ವಿಧಾನ ಮಂಡಲ ವಿಶೇಷ ಅಧಿವೇಶನ: ಮೊದಲ ದಿನವೇ ಪರಿಷತ್​​ನಲ್ಲಿ ‘ವಂದೇ ಮಾತರಂ’ ವಾಗ್ವಾದ

•   Mon, Sep 21 2026 02:37:24 PM



• ಬೆಂಗಳೂರು, ಸೆ.21 (DaijiworldNews/AK):ವಿಧಾನ ಮಂಡಲ ವಿಶೇಷ ಅಧಿವೇಶನದ ಮೊದಲ ದಿನವೇ ವಂದೇ ಮಾತರಂ ಗೀತೆಯ ಗಾಯನ ವಿಚಾರವಾಗಿ ವಿಧಾನ ಪರಿಷತ್​​ ವಾಗ್ವಾದ ವೇದಿಕೆಯಾಗಿ ಮಾರ್ಪಟ್ಟಿದೆ.

  ವಂದೇ ಮಾತರಂ 2 ಚರಣ ಮಾತ್ರ ಗಾಯನ ಮಾಡಿದ್ದಕ್ಕೆ ವಿಪಕ್ಷಗಳು ರಾಜ್ಯ ಸರ್ಕಾರದ ವಿರುದ್ಧ ಮುಗಿಬಿದ್ದಿದ್ದು, 2 ಚರಣ ಮುಕ್ತಾಯದ ಬಳಿಕವೂ ಬಿಜೆಪಿ ಸದಸ್ಯರು ಪೂರ್ಣ ಗೀತೆಯನ್ನು ಹಾಡಿದ್ದಾರೆ. ಈ ಮಧ್ಯೆ ತಕ್ಷಣವೇ ಸಭಾಧ್ಯಕ್ಷರಿಂದ ಸಂವಿಧಾನ ಪೀಠಿಕೆ ಬೋಧನೆ ನಡೆದಿದೆ.

  ವಂದೇ ಮಾತರಂ ಪೂರ್ಣ ಹಾಡದ ಸರ್ಕಾರಕ್ಕೆ ಧಿಕ್ಕಾರ ಎಂದು ಬಿಜೆಪಿ ಸದಸ್ಯರು ಘೋಷಣೆ ಕೂಗಿದ್ದು, ಸಂವಿಧಾನ ಪೀಠಿಕೆ ಓದದ ಬಿಜೆಪಿ ಸದಸ್ಯರಿಗೆ ಧಿಕ್ಕಾರ ಎಂದು ಕಾಂಗ್ರೆಸಿಗರ ಪ್ರತಿಘೋಷಣೆಗಳು ಪರಿಷತ್​​ನಲ್ಲಿ ಕೇಳಿಬಂದಿದೆ.

  ಇದುವರೆಗೂ ಪರಿಷತ್​ನಲ್ಲಿ ಪೂರ್ಣ ವಂದೇ ಮಾತರಂ ಹಾಡಲಾಗುತ್ತಿತ್ತು. ಈಗೇಕೆ 2 ಪ್ಯಾರಾಗೆ ಮುಕ್ತಾಯಗೊಳಿಸಿದ್ದಿರಿ ಎಂದು BJP ಸದಸ್ಯರು ಪ್ರಶ್ನಿಸಿದ್ದು, ಸರ್ಕಾರ ಎರಡು ಪ್ಯಾರಾ ಮಾತ್ರ ಹಾಡಲು ನಿರ್ಣಯ ಮಾಡಿದೆ ಎಂದು ಸಭಾ ನಾಯಕ ಯತೀಂದ್ರ ಉತ್ತರಿಸಿದ್ದಾರೆ. ಅದನ್ನು ಹೇಳಲು ನೀವು ಯಾರು ಎಂದು ಬಿಜೆಪಿ ಸದಸ್ಯರು ಪ್ರಶ್ನಿಸಿದ್ದಾರೆ.

  ಸಭಾಪತಿಗಳ ಕೈನಲ್ಲಿ ಏನೂ ಇಲ್ಲ ಎಂದು ಸಭಾ ನಾಯಕ ಯತೀಂದ್ರ ಅವರು ಹೇಳಿದ್ದಾರೆ. ಹಾಗಿದ್ದರೆ ಇದು ಸಂವಿಧಾನದ ಪೀಠವೋ, ಸರ್ಕಾರದ ಹಂಗಿನ ಪೀಠವೋ? ಎಂದು ಸಭಾಪತಿಗಳನ್ನೇ ವಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿ ಖಾರವಾಗಿ ಪ್ರಶ್ನಿಸಿದ್ದಾರೆ. ತೀವ್ರ ಗದ್ದಲದ ಹಿನ್ನೆಲೆ ಕಲಾಪವನ್ನು 10 ನಿಮಿಷಗಳ ಕಾಲ ಕಲಾಪವನ್ನು ಸಭಾಪತಿಗಳು ಮುಂದೂಡಬೇಕಾಯಿತು.