗಳು ಮತ್ತು ಟೆಸ್ಟ್ ಸೀರಿಸ್‌ಗಳನ್ನು ಬಳಸಿಕೊಂಡರು.

  ಪ್ರತಿದಿನ ಹಲವು ಗಂಟೆಗಳನ್ನು ಪತ್ರಿಕೆ ಹಾಗೂ ಪ್ರಚಲಿತ ವಿದ್ಯಮಾನಗಳ ಅಧ್ಯಯನಕ್ಕೆ ಮೀಸಲಿಟ್ಟು, ಒಟ್ಟಾರೆ 8ರಿಂದ 9 ಗಂಟೆಗಳ ಕಾಲ ಅಧ್ಯಯನ ನಡೆಸುತ್ತಿದ್ದರು ಎಂದು ಅವರ ಯಶೋಗಾಥೆಯಲ್ಲಿ ಉಲ್ಲೇಖಿಸಲಾಗಿದೆ. ಸುಲೋಚನಾ ಅವರ ಪರಿಶ್ರಮಕ್ಕೆ ಫಲವೂ ದೊರೆಯಿತು. ಯುಪಿಎಸ್‌ಸಿ 2021ರ ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಅವರು ಅಖಿಲ ಭಾರತ ಮಟ್ಟದಲ್ಲಿ 415ನೇ ರ‍್ಯಾಂಕ್ ಗಳಿಸಿದರು. ಎಸ್‌ಟಿ ವಿಭಾಗದಲ್ಲಿ 6ನೇ ರ‍್ಯಾಂಕ್ ಪಡೆದರು.

  ಕೇವಲ 22ನೇ ವಯಸ್ಸಿನಲ್ಲಿ ಮೊದಲ ಪ್ರಯತ್ನದಲ್ಲೇ ಐಎಎಸ್ ಅಧಿಕಾರಿಯಾದ ಅವರು, ತಮ್ಮ ಗ್ರಾಮದ ಯುವತಿಯರಿಗೆ ಹೊಸ ಮಾದರಿಯಾದರು. ತರಬೇತಿಯ ಬಳಿಕ ಅವರನ್ನು ಜಾರ್ಖಂಡ್ ಕೇಡರ್‌ನಲ್ಲಿ ಎಸ್‌ಡಿಒ ಆಗಿ ನೇಮಿಸಲಾಯಿತು. ನಿಯೋಜನೆಯ ಸಂದರ್ಭದಲ್ಲಿ ಜಿಲ್ಲೆಯ ಕಿರಿಯ ಐಎಎಸ್ ಅಧಿಕಾರಿಗಳಲ್ಲಿ ಒಬ್ಬರಾಗಿದ್ದರು ಎಂಬ ಹೆಗ್ಗಳಿಕೆಯೂ ಅವರಿಗೆ ದೊರೆಯಿತು.

  ಒಂದು ಕಾಲದಲ್ಲಿ ಹೆಣ್ಣುಮಕ್ಕಳಿಗೆ ಉನ್ನತ ಶಿಕ್ಷಣ ನೀಡುವ ವಿಚಾರವೇ ಚರ್ಚೆಗೆ ಕಾರಣವಾಗುತ್ತಿದ್ದ ಅದಲ್ವಾರಾ ಗ್ರಾಮದಲ್ಲಿ ಇಂದು ಪರಿಸ್ಥಿತಿ ಬದಲಾಗುತ್ತಿದೆ. ಸುಲೋಚನಾ ಅವರ ಯಶಸ್ಸಿನಿಂದ ಪ್ರೇರಣೆ ಪಡೆದ ಅನೇಕ ಯುವತಿಯರು ಉನ್ನತ ಶಿಕ್ಷಣಕ್ಕಾಗಿ ಜೈಪುರ, ದೆಹಲಿ ಸೇರಿದಂತೆ ವಿವಿಧ ನಗರಗಳಿಗೆ ತೆರಳುತ್ತಿದ್ದಾರೆ ಎಂದು ವರದಿಯಾಗಿದೆ. ಸುಲೋಚನಾ ಮೀನಾ ಅವರ ಕಥೆ ಕೇವಲ ಯುಪಿಎಸ್‌ಸಿ ಪರೀಕ್ಷೆಯ ಯಶೋಗಾಥೆಯಲ್ಲ. ಸೀಮಿತ ಆರ್ಥಿಕ ಸಂಪನ್ಮೂಲಗಳು, ಕೋಚಿಂಗ್‌ನ ಕೊರತೆ ಹಾಗೂ ಸಾಮಾಜಿಕ ಒತ್ತಡಗಳ ನಡುವೆಯೂ ತಮ್ಮ ಗುರಿಯತ್ತ ಮುನ್ನಡೆದ ಯುವತಿಯೊಬ್ಬರ ಕಥೆಯಾಗಿದೆ.